Read Ngaju PANGARINAH 5 Bible Online

PANGARINAH 5 - Ngaju bible

PANGARINAH 5

¹ Limbah te aku mite ije kabalon surat intu lengen Ayue je mondok hunjun padadusan te. Balon surat te kontep inyurat hasansila tuntang inyegel hapan uju segel.

²Palus aku mite ije biti malekat je mamot menteng hamauh dengan auh je hai koae, “Eweh je patut muap kare segel toh tuntang mukei surat toh?”

³Tapi aloh hong sorga kalote kea intu hunjun petak, atawa penda petak[3] atawa hong penda petak mahin jaton kea oloh je olih mukei surat te, tuntang manampayah huange.

⁴Maka aku manangis side-siden awi ije biti mahin jaton oloh je patut mukei surat te tuntang manampayah huange.

⁵ Balalu ije biti bara kare pamimpin te hamauh dengangku, “Ela manangis! Ite! Singa bara suku Yuda, panakan Dawid je hai, jari manang. Ie olih mamusit uju segel tuntang mukei surat te.”

⁶ Limbah te aku mite ije kongan Anak Tabiri mendeng intu bentok padadusan te, ingaliling awi epat taloh belom tuntang kakare pamimpin te. Anak Tabiri te ampie kilau je jari inyambalih. Ayue aton uju tandok uju mate: iete uju roh bara Hatalla je inyoho akan hapus kalunen.

⁷Limbah te Anak Tabiri te akan baun tuntang manduan balon surat te bara lengen oloh je mondok hunjun padadusan.

⁸ Pandehan Anak Tabiri te mawie kalote, maka epat taloh belom tuntang due puluh epat pamimpin te uras mahingkep manyembah intu taharep Ie. Genep bitin ewen te mimbing kacapi tuntang mangkok amas je basuang garo, iete kare lakudoan ungkup Hatalla.

⁹ Ewen manyanyi ije nyanyi taheta: “Ikau patut manduan surat te tuntang mamusit kare segel te. Basa Ikau jari impatei, tuntang tagal pampatei Aim, kalunen bara kare suku, bahasa, negara, tuntang bangsa jari imili Awim akan Hatalla.

¹⁰ Ikau jari mawi ewen tantai manjadi ije bangsa kare imam, mangat ewen mandohop Hatallan itah, tuntang marentah intu hunjun petak.”

¹¹ Limbah te aku manampayah tinai, aku mahining auh malekat je bakoya-koyan tuntang bamillio-million karee. Ewen mendeng mangaliling padadusan, kaepat taloh belom tuntang kare pamimpin te.

¹²Tuntang ewen manyanyi hapan auh je hai, “Anak Tabiri je jari inyambalih te, patut manarima kuasa, panatau, kapintar-kaharati tuntang kaabas; Ie patut ihormat, impahai tuntang inara!”

¹³Palus aku mahining kakare taloh belom intu langit, intu hunjun petak, intu penda petak tuntang huang tasik — kakare taloh belom hong langit tuntang hong hapus penda langit toh — manyanyi, “Ie je mondok hunjun padadusan, tuntang Anak Tabiri te, inara tuntang ihormat, hai tuntang kuasa palus katatahie!”

¹⁴Maka epat taloh belom te tombah, “Amen!” Tuntang kare pamimpin te kea mahin mahingkep tuntang manyembah.