Read Ngaju PANGARINAH 21 Bible Online

PANGARINAH 21 - Ngaju bible

PANGARINAH 21

¹ Palus aku mite langit je taheta tuntang petak je taheta. Langit je solake tuntang petak je solake mahin nihau, tuntang tasik lilap.

² Maka aku mite lewu barasih te, iete Yerusalem je taheta, mohon bara sorga, bara Hatalla. Lewu te jari inatap sama kilau ije biti panganten bawi je imakaian uka manyondau panganten je hatue.

³ Palus aku mahining auh bara padadusan te mantehau hai auhe, “Toh, eka Hatalla melai hinje dengan olon! Ie kareh belom hinje ewen, tuntang ewen kareh manjadi ungkup Ayue. Hatalla kabuat kareh hinje ewen tuntang manjadi Hatallan ewen.

⁴ Ie kareh mampuas kare danum matan ewen. Pampatei jari jaton tinai; kapehen atei, tangis atawa kapehe mahin jaton kea. Kare taloh je usang jari lilap.”

⁵Palus Ie je mondok hunjun padadusan te hamauh, “Toh Aku manampa taloh handiai taheta!” Ie hamauh kea dengangku, “Surat jetoh, basa kare auh toh toto bujur tuntang tau imercaya.”

⁶ Palus Ie hamauh, “Jari hapus! Aku toh je solake tuntang je pangkalepahe; Aku toh Tuhan bara tamparae sampai kahapuse. Gagenep oloh je teah belaie, kareh inenga danum ihop bara tahasak danum je mimbit pambelom. Ie dia usah mambayar taloh en-en.

⁷ Kare oloh je manang akan mandino kare taloh te bara Aku. Aku kareh manjadi Hatallae, tuntang ewen manjadi anak-Ku.

⁸Tapi oloh pamikeh, oloh je tulas hadate, oloh darhaka, oloh pamuno, oloh pahabandong, oloh pangaji, oloh panyembah dewa, tuntang kakare oloh pananjaro, kareh inganan akan tasik apui tuntang barirang je hanyala, iete pampatei tingkat je kaduee.”

⁹Ije biti bara kare uju malekat je jari mimbing sarangan calaka je pangkarahiae te dumah manalih aku tuntang hamauh, “Kahetoh! Aku handak mamparahan akam Panganten, iete sawan Anak Tabiri.”

¹⁰ Maka Roh Hatalla manguasa Aku, tuntang malekat te mimbit Aku akan hunjun bukit je gantong toto. Ie mamparahan akangku Yerusalem, lewu barasih te, lewu te mohon bara sorga, bara Hatalla,

¹¹huang kahalap tuntang kahain Hatalla. Lewu te mangilat kilau batu barega sama kilau batu biduri pandan je takining kilau kristal.

¹² Dinding batu hakalilinge gantong hayak hai, mahapan duewalas bauntonggang hai, tuntang injaga awi duewalas malekat. Intu kare bauntonggang hai te inyurat aran duewalas kare suku bangsa Israel.

¹³Telo bauntonggang aton epat eka taharepe: telo akan hila timur, telo akan hila salatan, telo akan hila utara, telo akan hila barat.

¹⁴Dinding lewu te imangun hunjun duewalas galang batu. Intu gagenep galang batu te inyurat aran duewalas kare rasul Anak Tabiri te.

¹⁵ Ain malekat je hakotak dengangku te aton sukah amas je hapan mukur lewu te, kare bauntonggang tuntang dindinge.

¹⁶Lewu te lapak epat tampae — kapanjange sama dengan kalombahe. Maka malekat te mukur lewu te hapan sukah ukur; ingatawan kapanjange te 2400 kilometer;[9] kalombahe tuntang kagantonge sama kilau kapanjange.

¹⁷Katika malekat te mukur dindinge, palus ingatawan kagantong[10] dinding te jahawen puluh meter.[11] Ukuran je hapan awie te jete ukuran je ihapan awi olon.

¹⁸ Dinding lewu te inampa bara batu biduri pandan, lewu te kabuat bara amas terus, takining kilau kaca.

¹⁹Kare tilap batu galang lewu te ihias hapan are macam batu barega. Galang batu je solake inampa bara batu biduri pandan, je kaduee bara batu nilam, je kateloe bara batu akik baputi, je kaepate bara batu jamrud,

²⁰je kalime bara batu unam, je kajahawee bara batu akik bahandang atawa delima, je kaujue bara batu ratna cempaka, je kahanyae bara batu pirus, je kajalatien bara batu topas atawa yakut bahenda, je kasapuluh bara batu akik bahijau, je kasawalas bara batu pusparagam atawa lasuardi, tuntang je kaduewalas bara batu kacubung.

²¹Kaduewalas bauntonggang lewu te inampa bara duewalas mutiara, genep bauntonggang inampa bara ije mutiara. Jalan hong lewu te inampa bara amas terus, takining kilau kaca mangilat.

²²Aku jaton mite Human Hatalla hong lewu te, awi Human Hatalla te iete Tuhan kabuat, Hatalla Je Pangkahai Kuasae, tuntang Anak Tabiri te.

²³ Lewu te dia usah impalawa hapan matanandau atawa bulan, awi kahain Hatalla jari mampalawa jete, tuntang Anak Tabiri te sumboe.

²⁴ Kare bangsa hong kalunen kareh mananjong huang kalawa te, tuntang kare raja mahin kareh mimbit panatau ewen akan huang lewu te.

²⁵ Kare bauntonggang lewu te puna habangah hapus andau; dia usah inutup, awi alem jaton intu hete.

²⁶Kahai, hormat tuntang panatau kare bangsa kareh iimbit manalih lewu te.

²⁷ Tapi oloh je malalus kare taloh je bakajile-jilek, atawa oloh je pananjaro — pandak auh taloh je papa, samasinde dia tau tame akan huang lewu te. Je tau tame akan huange, iete oloh je arae jari inyurat huang Surat ain Oloh Belom, surat ain Anak Tabiri te.