Read Ngaju PANGARINAH 2 Bible Online

PANGARINAH 2 - Ngaju bible

PANGARINAH 2

¹“Akan malekat ungkup hong Epesus, keleh manyurat kalotoh: Jetoh peteh bara Ie je mimbing uju bintang intu lenge gantaun Aie, tuntang mananjong marak uju tantahan sumbo amas te.

²Aku katawan taloh je iawi keton: Keton bagawi paham tuntang keton sabar toto. Aku katawan keton dia handak bajenta dengan oloh papa. Tuntang kare oloh je mangaku arepe rasul padahal dia rasul, jari iuji keton, tuntang keton katawan kea ewen te pananjaro.

³Keton sabar manyarenan kapehe tagal Aku, tuntang keton dia bageto kaharap.

⁴Tapi toh kabehat auh-Ku dengan keton: Awi keton dia sinta Aku tinai kilau solak tamparae.

⁵Tagal te, keleh mingat kilen kahandaleme keton jari manjato! Keleh hobah bara kare dosan keton, tuntang lalus taloh je jari ilalus keton bara tamparae. Amon dia, maka Aku kareh dumah, manalih keton tuntang manjawut tantahan sumbon keton bara ekae.

⁶Tapi aton taloh je bahalap intu keton, iete: Keton dia rajin dengan gawin kare oloh ain Nikolaus, je Aku dia rajin kea.

⁷ Eweh je tau mahining, keleh ie manantuani taloh je insanan Roh Hatalla akan kare ungkup! Oloh je manang kareh inyohoku kuman bua bara batang pambelom je aton hong pambulan ain Hatalla.”

⁸ “Akan malekat ungkup hong Smirna, keleh manyurat kalotoh: Jetoh peteh bara Ie je tamparae tuntang kahapuse — je jari matei tuntang belom haluli.

⁹Aku katawan kare kasusah keton; Aku katawan keton belom susah tapi sapunae keton belom tatau! Aku katawan kare auh papa je inampa oloh mawi keton awi kare oloh je mangaku arepe Yehudi, padahal ewen te ungkup ain setan!

¹⁰Ela mikeh dengan kapehe je dia tahi hindai kareh ingkeme keton. Ingat, setan kareh manamean keton belahe akan huang penjara mangat keton iningkes. Keton kareh buah kapehe sapuluh andau katahie. Keleh keton manumon kare auh-Ku sampai matei, maka Aku manenga akan keton pambelom je bujur tuntang katatahie kilau panenga tagal kamanang.

¹¹ Eweh je tau mahining, keleh ie manantuani taloh je insanan Roh Hatalla akan kare ungkup! Oloh je manang samasinde jaton mangkeme kapehe en-en awi pampatei je kaduee.”

¹²“Akan malekat ungkup hong Pergamus, keleh manyurat kalotoh: Jetoh peteh bara je mimbing padang banyihi hansansila isie.

¹³Aku katawan eka keton melai, iete hong eka setan manjadi raja. Keton baketep dengang-Ku. Aloh metoh Antipas, saksing-Ku je bujur te, impatei intu taharep keton hong human setan, keton kareh milim je keton percaya dengang-Ku.

¹⁴ Aloh kalote aton pire-pire hal je Aku dia sanang dengan keton: aton oloh belahe bara marak keton je manumon taloh je iajar awi Bileam. Bileam majar Balak kilen ampie mampalawo bangsa Israel akan huang dosa; awie manantiring ewen kuman panginan je jari inenga akan dewa tuntang malalus kare taloh harayap.

¹⁵Kalote kea aton bara marak keton oloh je bahimbing dengan auh ajar oloh ain Nikolaus.

¹⁶Tagal te, keleh hobah bara kare dosan keton! Amon dia, hanjulo hindai Aku kareh dumah manalih keton tuntang mamarang kare oloh te hapan padang je aton intu nyamang-Ku.

¹⁷ Eweh je tau mahining, keleh manantuani taloh je insanan awi Roh Hatalla akan kare ungkup! Oloh je manang, kareh inyoho-Ku kuman manhu je basilim te, tuntang genep bitie kareh manarima bara Aku ije batu baputi. Intu batu te tarasurat ije aran taheta, je jaton ingatawan awi eweh bewei, beken bara oloh je manarimae.”

¹⁸“Akan malekat ungkup hong Tiatira, keleh manyurat kalotoh: Jetoh peteh bara Anak Hatalla, je nyalan matan Aie ganda-gandang kilau apui, tuntang pain Aie tarang mamancar kilau tambaga je ininih.

¹⁹Aku uras katawan taloh je iawi keton — Aku katawan keton hasinta sama arep keton, keton baketep, keton panggawi, tuntang keton sabar manyarenan kapehe. Aku katawan keton wayah toh bagawi labih are bara helo.

²⁰ Tapi toh kabehat auh-Ku dengan keton: Keton bajenta dengan Isebel, oloh bawi te je mangaku arepe sarohan Hatalla. Jari are rewar-Ku je inipue tuntang iajare mawi gawi harayap tuntang uka kuman panginan je jari inyarah akan dewa.

²¹Aku jari manenga akae katika uka hobah bara kare dosae, tapi ie dia maku terai malalus kare gawi harayap te.

²²Ingat! Aku kareh mahampas ie sampai haban hong ekae batiroh. Intu hete ie tuntang kare oloh je habandong dengae kareh mangkeme kapehe toto. Taloh handiai te kareh ilalusku katika toh — amon ewen dia terai malalus kare taloh je papa dengae.

²³ Kare oloh ayue kareh impateiku kea uka kakare ungkup katawan tuntang haratie Aku toh ie je mangatawan kare tirok atei olon. Keton kareh imbaleh-Ku manumon gawin keton genep biti.

²⁴Tapi keton awang beken intu Tiatira dia omba ajar papa te tuntang dia bajar bara kare ajar ain setan. Aku mansanan Aku kareh dia mandahang tanggongan keton je babehat.

²⁵Tapi sampai katika Aku dumah kareh, keleh keton tetep manumon taloh je jari aton intu keton.

²⁶ Oloh je manang, tuntang je jari sampai kalepahe harajur malalus taloh je eka kahandak-Ku, kareh inengaku kuasa sama kilau je inarima-Ku bara Bapa-Ku. Ewen kareh manarima kuasa bara Aku uka marentah kare bangsa hapan tongkeh sanaman, tuntang uka mamparotek kare bangsa te sama kilau kandi bara petak.

²⁸Ewen kareh mandino bintang timor bara Aku.

²⁹Eweh je tau mahining, keleh ie manantuani taloh je insanan awi Roh Hatalla akan kare ungkup!”