Read Ngaju 1 SAMUEL 12 Bible Online

1 SAMUEL 12 - Ngaju bible

1 SAMUEL 12

¹Palus Samuel hamauh dengan hapus bangsa Israel, “Aku jari manggenep hapus palakun keton tuntang mangkat ije biti raja akan keton.

²Nampara bara katika toh ie te je kareh je mamimpin keton. Item aku jari bakas tuntang howan. Aku jari tahi toto mamimpin keton, bara metoh aku tabela sampai toh. Tandae ie te kare anakku je jari hai te.

³Toh aku mendeng intu taharep keton! Amon aku jari malalus kasalan, dawa aku intu taharep TUHAN tuntang intu taharep raja je iintihe. En puji aku manduan sapi atawa kalidai oloh beken? En puji aku manipu atawa manjake atawa manarima duit suap? Sanan, mangat taloh je jari induangku te aku tau maliae.

⁴Kare oloh te tombah, “Dia, dia puji bapa manipu atawa manjake ikei; dia puji bapa manduan taloh en-en bara eweh bewei.”

⁵Palus Samuel hamauh, “Hong andau toh TUHAN tuntang raja je iintihe jadi saksi je aku puna jaton bara kasalan samasinde.” “Yoh, toto, TUHAN jadi saksin itah,” tombah ewen.

⁶ Palus Samuel hamauh tinai, “TUHAN je mintih Moses tuntang Aron tuntang jari mimbit tato hiang keton balua bara tanah Misir.

⁷Toh ela harikas helo. Aku handak mandawa keton intu taharep TUHAN. Ingat[26] hapus asin TUHAN je jari imparahae akan keton tuntang akan tato hiang keton.

⁸ Metoh Yakob tuntang keluargae balua bara Misir, tuntang oloh Misir manjake ewen,[27] tato hiang keton balaku dohop dengan TUHAN, palus TUHAN mangirim Moses tuntang Aron. Due oloh te mimbit tato hiang keton balua bara Misir tuntang mandohop ewen manetep intu lewu toh.

⁹ Tapi limbah te ewen mangalapean TUHAN, Hatallan ewen, tagal te Ie manalua ewen inyarang tuntang impakalah awi Sisera, pangkalima tantara intu Hasor, tuntang awi oloh Pilistin dengan raja Moab.

¹⁰ Limbah te ewen balakudoa intu TUHAN tuntang mangaku dosan ewen. Koan ewen, ‘Ikei jari badosa awi mules manalikut Ikau, o TUHAN, tuntang manyembah kare hampatong dewa Baal tuntang Astoret. Tapi toh nyalamat ikei bara musoh ikei, te ikei kareh manempo Ikau!’ ”

¹¹ Limbah te TUHAN manyoho Gideon, limbah te Barak,[28] limbah te Yepta, tuntang kajariae aku. Genep bitin ikei jari malapas keton bara musoh keton, sampai keton tau belom huang kasanang.

¹² Tapi katika keton mite je keton handak inyarang awi Nahas raja Amon, keton manolak TUHAN kilau rajan keton tuntang hamauh dengangku, ‘Ikei handak irentah awi ije biti raja.’ ”

¹³“Toh ite, jetoh ie, raja je intih keton te. Keton jari balakue, tuntang TUHAN jari manengae akan keton.

¹⁴Salamat keton amon keton mahormat TUHAN, tuntang manempo Ie, hayak mahining tuntang manumon parentah Aie, mahin tinai amon keton tuntang rajan keton te toto baketep dengan TUHAN Hatallan keton.

¹⁵Tapi amon keton dia mahining auh TUHAN, tapi malawan parentah Aie haream, pasti keton tuntang rajan keton[29] akan ilawan TUHAN.

¹⁶Toh, hining tinai jetoh! Keleh manantuani taloh heran je hai je ilalus TUHAN intu taharep matan keton.

¹⁷Aku handak mantehau TUHAN, tuntang aloh metoh toh wayah pandang, TUHAN akan mampamohon nyahu tuntang ujan kilau tanda panombahe akan lakudoangku. Hong katika te, keton akan katawan ampin kahain dosan keton dengan TUHAN awi keton balaku ije biti raja.”

¹⁸Samuel balalu balakudoa, tuntang hong andau te kea TUHAN mampamohon nyaho tuntang ujan. Hapus bangsa te balalu mikeh dengan TUHAN tuntang dengan Samuel.

¹⁹Palus ewen hamauh dengan Samuel, “Dohop, Bapa, keleh balakudoa intu TUHAN te akan ikei, mangat ikei dia matei. Toh ikei katawan, bihin ikei jari badosa, toh ikei badosa tinai awi balaku ije biti raja.”

²⁰Samuel palus tombah, “Ela mikeh, aloh keton jari mawi kapapa te, ela manalikut TUHAN, tapi keleh baketep manempo Ie hapan salepah atei keton.

²¹Ela keton omba kare dewa je dia tau mandohop tuntang dia tau manyalamat keton, awi huang katotoe ewen te puna jaton.

²²TUHAN jari sumpah, Ie dia akan malihi keton awi Ie jari mamutus uka manduan keton manjadi oloh Ayue kabuat.

²³Tahiu bitin ayungku, keleh ah jaka tau aku toh ela sampai badosa intu taharep TUHAN awi dia balakudoa akan keton. Aku toh puna tantai handak majar keton raju-rajur tahiu kare hal je bahalap tuntang bujur.

²⁴Keleh mahormat TUHAN tuntang manempo Ie huang kaketep tuntang hapan salepah atei keton. Keleh mingat tahiu kare gawi hai je jari ilalus Awie akan keton.

²⁵Tapi amon keton mawi dosa raju-rajur, maka keton tuntang rajan keton akan binasa.”