Read Ngaju RUT 4 Bible Online

RUT 4 - Ngaju bible

RUT 4

¹Boas haguet akan eka pumpong intu lawang lewu. Limbah ie mondok intu hete, aton ije biti oloh hatue mahalau, je manumon Boas te iete kolan Elimelekh je pangkatokepe. Palus Boas mantehau ie, “Paharingku, keleh mondok intu hetoh!” oloh te dumah palus mondok.

²Limbah te Boas mimbit sapuluh bakas lewu te mangat mondok kea sama-sama intu hete.

³Limbah ewen mondok, Boas hamauh dengan kolae te, “Naomi jari haluli bara Moab. Toh ie handak manjual petak taliau Elimelekh, keluarga ain itah.

⁴Tuntang angatku ikau batantu katawan tahiu taloh te. Amon ikau handak mamilie, suman intu taharep kare oloh je mondok intu hetoh. Amon dia, suman tara-tarang, awi baya kue ih je aton hak akan taloh te; ikau je solake, limbah te aku.” Tombah oloh te, “Yoh, aku kareh mamilie.”

⁵Palus koan Boas, “Yoh amon kalote. Tapi, amon ikau mamili petak te bara Naomi, ikau musti kea manduan Rut,[8] bawin oloh Moab, balo ain taliau anak Naomi. Awi, petak te musti tetep jadi ayun turonan oloh je jari matei te.”

⁶Tombah oloh te, “Amon kalote, maka aku dia olih. Toh keleh aku malekak hak ayungku kilau oloh je solake je musti mamili petak te. Jaton gunae aku mamilie awi petak te tantu dia kareh tau jadi ayun turonangku. Labih bahalap ikau ih je mamilie.”

⁷ Hong wayah te amon oloh manjual atawa manakiri taloh je ayue, maka akan mandehen taloh te, bahut je manjual mengkak sarompahe, palus manyarahe akan je mamilie. Kalote carae kare oloh intu Israel mandehen janji huang gawi hajual-hapili petak.

⁸Awi te, metoh oloh te hamauh engan Boas, “Ikau ih je mamilie,” ie mengkak sarompahe palus manyarah te akan Boas.[9]

⁹Palus koan Boas dengan kare bakas lewu tuntang dengan kare oloh beken je aton intu hete. “Andau toh keton samandiai jadi saksi tahiu aku je jari mamili bara Naomi uras taloh je ayun taliau Elimelekh tuntang kare anake, iete Kilyon tuntang Mahlon.

¹⁰ Tinai kea, aku manduan Rut, bawin oloh Moab, balon taliau Mahlon te jadi sawangku. Tumon te petak te kareh tetep jadi ayun keluarga oloh je jari matei te. Tuntang turonae kea kareh tetep aton hong marak kolae tuntang hong lewue. Ingat kare pahari, andau toh keton urase jadi saksie.”

¹¹ Kare bakas lewu tuntang kare oloh beken je aton intu lewu te hamauh, “Yoh, ikei saksie. Keleh TUHAN mawi sawam te kilau Rahel tuntang Lea je manak are anak akan Yakob. Keleh ikau tatau intu marak kare oloh bara jalahan Eprata tuntang keleh ikau basewut intu Betlehem.

¹² Keleh kare anak je inenga TUHAN akam mahalau bawi tabela toh kareh mawi keluargam kilau Peres, anak bara Yuda tuntang Tamar.”

¹³Boas manduan Rut jadi sawae. TUHAN mamberkat Rut sampai ie batihi palus manak ije biti anak hatue.

¹⁴Kare oloh bawi hamauh dengan Naomi, “Tara akan TUHAN! Ie jari manenga ije biti eso hatue akam andau toh uka mahaga ikau. Keleh anak te jadi oloh basewut intu Israel!

¹⁵Manantum te paham sayang dengam. Ie jari manenga akam labih bara taloh je tau inenga awi uju biti anak hatue. Toh ie jari manenga ije eso hatue kea akam. Ie kareh manenga ampong huang je taheta akam, tuntang mahaga ikau intu wayah kabakasm.”

¹⁶Naomi manduan anak te palus mahagae dengan kasayang je hai.

¹⁷Kare oloh bawi tokep hete manggare anak te Obed. Ewen hamauh akan genep biti, “Naomi jari tempon ije biti anak hatue!” Obed toh je kareh jadi bapa Isai, tuntang Isai iete bapa Dawid.

¹⁸Tuntang toh jereh Dawid, nampara bara Peres, iete: Peres, Hesron, Ram, Aminadab, Nahason, Salmon,[10] Boas, Obed, Isai, Dawid.