Read Ngaju RUT 2 Bible Online

RUT 2 - Ngaju bible

RUT 2

¹Naomi aton kolae bara keluarga ain taliau banae, Elimelekh. Oloh te tatau tuntang ihormat. Arae Boas.

² Sinde andau koan Rut dengan Naomi, “Mai, aku balaku parmisi handak akan tana uka manampunan gandom je tau manjato bara lengen kare oloh je manggetem. Angate tantu aton ih oloh je kareh manalua aku mawi taloh te.” “Yoh, nak!” tombah Naomi, “Lius bewei!”

³Maka Rut palus haguet akan tana tuntang manampunan gandom manuntut kare oloh je manggetem. Kanateke kea ie sampai akan tanan Boas.

⁴Dia tahi limbah te Boas dumah bara Betlehem hayak manabe kare oloh je manggetem. “Keleh TUHAN mampahayak keton,” koae. Kare oloh je manggetem tombah, “Keleh TUHAN mamberkat Bapa.”

⁵Boas misek dengan mandore, “Eweh oloh bawi te?”

⁶Mandor te tombah, “Ie bawin oloh Moab je harue dumah dengan Naomi bara tanah Moab.

⁷Ie balaku dengangku mangat tau omba bara likut kare oloh je manggetem uka manampunan gandom je manjato. Bara hanjewu ie bagawi, toh harue ie malayan balalu melai hanjulo intu pasah.”[5]

⁸Palus Boas hamauh dengan Rut, “Coba hining helo. Dia usah ikau haguet mamumpong gandom intu tanan oloh beken. Nampunan ih intu hetoh hayak kare panggawi ayungku je bawi. Nantuani akan kueh ewen haguet manggetem. Nuntut ewen harajur tuntang ela kejau bara ewen. Amon ikau teah belai, duan ih danum bara kare balanai je jari inyuang awi kare oloh bagawi je hatue. Aku jari marentah ewen uka ewen ela mangaraen ikau.”

¹⁰Mahining auh te, Rut sontop intu taharep Boas tuntang hamauh, “Tuan, aku dia patut iawi kalote kahalape. Aku toh oloh bangsa beken tuntang dia patut inantuani awi Tuan!”

¹¹Boas tombah, “Aku jari mahining tahiu kare taloh je ilalusm akan empom bara limbah banam matei. Aku katawan ikau jari malihi oloh bakasm tuntang petak danum ayum mangat dumah tuntang melai intu hetoh dengan kare oloh je hindai ingasene awim.

¹²Keleh TUHAN mambaleh kakare kataum. Keleh ikau manarima taloh je patut inenga akam bara TUHAN, Hatallan Israel, awi ikau jari dumah uka bakalindong intu Ie!”

¹³Rut tombah, “Tuan paham bahalap dengangku, aloh aku dia sama dengan panggawi ain Tuan. Kajenta Tuan paham mampong ateiku.”

¹⁴Sana jari sampai katika kuman, Boas hamauh dengan Rut, “Ayo kuman. Toh danum acar anggor.” Palus Rut kuman hayak dengan kare oloh je manggetem. Boas kea manenga kenta bara gandom akae, tuntang Rut kuman sampai besoh. Limbah kuman, magon aton tinai tisae.

¹⁵Limbah te Rut haguet tinai manampunan gandom. Limbah ie haguet, Boas hamauh dengan kare oloh je manggetem, “Amon ie manampunan gandom bara kare gandom je jari imeteng, nalua ih. Ela mampahawen ie atawa malait ie. Keleh keton tantai ihat manjawut misut-misut bara je jari imeteng te, tuntang mampanjato akae uka ie manduae.”

¹⁷Rut dia tende-tende manampunan gandom intu tana te sampai halemei. Limbah ie mahampa-hampas kare batang gandom te mangat malapas kare bawake bara batange, ampie ie jari dinon lakau sapuluh kilogram.

¹⁸Limbah te ie buli akan lewu sambil mimbit hasil je inampunae te, tuntang mamparahan akan empoe kilen karee taloh je jari inampunae. Ie kea manenga akan empoe te panginan je dia olihe mapalepahe metoh ie kuman.

¹⁹Naomi hamauh dengae, “Hong kueh ikau dinon urase taloh toh? Intu tanan eweh ikau bagawi andau toh? Keleh Hatalla mamberkat oloh je malalus kahalap akam te!” Palus Rut manyarita akan Naomi je tana ekae manampunan gandom te ie te ayun ije biti oloh hatue arae Boas.

²⁰ “Nak, oloh te kola tokep ain itah kabuat,” koan Naomi. “Ie te je musti aton tanggongae taharep itah. Keleh TUHAN mamberkat ie. TUHAN harajur malalus janjin Aie, aloh akan oloh je magon belom aloh akan ewen je jari matei.”

²¹Limbah te Rut hamauh tinai, “Mai, oloh te hamauh kea je aku harajur tau manampunan gandom hayak dengan kare pagawaie sampai hasil hapus tanae lepah inggetem.”

²²“Yoh, nak,” tombah Naomi dengan Rut, “Puna labih bahalap ikau bagawi hayak kare panggawi je bawi intu tanan Boas. Awi, amon ikau haguet akan tanan oloh beken, ikau tau ingaraen oloh intu hete!”

²³Awi te, Rut tetep omba kare panggawi je bawi intu tanan Boas. Ie manampunan gandom intu hete sampai taloh je inggetem uras jari lepah — aloh getem je solake, aloh getem je kalepahe. Katahin te Rut melai dengan empoe.