Read Ngaju PANGARINAH 18 Bible Online

PANGARINAH 18 - Ngaju bible

PANGARINAH 18

¹Limbah te aku mite ije biti malekat beken mohon bara sorga. Ayue aton kuasa je hai, tuntang awi kalawae hapus petak manjadi tarang.

² Hapan auh hai, ie hamauh, “Jari manjato! Babel hai jari manjato! Toh ie manjadi eka kare setan tuntang kare roh papa. Intu hete kare macam burong je injilek tuntang dia oloh marajie, aton belom.

³ Basa kare bangsa jari mihop anggor kipen karayape te. Kare rajan kalunen habandong dengae, tuntang kare oloh dagang hunjun petak manjadi tatau awi kipee je jaton tarasarenan te.”

⁴ Palus aku mahining auh beken bara sorga hamauh, “Has balua, ungkup Ayungku! Balua bara huange! Ela keton manumon kare dosae, tuntang omba mananggong hukumae!

⁵ Basa dosae jari hatawon sampai akan langit, tuntang Hatalla mingat kapapae.

⁶ Keleh keton mawi ie sama kilau ie mawi keton; baleh akae due kali lipet akan taloh handiai je jari iawie. Suang akan huang mangkok ayue hapan taloh ihop je due kali kaharie bara taloh ihop je puji inatape akan keton.

⁷ Tenga akae kapehe tuntang kapehen atei je sama karee dengan kahai tuntang panatau je inengae akan arepe kabuat. Basa ie harajur kea hamauh dengan arepe, ‘Aku toh ratu je marentah! Aku dia balo; Aku dia baka mangkeme kapehen atei!’

⁸Tagal jete kea, maka huang ije andau bewei ie kareh buah calaka — panyakit, kapehen atei, tuntang lau. Tuntang ie kareh ingehu awi apui, awi kuasan Hatalla je mahakim ie te.”

⁹ Kare rajan kalunen je omba huang gawin karayap tuntang kipen oloh bawi te kareh manangis tuntang manatum lewu te katika ewen mite asep mangangkewul bara apui je mangehu te.

¹⁰Ewen kareh mendeng bara kejau basa ewen kareh mikeh buah kapehee. Ewen hamauh, “Hakayah, lalehan calaka lewu je basewut batarong toh — lewu Babel je dehen! Huang ije jam bewei hukuman akam jari mawi ikau!”

¹¹ Kare oloh dagang hong hunjun petak mahin manangis tuntang kapehe atei tagal oloh bawi te, awi ije mahin jaton hindai oloh je mamili kare taloh dagang ewen.

¹² Dia aton oloh je mamili amas, perak, batu barega tuntang mutiara ain ewen; kalote kea benang lena, benang ungu, sutra, tuntang benang bahandang batue; kare macam kayu je jarang tau dinon, kare ramo bara gading tuntang kayu je lara-larang regae, tambaga, sanaman, tuntang batu marmar;

¹³upak kayu manis, rarampah, satanggi, minyak mur[8] tuntang manyan; anggor tuntang undus, tepong tuntang gandom; sapi tuntang tabiri, kuda tuntang kareta, kare jipen, sampai akan hambaruan olon.

¹⁴Kare oloh dagang hamauh dengan oloh bawi te, “Taloh handiai je handak induam akam te jari jaton hindai, kakare panatau tuntang katamam ayum jari nihau. Ikau jaton bakal manyondau jete tinai!”

¹⁵ Kare oloh dagang je jari tatau awie badagang hong lewu te kareh mendeng bara kejau, awi ewen mikeh buah kapehee. Ewen kareh manangis tuntang buah kapehen atei,

¹⁶palus hamauh, “Hakayah, lalehan calaka mawi lewu je batarong hayak basewut toh! Bahut ie mahapan pakaian lena, benang ungu tuntang benang bahandang batue; bahut ie kontep awi perhiasan amas, batu barega tuntang mutiara!

¹⁷ Tapi huang ije jam bewei, ie jari nihau kare panataue te!” Kakare juragan kapal, panumpang, tuntang anak buah kapal, dengan kakare oloh je satiar intu laut, uras mendeng bara kejau.

¹⁸ Tuntang mangkariak hong katika ewen mite asep mangangkewul bara apui je mangehu lewu te. Ewen hamauh, “Dia puji aton lewu beken sama kilau lewu je hai toh!”

¹⁹ Maka ewen manawor kawo hunjun takolok ewen kilau tanda kapehen atei, palus manangis tuntang jua-juan mangkariak, “Hakayah, lalehan calaka lewu je hai toh! Tapi huang ije jam bewei, taloh samandiai jari nihau bara ie!”

²⁰ O sorga, keleh ikau hanjak rantang tagal kahancor lewu te! O ungkup ain Hatalla, kare rasul, tuntang kare nabi, hanjak rantang keton! Basa Hatalla jari mahukum ie kilau baleh akan taloh je ilaluse mawi keton!

²¹ Limbah te, ije biti malekat je paham abas manggatang ije batu — kahain batu galingan je hai — palus manjakahe akan huang tasik sambil hamauh, “Kalotoh ampie lewu Babel je basewut te kareh injakahe tuntang inempak sampai dia tau oloh sondaue tinai.

²² Auh musik ain tukang kacapi, tukang nyanyi, tukang suling, tuntang tukang mahimon tarompet, dia tau mahiau tinai intu ekam! Tuntang ije biti mahin jaton oloh pintar je tau inyondau intu hete, tuntang auh batu galingan mahin jaton ihining tinai.

²³Kalawan sumbom mahin jaton oloh mitee tinai intu ekam; tuntang intu hete jaton kea oloh mahining auh karami pesta kawin. Kare oloh dagang iete kare oloh je paling basewut hong hunjun petak, tuntang dengan kare kaji lampah ayum te ikau mananjaro kare bangsa hong kalunen!”

²⁴ Babel ihukum awi hong lewu te jari tarasondau dahan kare nabi, dahan ungkup Hatalla — hapan auh pandak dahan oloh handiai je jari impatei hong hunjun petak.