Read Ngaju 1 SAMUEL 10 Bible Online

1 SAMUEL 10 - Ngaju bible

1 SAMUEL 10

¹Limbah te Samuel manduan kandi basuang minyak saitun, palus minyak te inusohe akan hunjun takolok Saul, tuntang inyiume Saul sambil hamauh, “TUHAN jari malantik ikau jadi raja akan ungkupe Israel. Ikau kareh marentah ungkup Ayue tuntang mangalindong ewen bara kare musoh ewen. Jetoh tanda akam je TUHAN jari mintih ikau jadi raja akan ungkup Ayue:[23]

²Limbah ikau malihi aku andau toh, ikau kareh hasondau dengan due biti oloh hatue tokep kubur Rahel intu Selsah hong tanah Benyamin. Ewen kareh hamauh dengam kalotoh: Kare kalidai je inggaum te jari sondau. Toh bapam dia mikeh tinai tahiu kare meto te, tapi ie harajur misek taloh je musti iawie mangat sondau ikau.”

³Samuel hamauh tinai, “Bara hete ikau kareh mananjong palus sampai akan batang kayu eka sombayang intu Tabor. Intu hete ikau kareh hasondau dengan telo biti oloh hatue je metoh te manintu Betel uka maluput parapahe akan Hatalla. Ije biti mimbit telo kongan anak kambing, ije biti tinai mimbit telo rote, tuntang ije biti tinai mimbit kantong upak meto basuang anggor.

⁴Ewen kareh manabe ikau tuntang ikau kareh inengae due rote je musti inarimam.

⁵Limbah te ikau musti akan bukit Hatalla intu Gibea, eka kare kemah oloh Pilistin. Intu lawang lewu ikau kareh hasondau dengan ije kakawan nabi je mohon bara bukit parapah. Ewen manari-nari tuntang mangkariak, mampahiau gambus, tarabang, suling tuntang kacapi.

⁶Metoh te kea ikau iname awi Roh TUHAN tuntang ikau kareh omba manari tuntang mangkariak kilau ewen te. Palus ikau inenga sipat taheta tuntang jadi olon je beken.

⁷Amon kakare taloh te manjadi, lalus kare taloh je ingkemem bahalap, awi TUHAN aton mampahayak ikau.

⁸Limbah te ikau musti haguet akan Gilgal tuntang mentai intu hete uju andau katahie. Kareh aku dumah uka maluput parapah je ingehu tuntang parapah hapa badamai, tuntang mansanan akam kare taloh je musti ikau malaluse.”

⁹Sana Saul malihi Samuel, Saul manarima sipat taheta bara Hatalla. Tuntang uras taloh je insanan Samuel akae manjadi kea andau te.

¹⁰Metoh Saul tuntang pelayae sampai Gibea, ewen hasondau dengan ije kakawan nabi. Hong katika te kea Saul iname awi Roh Hatalla, tuntang omba manari tuntang kariak kare nabi te.

¹¹Kare oloh je jari tahi kasene ie, mite gawie te, palus ewen hisek sama arepe koae, “En je jari manjadi dengan anak Kis te? En Saul kea jadi nabi?”

¹² Palus oloh je melai hete misek, “Kilen dengan kare nabi je beken te, manumon koan keton, eweh bapa ewen?” Jete tamparan paribasa toh, “En Saul kea jadi nabi?”

¹³Limbah Saul jari terai manari tuntang mangkariak, ie haguet akan mesbeh intu hunjun bukit.

¹⁴Mama Saul mite ie dengan pelayae, palus misek dengan ewen, “Bara kueh keton?” Tombah Saul, “Manggau kalidai je nihau te, tuntang awi ikei dia olih sondaue ikei haguet manalih Samuel.”

¹⁵“En je insanae akan keton?” koan mamae misek.

¹⁶Saul tombah, “Ie mansanan je kare meto te jari sondau.” Tapi Saul dia manyarita akan mamae je ie jari indudus jadi raja awi Samuel.

¹⁷Samuel mantehau rayat Israel uka hapumpong intu Mispa.

¹⁸Ie hamauh tinai dengan ewen, “Jetoh je insanan TUHAN, Hatallan Israel, ‘Aku jari mimbit keton balua bara Misir tuntang bara kakare bangsa beken je manjake keton.

¹⁹Aku jari malapas keton bara kare kapehe tuntang kajake, tapi toh keton jari manolak Aku, Hatallan keton, awi keton balaku mangat Aku manunjuk ije biti raja akan keton. Yoh, keleh hapumpong intu taharep-Ku, TUHAN keton, manumon suku tuntang jalahan keton.’ ”

²⁰Palus Samuel manyoho kakare suku miar akan baun tuntang suku Benyamin je buah intih.

²¹Metoh kare keluarga suku Benyamin te inyoho maju akan baun, maka keluarga Matri je buah intih. Kajariae kare oloh hatue hong keluarga Matri palus maju,[24] tuntang Saul anak Kis je buah intih. Palus ewen manggau Saul, tapi ie jaton.

²²Awi te kare oloh misek dengan TUHAN, “O TUHAN, en oloh te aton intu hetoh?” Tombah TUHAN, “Saul manyahokan arepe intu likut kare ramon pakakas.”

²³Palus ewen bajeleng manduan Saul bara hete, tuntang mimbit ie akan bentok oloh are. Palus Saul mendeng marak ewen tuntang ie te je pangkagantonge; oloh beken baya sampai hunjun bahae.

²⁴Limbah te Samuel hamauh dengan rayat, “Toh ie oloh je intih TUHAN, jaton ije biti oloh je tau jadi tandinge intu taharep itah samandiai.” Hapus bangsa te malahap, “Belom raja!”

²⁵Limbah te Samuel manarang akan bangsa te tahiu hak tuntang kapatut gawin raja. Jete inyurate intu huang kare buku je iingkes intu eka je barasih. Limbah te Samuel manyoho hapus bangsa te sama buli rata akan human ayu-ayue.

²⁶Saul kea buli akan humae intu Gibea, impahayak awi pire-pire oloh je mamot menteng[25] je jari inggerek ataie awi TUHAN.

²⁷Tapi pire-pire oloh papa hamauh, “Kilen tau oloh toh kareh baguna akan itah?” Ewen manawah Saul tuntang dia manyarah panenga akae. Tapi ie pura-pura dia katawan.