Read Ngaju 1 SAMUEL 1 Bible Online

1 SAMUEL 1 - Ngaju bible

1 SAMUEL 1

¹Aton ije biti oloh hatue, arae Elkana, bara suku Epraim. Ie melai intu lewu Rama, intu eka je habukit hong tanah Epraim. Elkana iete anak Yerohan tuntang eson Elihu. Ie bara keluarga Tohu, cabang jalahan Sup.

²Elkana aton due sawae, Hana tuntang Penina. Penina aton anak, tapi Hana jaton.

³Sining nyelo Elkana haguet bara Rama uka sombayang intu Silo tuntang maluput parapahe akan TUHAN Je Jaton Tikas Kuasae. Je jadi imam TUHAN intu Silo iete Hopni tuntang Pinehas, anak Eli.

⁴Sining katika amon Elkana maluput parapah, Penina manduan isin parapah te palus inengae ije kabagi akan genep bitin anake.

⁵Tapi akan Hana ie manenga baya ije kabagi bewei awi [1] TUHAN dia manenga anak akae. Aloh kalote Elkana paham sinta Hana.

⁶Hana harajur ingapehe ateie tuntang inawah Penina, jambuae te, awi TUHAN dia manenga anak akae.

⁷Taloh te manjadi sining nyelo. Amon ewen haguet akan Human TUHAN, harajur Hana ingapehe ateie awi Penina. Kinjap Hana manangis tuntang dia maku kuman tagal inawah awie.

⁸Palus sining katika kea banae Elkana misek, “Mbuhen ikau manangis Hana? Mbuhen ikau dia maku kuman tuntang harajur kapehe ateim? En aku dia labih barega akam bara sapuluh anak hatue?”

⁹Sinde andau limbah ewen kuman intu Human TUHAN hong Silo, Hana harikas bara meja kuman. Katika te, imam Eli je aton kea intu Human TUHAN, metoh mondok intu karosi tokep bauntonggang. Marak paham kapehen ateie Hana balakudoa intu TUHAN sambil manangis side-siden.

¹¹ Limbah te Hana mangotak janji koae, “TUHAN Je Jaton Tikas Kuasae, item rewarm toh! Item kapehen rewarm. Ingat aku tuntang ela ngalapean aku! Amon Ikau manenga akangku ije biti anak hatue, aku hajanji kareh manenga ie Akam hapus pambelome. Aku hajanji kea je balaue dia puji inetek.”[2]

¹²Tahi toto Hana balakudoa, tuntang Eli manantore nyaman oloh bawi te.

¹³Hana balakudoa huang ateie, jadi baya biwihe je hajumit, tapi auhe jaton hining. Awi te Eli manyangka ie babusau.

¹⁴Eli hamauh dengae, “Lalehae ikau babusau intu hetoh! Ela mihop anggor tinai!”

¹⁵Tapi Hana tombah, “Aku dia babusau, aku dia samasinde mihop anggor! Aku nihau kaharapku, tuntang balakudoa manyarita kare kapehengku akan TUHAN.

¹⁶Ela aku toh iitong kilau bawin lontei. Aku balakudoa kilau toh awi aku paham kapehe atei!”

¹⁷Palus koan Eli, “Amon kalote, buli dengan salamat, keleh Hatallan Israel manenga akam taloh je ilakum.”

¹⁸Tombah Hana, “Keleh aku mandino asim.” Limbah te ie haguet palus kuman tuntang ie dia kapehe atei tinai.

¹⁹Andau jewue Elkana tuntang keluargae misik hanjewu; limbah sombayang, ewen buli akan Rama. Elkana hinje dengan Hana, sawae te, tuntang TUHAN manenga taloh je ilaku Hana.

²⁰Oloh bawi te batihi tuntang manak ije biti anak hatue. Ie manggare arae Samuel,[3] koae, “Aku jari balakue bara TUHAN.”

²¹Sampai katikae Elkana tuntang keluargae haguet akan Silo tinai uka maluput parapah sining nyelo akan TUHAN. Beken bara te Elkana jari hajanji uka maluput parapah je ingabeken.

²²Tapi sinde toh Hana dia omba. Koae dengan banae, “Kareh limbah malekak tuso, Samuel iagahku akan Human TUHAN, tuntang ie kareh melai intu hete sampai hapus pambelome.”

²³Tombah Elkana, “Yoh, lalus taloh je inirokm bahalap; keleh melai intu huma sampai jari katikae ikau terai patuso anak itah. Tuntang keleh TUHAN mampatulus janjim[4] Dengae.” Jadi, Hana melai intu huma sampai katikae anake malekak tuso.

²⁴Limbah Samuel terai manuso, ie iagah indue akan Human TUHAN intu Silo. Metoh te ie magon paham korik. Hana mimbit kea ije kongan sapi je umure telo nyelo,[5] gandom sapuluh kilo, tuntang ije kantong upak je kontep basuang anggor.

²⁵Sapi te inyambalih, palus Samuel iagah akan Eli.

²⁶Hana hamauh dengan Eli, “En bapa magon mingat dengangku? Aku toh oloh bawi je puji bapak mitee mendeng intu hetoh, metoh balakudoa intu TUHAN.

²⁷Anak toh anak je ilakuku bara TUHAN. Lakudoangku jari inenga,

²⁸awi te anak toh inyarahku uka jadi ayun TUHAN hapus pambelome.” Limbah te ewen[6] sombayang manyembah TUHAN.