Read Ngaju PANGARINAH 4 Bible Online

PANGARINAH 4 - Ngaju bible

PANGARINAH 4

¹Limbah te aton taloh je gitangku tinai. Aku mite ije bauntonggang buap hong sorga. Limbah te aku mahining tinai auh je solake jari hakotak dengangku kilau tarompet. Auh te hamauh, “Has, mandai akan hetoh. Aku handak mamparahan akam taloh je akan manjadi rahian kareh.”

² Balalu ih aku inguasa awi Roh Hatalla. Palus aku mite hong sorga aton ije padadusan, tuntang aton ije biti oloh mondok intu padadusan te.

³Baun oloh te balawa hasangkowong kilau kalawan batu akik tuntang batu delima. Ije liu bawarna jamrud mangalingkar padadusan te.

⁴Hapamunter hakaliling padadusan te aton due puluh epat padadusan je beken. Intu hete aton mondok due puluh epat pamimpin je hapakaian baputi, tuntang mahapan makota amas.

⁵ Bara padadusan te balua pancar kilat tuntang balua auh nyaho je auhe rit-tar hagalagar. Tuntang intu taharep padadusan te aton uju obor je hanyala; jete ie uju Roh Hatalla.

⁶ Intu padadusan te aton kea taloh ije ampie kilau laut kaca, takining kilau kristal. Intu hakaliling padadusan, hong genep sarae, aton epat taloh belom je hila baue tuntang hila likute kontep awi mate.

⁷Taloh belom je solake sama ampie kilau singa. Ije kaduee, sama kilau sapi hatuee. Ije kateloe ampin baue kilau baun olon. Ije kaepate, ampie sama kilau burong rajawali kanjerae tarawang.

⁸ Kaepa-epat taloh belom te, genep bitie aton jahawen palapase, tuntang hakalilinge tuntang hila huange kontep awi mate. Handau hamalem kare taloh belom te dia hakalayan manyanyi, “Barasih, barasih, barasih Tuhan, Hatalla Je Jaton Tikas Kuasae; je aton, je jari aton, tuntang je harajur aton.”

⁹Kaepa-epat taloh belom te manyanyi nyanyi tara, hormat tuntang tarima kasih Akae je mondok hunjun padadusan te, Ie te je belom sampai katatahie. Tuntang katika kare taloh belom te manyanyi,

¹⁰kadue puluh epat pamimpin te mahingkep intu taharep oloh je mondok hunjun padadusan te, palus manyembah Ie je belom katatahie. Limbah te ewen manjakah kare makota ain ewen akan baun padadusan te sambil hamauh,

¹¹“O Tuhan, o Hatallan ikei! Ikau wei je patut mandino tara, hormat tuntang kuasa. Awi ikau je manjapa kare taloh handiai, tuntang tagal kahandak Ayum kea kare taloh handiai te jari manjadi tuntang belom.”