Read Ngaju PANGARINAH 22 Bible Online

PANGARINAH 22 - Ngaju bible

PANGARINAH 22

¹ Malekat te kea manunjok akangku sungei je danume manenga pambelom. Sungei te hapamancar sama kilau kristal tuntang mahasor bara padadusan Hatalla tuntang Anak Tabiri,

² palus akan bentok jalan lewu te. Intu saran sungei hasansila te aton batang kayu upon pambelom, je mamua hangka duewalas genep nyelo, iete sinde ije bulan. Dawee te ingguna oloh hapa mampakeleh kare bangsa.

³ Intu huang lewu te ije mahin jaton taloh je tau buah sapa awi Hatalla. Padadusan Hatalla tuntang Anak Tabiri te aton huang lewu te. Kare rewar Ayue kareh manyembah Ie,

⁴tuntang mite ampin baun Aie. Aran Aie te kareh inyurat intu lingkau ewen.

⁵ Ewen dia usah mahapan sumbo atawa kalawan matanandau, awi intu hete alem jaton tinai, tuntang Tuhan Hatalla kabuat kareh mampalawa ewen. Maka ewen kareh marentah kilau raja palus katatahie.

⁶Palus malekat te hamauh dengangku, “Kare auh toh bujur toto tuntang tau imercaya. Tuhan Hatalla je manenga Roh Ayue akan kare nabi, jari manyoho malekat Ayue uka mamparahan akan kare rewar Ayue taloh je bajeleng kareh manjadi.”

⁷“Keleh manantuani jetoh!” koan Yesus, “Aku kareh bajeleng dumah. Salamat oloh je manumon kare auh tujum huang surat toh!”

⁸Aku Yohanes jari mahining tuntang mite taloh handiai toh. Limbah aku lepah mahining tuntang mitee, aku mahingkep intu taharep malekat je jari mamparahan taloh handiai te akangku, tuntang aku handak manyembah ie,

⁹tapi ie hamauh dengangku, “Ela! Ela manyembah aku! Keleh manyembah Hatalla! Basa aku rewar sama kilau ikau, tuntang sama kilau paharim, kare nabi tuntang oloh handiai je manumon kare peteh huang surat toh!”

¹⁰Palus ie hamauh tinai, “Ela milim kare auh tujum huang surat toh, awi katikae jari tokep taloh handiai toh kareh manjadi.

¹¹ Oloh papa, nauhe ie jua-juan mawi kapapa; oloh je injilek nauhe ih ie manyarenan arepe; oloh je manumon kahandak Hatalla, nauhe ie harajur manumon kahandak Hatalla, tuntang oloh je belom baya akan Hatalla, nauhe ie harajur belom baya tantai akan Hatalla.”

¹² “Keleh manantuani jetoh!” koan Yesus, “Dia tahi hindai aku kareh mimbit upah hapa mamaleh gawin genep oloh je ombet akan taloh je awie.

¹³ Aku toh je solake tuntang je pangkarahiae; aku toh Tuhan je Tamparae sampai Kahapuse.”

¹⁴ Salamat oloh je mampukan jubahe sampai barasih sampai ewen aton hak akae kuman bua bara batang pambelom tuntang tame akan huang lewu te mahalau bauntonggange.

¹⁵Tapi kare oloh je malalus kare taloh je papa, je mahapan kare kaji, kare oloh je malalus gawi harayap, je mamuno, je manyembah dewa, tuntang kare oloh pananjaro, aloh hapan kotake atawa hapan gawie, kakare oloh te ekae aton hong luar lewu te.

¹⁶ “Aku, Yesus, jari mangirim malekat ayung-Ku akan keton uka ie mansanan kare hal toh akan kare ungkup. Aku toh panakan Dawid; aku toh bintang timor je balawa te.”

¹⁷ Roh Hatalla tuntang Panganten Bawi hamauh, “Kahetoh!” Gagenep oloh je mahining jetoh musti kea hamauh, “Kahetoh!” Eweh je teah belaie, keleh dumah! Tuntang eweh je handak, keleh ie manduan danum je mimbit pambelom te dengan dia usah mambayar taloh en-en.

¹⁸ Akan gagenep oloh je mahining kare auh tujum huang surat toh, aku Yohanes, mampingat jetoh: amon oloh mandahang kare taloh en-en intu kare auh tujum toh, maka Hatalla kareh mandahang hukuman mawi oloh te hapan kare calaka je inyurat huang surat toh.

¹⁹Tapi amon oloh mangurang taloh en-en bara kare auh tujum toh, maka Hatalla kea kareh mangurang bagie je insanan huang surat toh — iete bagie huang batang pambelom tuntang huang lewu barasih te.

²⁰Ie je manyampai kakare barita toh hamauh, “Toto, Aku kareh dumah bajeleng!” Amen! Keleh dumah, o Tuhan Yesus!

²¹Keleh Tuhan Yesus manenga berkat Ayue akan salepah ungkup ain Hatalla![12]