Read Ngaju PANGARINAH 15 Bible Online

PANGARINAH 15 - Ngaju bible

PANGARINAH 15

¹Limbah te intu langit aku mite taloh je heran tuntang dia lue-luen katamame. Aton uju malekat dengan uju calaka je pangkarahiae. Jetoh je pangkalepahe Hatalla manusoh kalait Aie.

²Limbah te aku mite taloh je ampie sama kilau laut kaca hewoi dengan apui. Aku mite kea kare oloh je jari manang mawi meto te tuntang hampatonge, tuntang mawi kare oloh je arae inanda hapan angka. Kare oloh je manang te mendeng intu saran laut kaca sambil mimbing kacapi je inenga awi Hatalla akan ewen.

³ Tuntang ewen manyanyi nyanyin Moses, rewar Hatalla, tuntang nyanyin Anak Tabiri. Kalotoh auhe, “Tuhan, Hatalla je Paham Kuasae, lalehan kahaie tuntang kaherae kare gawim! Rajan kakare bangsa,[7] lalehan kabujur tuntang katotoe kare taloh je iawim!

⁴ Eweh je dia mikeh intu Ikau, Tuhan? Eweh je dia maku mambarita kahai Aim? Ikau bewei je barasih. Kakare bangsa kareh dumah manyembah Ikau karana kakare taloh je ilalus Awim te bujur jari inampayah awi oloh handiai.”

⁵ Limbah te aku mite Human Hatalla huang sorga buap, tuntang Kemah Tuhan aton intu huange.

⁶Palus uju malekat tuntang uju calaka te balua bara Human Hatalla. Pakaian ewen bara benang lena je barasih tuntang mangilat. Tuntang ewen mahapan tutup usok je inampa bara amas.

⁷Limbah te ije bara epat taloh belom te, manenga akan uju malekat te, uju sarangan amas je kontep basuang kalait Hatalla, — Hatalla je belom palus katatahie.

⁸ Maka human Hatalla te kontep awi asep kahain Hatalla tuntang kuasan Aie. Tuntang katahin uju calaka je iimbit awi uju malekat te hindai terai, ije biti mahin jaton oloh je tau tame akan huang human Hatalla.