Read Ngaju PANGARINAH 7 Bible Online

PANGARINAH 7 - Ngaju bible

PANGARINAH 7

¹ Limbah te, aku mite epat biti malekat mendeng intu epat puting petak. Ewen manahan kaepat riwut hong kalunen mangat jaton riwut je manampur hunjun petak atawa intu tasik, atawa intu kare batang kayu.

²Palus aku mite ije biti malekat je beken lembut bara hila timor. Ie mimbit segel ain Hatalla je belom. Hapan auh je hai malekat te matehau kaepat malekat je jari mandino kuasa bara Hatalla uka marusak petak tuntang tasik.

³ Malekat te hamauh, “Ela helo marusak petak atawa tasik, atawa kare batang kayu amon ikei hindai mangkepan tanda segel intu lingkau kare rewar Hatallan itah.”

⁴Palus insanan akangku aton 144.000 biti oloh je inanda hapan segel ain Hatalla intu lingkau ewen. Kare oloh te induan bara duewalas bangsa Israel;

⁵bara genep bangsa 12.000 biti. Iete bara bangsa: Yuda, Ruben, Gad,

⁶Aser, Naptali, Manase,

⁷Simeon, Lewi, Isaskar,

⁸Sebulon, Yosep, tuntang Benyamin.

⁹Limbah te aku mite tinai, palus taragitan kawan oloh kalunen je dia taraise karee — ije biti mahin jaton oloh tau mise karee. Ewen te iete kare oloh bara genep bangsa, suku, negara, tuntang bahasa. Sambil mangkepan jubah je uras baputi tuntang sambil mimbing kare palapah korma, kare oloh are te mendeng manaharep padadusan tuntang manaharep Anak Tabiri te.

¹⁰Palus hapan hai auh ewen mantehau, “Eka salamat itah te dumah bara Hatallan itah, je mondok hunjun padadusan tuntang bara Anak Tabiri te!”

¹¹Kakare malekat mendeng mangaliling padadusan te tuntang kare pamimpin dengan epat taloh belom te. Kare malekat te mahingkep intu taharep padadusan palus manyembah Hatalla.

¹²Ewen hamauh hai auhe, “Amen! Tara akan Hatallan itah je hai tuntang eka kapintar-kaharati. Kare auh tara, tarimakasih tuntang hormat patut inawon akae. Ie kuasa tuntang abas palus katatahie! Amen.”

¹³Ije biti bara kare pamimpin te misek dengangku, “Eweh kare oloh je mahapan jubah baputi te, tuntang bara kueh ewen te dumah?”

¹⁴ “Aku dia katawan, Tuan. Tuan kabuat je katawan,” koangku tombah. Maka ie hamauh dengangku, “Jetoh ie kare oloh je jari salamat limbah mahalau wayah kapehe je paham. Ewen jari menyau jubah ewen tuntang mawie manjadi baputi hapan dahan Anak Tabiri te.

¹⁵Jete sababe ewen mendeng manaharep padadusan Hatalla, tuntang manyembah Ie handau hamalem intu huang Human Hatalla. Tuntang Ie je mondok hunjun padadusan te kareh melai hinje ewen mangat manganjungen ewen.

¹⁶ Ewen dia akan mangkeme balau, atawa teah belai tinai; matanandau atawa pandang andau dia hindai mampalupak ewen,

¹⁷ awi Anak Tabiri je mondok intu bentok padadusan te kareh manjadi sakatik ewen. Ie kareh magah ewen akan tahasak danum je manenga pambelom. Tuntang Hatalla kareh mampuas kakare danum matan ewen.”