Read Ngaju RUT 1 Bible Online

RUT 1 - Ngaju bible

RUT 1

¹Intu jaman horan helo bara Israel irentah awi ije biti raja, lewu Kanaan intakan awi lau. Metoh te aton ije biti oloh Hatue arae Elimelekh. Ie bara jalahan Eprata, tuntang melai intu Betlehem hong tanah Yuda. Ganan intakan awi lau te, ie haguet akan lewu Moab dengan sawae, Naomi, tuntang due anake je hatue: Mahlon tuntang Kilyon. Balalu ewen melai intu hete. Metoh ewen magon intu hete, Elimelekh matei.

³Maka Naomi melai dengan anake due biti.

⁴Due biti anake te kawin dengan bawin oloh Moab, je arae Orpa tuntang Rut. Sapuluh nyelo limbah te,

⁵due anak hatue ain Naomi te, matei kea, sampai Naomi nihau banae tuntang due anake.

⁶Pire-pire katahie limbah te Naomi mahining TUHAN jari mamberkat ungkup Israel dengan hasil getem je bahalap. Awi te Naomi dengan due manantue batatap handak malihi Moab.

⁷Ewen haguet haya-hayak buli akan Yuda. Intu benteng jalan

⁸Naomi hamauh dengan kadadue manantue te, “Keton buli ih akan human indu keton. Keleh TUHAN bahalap dengan keton kilau keton kea bahalap dengangku tuntang dengan ewen je jari malihi kalunen te.

⁹Keleh TUHAN manenga akan keton oloh hatue jadi banan keton mangat keton tau manampa huma serok keton tinai.” Limbah hamauh kalote, Naomi manyewut salamat melai akan ewen tuntang manyium ewen. Tapi Orpa tuntang Rut manangis hai auhe,

¹⁰tuntang hamauh dengan Naomi, “Dia, mai! Ikei omba ikau haguet manalih bangsa ayum.”

¹¹“Ela, nak!” tombah Naomi, “keton labih bahalap buli. Kanduen keton omba aku? En tau aku manak uka jadi banan keton?[1]

¹²Keleh buli, nak, awi aku jari pahalau bakas mado kawin tinai. Tuntang paribasae magon kea aton harapan akangku mangat kawin alem toh kea tuntang mandino anak hatue,

¹³en keton tau mentai sampai ewen hai? En awi te balalu keton dia kawin dengan oloh beken? Dia, anakku, ela kalote! Aku pehe atei dengan taloh je ingkeme keton awi tagal hukuman TUHAN akangku.”

¹⁴Rut tuntang Orpa manangis tinai hayak hai auhe. Limbah te Orpa hapisah hayak manyium empoe palus ie buli.[2] Tapi Rut dia maku hapisah dengan empoe te.

¹⁵Naomi hamauh dengae, “Rut, item! Dueim jari buli akan bangsae tuntang akan kare dewae. Keleh ikau haguet kea, nak, nuntut ie buli!”

¹⁶Tapi Rut tombah, “Umai, ela ah umai manyoho aku buli tuntang malihi umai! Aku handak omba umai. Akan kueh bewei umai haguet, akan hete aku haguet. Hong kueh bewei umai melai, intu hete kea aku handak melai. Bangsa ayum, jadi bangsa ayungku, Hatalla je inyembahm, inyembahku kea.

¹⁷Hong keah bewei umai matei, intu hete kea aku nahuang matei tuntang ingubur. Keleh TUHAN mahukum aku paha-paham, amon aku maku hapisah dengan umai, kacuali pampatei mamisah itah!”

¹⁸Naomi mite Rut karas handak omba, maka, ie dia hamauh en-en tinai.

¹⁹Ewen marajur pangguet sampai intu Betlehem. Sana ewen sampai intu hete hapus lewu te geger. Kare oloh bawi je intu hete hamauh, “En toto ie te Naomi?”

²⁰“Ela mantehau aku Naomi,” koan Naomi, “tehau aku Mara,[3] awi Hatalla Je Jaton Tikas Kuasae jari manalua aku belom buah kapehe paham.

²¹Metoh aku haguet bara hetoh aku bara kasukop, tapi toh TUHAN mimbit aku buli buang. Awi te ela keton manyewut aku Naomi tinai, awi TUHAN Je Jaton Tikas Kuasae jari mahukum aku hapan are kapehe!”

²²Kalote saritae kilen ampie Naomi buli bara Moab impahayak Rut manantue je oloh Moab te. Ewen sampai intu Betlehem hong tamparan wayah oloh manggetem gandom.[4]