Read Ngaju RUT 3 Bible Online

RUT 3 - Ngaju bible

RUT 3

¹Pire-pire katahie limbah te, Naomi hamauh dengan Rut, “Aku handak mangat ikau tau nguan huma serok ayum tinai tuntang belom sanang.

²Ikau bagawi hayak kare oloh bawi intu tanan Boas, dia kalote? Nah, Boas te kolan itah. Jadi hining! Alem toh ie haguet mihik gandom intu tanae.

³Toh lius mandoi, keleh mahapan taloh je mangat ewaue[6] tuntang kepan pakaiam je pangkahalape. Balalu lius akan eka Boas metoh bagawi malekak bawak gandom bara patinge. Entai intu hete sampai ie ombet kuman mihop. Tapi ela sampai ie katawan, ikau aton intu hete.

⁴Keleh manantuani intu kueh ie batiroh. Amon ie jari tapatiroh, lius haguet akan hete tuntang tapei kahowute, palus menter tokep paie.[7] Kareh ie mansanan akam narai je patut iawim.”

⁵“Yoh, Mai,” tombah Rut, “Aku kareh mawi narai bewei je insanan umai.”

⁶Rut lius akan eka oloh bagawi maleakak bawak gandom bara patinge. Intu hete ie malalus kare taloh je jari inyoho awi empoe.

⁷Limbah Boas ombet kuman mihop, ie besoh tuntang sanang ateie. Palus ie lius balalu batiroh tokep tuyok gandom. Suni-suni Rut dumah balalu mantapei kahowut Boas, limbah te menter tokep paie.

⁸Bentok alem, salenga Boas tapisik tuntang handak mambalik arepe. Ie tarewen mite aton ije biti oloh bawi batiroh tokep paie.

⁹“Eweh ikau?” koae misek. “Aku Rut, Tuan!” tombah Rut. “Tuan puna kolan ikei je tokep je musti aton tanggong jawab taharep pambelom aingku. Keleh Tuan manduan aku jadi sawan Tuan.”

¹⁰“Keleh TUHAN mamberkat ikau, anakku,” koan Boas. “Inanding dengan taloh je jari ilalusm dengan empom je bawi, maka gawim je metoh toh mamprahan sintam je labih hai tinai. Ikau tau manggau banam je tabela marak oloh tatau atawa kea oloh je belom susah, tapi ikau dia malalus taloh te.

¹¹Awi te, ela mikeh, Rut. Uras taloh je ilakum te kareh ilalus awiku; awi uras oloh intu lewu toh jari katawan ikau ije biti oloh bawi je bahalap gawie.

¹² Puna toto, aku musti mananggong pambelom ayum, awi aku puna kolam je tokep. Tapi magon aton oloh beken je aton tanggongae taharep pambelom ayum. Tuntang ie te kola je labih tokep bara aku.

¹³Alem toh ikau melai intu hetoh ih. Jewu aku handak misek en ie handak malalus tanggongan te akam atawa dia. Amon ie maku, yoh ih; tapi amon ie dia maku, te aku hajanji tagal Hatalla je belom, aku kareh malalus taloh je manjadi tanggongan te. Toh batiroh ih helo intu hetoh sampai hanjewu.”

¹⁴Palus Rut batiroh tokep pain Boas. Susong hanjewu jewue, Rut jari misik mangat dia gitan oloh. Awi Boas dia maku aton oloh katawan Rut dumah akan eka te.

¹⁵Boas hamauh dengan Rut, “Lekak sandurongm.” Palus Rut malekak sanduronge tuntang mambirange. Boas manusoh akan sandurong te lakau due puluh kilogram gandom. Palus ie manggatange akan hunjun bahan Rut. Limbah te Boas haguet akan lewu.

¹⁶Sana Rut sampai huma, empoe misek, “Kilen ampie, nak?” Balalu Rut manyarita uras taloh je iawi Boas dengae.

¹⁷“Tinai,” koan Rut limbah te, “Ie haream je manenga uras gandom toh akangku, awi koae aku dia tau buli buang talih umai.”

¹⁸Palus koan Naomi, “Entai ih, nak sampai ikau mite kajarian taloh toh kareh. Boas kareh dia melai bewei sahindai ie mampahapus taloh toh andau toh kea.”