Read Ngaju PANGARINAH 17 Bible Online

PANGARINAH 17 - Ngaju bible

PANGARINAH 17

¹ Limbah te ije bara uju malekat je mimbing uju sarangan te dumah manalih aku tuntang hamauh, “Kahetoh, aku handak mamparahan akam kilen ampie lontei je hai te kareh ihukum, iete lewu hai te je imangun intu tokep kare batang danum.

² Kare rajan kalunen habandong dengae, tuntang oloh kalunen manjadi babusau awi mihop anggor karayape te.”

³ Palus Roh Hatalla manguasa aku, tuntang malekat te mimbit aku akan padang pasir. Intu hete aku mite ije biti oloh bawi mondok intu hunjun ije kongan meto je warnae bahandang batue, tuntang je hasurat lepah hapan kare aran je mamapa Hatalla. Meto te aton sapuluh takoloke tuntang sapuluh tandoke.

⁴ Oloh bawi te mahapan baju je warnae kawo-kawo tuntang bahandang batue, hayak ihias hapan kare hiasan amas, kare permata, tuntang mutiara. Intu lengee ie mimbing ije mangkok amas je kontep awi kare taloh papa tuntang taloh je bahaya, hasil bara gawin karayape.

⁵Intu lingkaue aton tarasurat ije aran je basilim rimae. Aran te iete “Babel Je Hai, indu kakare lontei tuntang oloh darhaka hong kalunen.”

⁶Palus aku mite oloh bawi te babusau awi dahan ungkup ain Hatalla tuntang awi dahan kare oloh je impatei tagal kaketep ewen dengan Yesus. Katika aku mite oloh bawi te, aku manjadi hengan toto.

⁷Palus malekat te hamauh dengangku, “Narai bukue ikau hengan toto? Toh Aku mansanan akam taloh basilim ain oloh bawi te tuntang taloh basilim ain meto je inongkange, iete meto je uju takoloke tuntang uju tandoke.

⁸ Meto te bihin puji belom, tapi toh ie dia belom hindai. Dia tahi hindai ie kareh balua bara liang pampatei tuntang manalih kabinasa. Kare oloh je belom hong hunjun petak, je arae jaton tarasurat huang Surat Oloh Belom helo bara kalunen injapa kareh hengan mite meto te. Basa meto te bihin puji belom. Toh ie dia belom hindai tapi ie kareh lembut haluli.

⁹Hong hal toh oloh perlu aton kaharati tuntang pangatawan. Uju takolok te iete uju bukit; iete kare bukit eka oloh bawi te mondok. Tuntang uju takolok te kea jete uju raja:

¹⁰lime bara ewen te jari manjato, ije magon marentah, tuntang ije tinai hindai dumah.

¹¹Tuntang meto je bihin puji belom, tapi toh dia belom tinai, jete rajan kakaput. Ie te puna ije bara kare raja te kea, je wayah toh puna manalih kabinasa.

¹² Sapuluh tandok je gitam te jete sapuluh raja je hindai manampara marentah. Tapi ewen kareh inenga kuasa uka marentah kilau raja omba meto te ije jam katahie.

¹³Sapuluh raja toh uras sama kahimate; ewen uras manyarah kaabas tuntang kuasan ewen akan meto te.

¹⁴Ewen akan kalahi malawan Anak Tabiri te. Tapi Anak Tabiri te dengan kare oloh Ayue je baketep dengae je jari intehau tuntang iintih te, kareh mampakalah kare raja te, awi ie te Tuhan kare tuan, tuntang Rajan kare raja.”

¹⁵Malekat te hamauh kea, “Danum je gitam te, eka lontei te mondok, jete kare bangsa, kare rayat, negara tuntang kare bahasa.

¹⁶Sapuluh tandok je gitam tuntang meto te kareh manyingi lontei te. Ewen kareh marampas taloh handiai je aton ayue, tuntang mampalowai ie. Ewen kareh kuman isie tuntang mambinasa ie hapan apui.

¹⁷Basa Hatalla jari manggerek atei ewen uka malalus rencana ain Hatalla. Hatalla mawi ewen pakat uka manyarah kuasan ewen akan meto te, mangat meto te marentah sampai manjadi taloh je insanan awi Hatalla.

¹⁸Oloh bawi je gitam te jete lewu hai, je marentah kare raja hong kalunen.”