Read Ngaju 1 SAMUEL 11 Bible Online

1 SAMUEL 11 - Ngaju bible

1 SAMUEL 11

¹Limbah te Nahas, raja Amon, mimbit tantarae palus mangapong lewu Yabes intu tanah Gilead. Oloh lewu Yabes mawi usul kalotoh akan Nahas, “Tampa janji akan ikei kareh ikei mamenda keton.”

²Nahas tombah, “Hapan auh kalotoh aku mawi janji, ‘Gagenep mata gantaum kareh ingaruit hapa mampahawen hapus Israel.’ ”

³Limbah te kare pamimpin lewu Yabes tombah, “Ikei balaku tempo katahin uju andau uka ikei tau mampait sarohan akan hapus tanah Israel, amon jaton je maku mandohop ikei, te ikei kareh manyarah arep ikei akan keton.”

⁴Kalote kare sarohan te sampai intu Gibea, eka Saul melai. Metoh ewen manyampai kabar te, rayat palus manangis awi nihau kaharape.

⁵Metoh te Saul harue ih dumah bara tanae hayak mimbit sapie. Palus ie misek, “Narai nah? Mbuhen oloh uras manangis?” Ewen balalu mansanan kabar je iimbit awi sarohan bara Yabes te.

⁶Mahining auh te Saul inguasa awi Roh Hatalae.

⁷Marak kasangite ie manduan due kongan sapi palus inasange sampai are ragae. Limbah te kare ragan sapi te ingirime akan hapus tanah Israel dengan parentah kalotoh, “Eweh je dia maju parang omba Saul tuntang Samuel, kare sapie kareh inasang kilau toh kea.” Bangsa Israel mikeh dengan taloh je tau iawi TUHAN, awi te hapus bitie jaton ije je dia, tatap maju akan parang haya-hayak.

⁸Ewen imumpong tuntang ireken awi Besek: Aton 300.000 oloh Israel, tuntang 30.000 oloh Yuda.

⁹Limbah te, akan sarohan bara Yabes insuman kalotoh, “Sanan akan oloh lewu Yabes, iete hanjewu jewu helo bara bentok andau, ewen kareh mandino pandohop.” Katika oloh lewu Yabes manarima peteh te, ewen paham sanang.

¹⁰Koan ewen dengan Nahas, “Jewu ewen manyarah tuntang tau ikau mawi ewen tumon kahandakm.”

¹¹Hanjewu jewue, Saul mambagi kare oloh ayue manjadi telo pasukan. Tuntang metoh matanandau handak lembut ewen manyarang akan bentok kare kemah oloh Amon te tuntang mantakan ewen. Sahindai bentok andau, tantara Saul jari mampakalah musoh. Kare oloh Amon je olih lapas, kasaburan sampai jaton due biti je tau hadari haya-hayak.

¹²Limbah te bangsa Israel misek dengan Samuel, “Hong kueh kare oloh je endau bahanyi mansanan je Saul dia patut jadi rajan itah? Keleh bapa manyarahe akan ikei, mangat ikei mampateie.”

¹³Tapi Saul tombah, “Ije biti mahin dia tau impatei andau toh, awi andau toh TUHAN jari manyalamat Israel.”

¹⁴Palus Samuel hamauh dengan ewen, “Keleh itah uras haguet akan Gilgal tuntang mandehen Saul jadi rajan itah.”

¹⁵Tumon te ewen uras haguet akan Gilgal, tuntang hong eka sombayang te Saul indehen kilau raja. Ewen maluput parapah hapa badamai, tuntang Saul dengan hapus bangsa Israel mahaga kajadian te.