Read Ngaju PANGARINAH 3 Bible Online

PANGARINAH 3 - Ngaju bible

PANGARINAH 3

¹“Akan malekat ungkup hong Sardis, keleh manyurat kalotoh: Jetoh peteh bara Ie je tempon uju roh bara Hatalla tuntang uju bintang te. Aku katawan taloh je iawi keton. Koan oloh, keton belom, tapi sapunae keton matei!

²Tagal te, keleh misik, tuntang mandehen taloh je magon aton intu keton helo bara ie matei samasinde. Basa Aku sondau taloh je ilalus keton te, ije mahin jaton je tinduh-barasih intu taharep Hatalla.

³ Jadi, keleh mingat tinai taloh je jari iajar akan keton bihin tuntang taloh je jari ihining keton. Keleh malalus jete tuntang hobah bara kare dosan keton. Amon keton dia misik, Aku kareh dumah manalih keton kilau maling; tuntang keton dia katawan hamparea Aku dumah.

⁴Tapi bara marak keton je hong Sardis magon aton oloh je mahaga pakaiae tetep barasih. Ewen te kareh mananjong haya-hayak dengang-Ku hapan pakaian baputi, awi ewen patut kalote.

⁵ Akan ewen je manang kareh ingkepan jubah baputi. Aran ewen dia ingabus bara Surat Oloh Belom. Tuntang intu taharep Bapa-Ku tuntang kare malekat Ayue Aku kareh mangaku ewen te oloh Ayungku.

⁶Eweh je mahining keleh ie manantuani taloh je insanan awi Roh Hatalla akan kare ungkup!”

⁷ “Akan malekat ungkup hong Piladelpia, keleh manyurat kalotoh: Jetoh peteh bara Ie je barasih tuntang bujur haliai. Ie te malekat je mimbing kunci ain Dawid; amon Ie mukeie, ije biti mahin jaton oloh tau matepe, tuntang amon Ie matepe, ije biti mahin jaton oloh tau mukeie.

⁸Aku katawan taloh je iawi keton. Aku katawan kaabas keton dia sapire; keton jari manumon auh ajar-Ku tuntang baketep dengang-Ku. Akan keton jari iuap-Ku ije bauntonggang, je jaton tau iatep awi eweh bewei.

⁹ Keleh mingat jetoh: Kare oloh je manjadi jalahan setan te, uras pananjaro je mangaku arepe Yehudi padahal beken, kareh iawi-Ku sampai ewen manyembah intu taharep keton. Tuntang ewen kareh katawan je Aku sinta keton.

¹⁰Awi keton jari mamenda parentah-Ku uka baketep, maka Aku kareh mangalindong keton bara wayah kapehe je buah hapus kalunen. Hal te kareh manjadi uka maningkes kakare oloh handiai hong kalunen.

¹¹Aku bajeleng dumah! Haga bua-buah taloh je intu keton, mangat ije biti mahin jaton oloh je tau marampas panenga kamanang ain keton.

¹² Oloh je manang, kareh iawi-Ku manjadi tihang hong huma barasih ain Hatallang-Ku, tuntang ie kareh melai hong eka te palus katatahie. Aran Hatallang-Ku, tuntang aran lewun Hatallang-Ku — iete Yerusalem taheta je kareh mohon bara sorga, bara Hatallang-Ku — kareh inyuratku intu bitin oloh te. Tuntang arang-Ku je taheta kareh inyurat-Ku kea intu bitie.

¹³Eweh je tau mahining, keleh ie manantuani taloh je insanan awi Roh Hatalla akan kare ungkup!”

¹⁴ “Akan malekat ungkup hong Laodikea, keleh manyurat kalotoh: Jetoh peteh bara Amen te, Saksi je baketep tuntang bujur, upon[2] taloh handiai je injapa awi Hatalla.

¹⁵Aku katawan taloh je iawi keton; Aku katawan keton dia sadingen tuntang dia kea balasot. Sapunae keton salahimbal bara due te!

¹⁶Tapi keton laso-lasot kuku; dia balasot, dia kea sadingen. Jete sababe keton kareh ilujaku balua bara nyamang-Ku.

¹⁷Keton hamauh, ‘Ikei tatau tuntang uras sukup; ikei jaton tapas taloh en-en.’ Tapi keton dia katawan dia lue-luen kapehe tuntang kapasi ampin keton! Keton belom susah, halowai tuntang babute.

¹⁸Tagal te Aku manasehat keton mangat mamili amas dengang-Ku, iete amas je terus, mangat keton manjadi tatau. Keleh mamili kea dengang-Ku pakaian baputi mangat keton hapakaian tuntang manutup ampin keton je halowai tuntang mampahawen. Tuntang keleh mamili kea tatamba mangat iohos intu matan keton mangat keton tau mite.

¹⁹ Kare oloh je inyinta-Ku, jete je iningak-Ku tuntang injara-Ku. Tagal te, keleh keton balasot atei tuntang hobah bara kare dosan keton.

²⁰Ite! Aku mendeng intu bauntonggang tuntang manegah. Amon aton oloh je mahining auh-Ku, tuntang mukei bauntonggang, Aku kareh tame manyondau ie; Aku kareh kuman hinje ie tuntang ie akan kuman hinje Aku.

²¹Oloh je manang, kareh inyoho-Ku mondok dengang-Ku hunjun padadusang-Ku, sama kilau Aku kabuat mahin jari manang toh mondok dengan Bapa hunjun padadusan Ayue.

²²Eweh je tau mahining, keleh ie manantuani taloh je insanan awi Roh Hatalla akan kare ungkup!”