Read Ngaju 1 SAMUEL 13 Bible Online

1 SAMUEL 13 - Ngaju bible

1 SAMUEL 13

¹Hong sinde andau, limbah Saul manjadi raja,[30]

²ie mintih 3.000 oloh Israel; 2.000 bara kare ewen te melai omba dengae hong Mikhmas tuntang hong eka je habukit hong tanah Betel, tuntang 1.000 je beken tinai haguet dengan Yonatan, anake, akan Gibea, hong tanah suku Benyamin. Kalabien kare oloh je aton hete inyohoe buli genep bitie akan human ayu-ayue.

³Limbah te Yonatan mampatei pangkalima Pilistin je hong Gibea, tuntang bangsa Pilistin[31] mahining tahiu hal te. Palus Saul manyoho mampahiau tarompet hong hapus lewu uka mantehau oloh Ibrani mangat maju parang.

⁴Akan hapus bangsa Israel insanan je Saul jari mampatei pangkalima Pilistin te tuntang oloh Pilistin paham basingi dengan Israel. Tagal te rayat manumon auh pantehau uka omba auh pantehau Saul hong Gilgal.

⁵Pandehan te oloh Pilistin jari kumpul kea uka manyarang oloh Israel; ain ewen aton 30.000[32] kareta parang, 6.000 oloh manungkang kuda, tuntang kare tantarae sama karee kilau pasir saran tasik. Ewen mampendeng kemahe intu Mikhmas hong hila timor Bet-Awen.

⁶Limbah te ewen manyarang oloh Israel hapan kasiak ampie, sampai oloh Israel mangkeme jake. Belahe oloh Israel manyahokan arepe intu goha tuntang hungkap bukit atawa hong kare helat batu karang, atawa huang kalin danum atawa rombak petak.

⁷Aton kea je dimpah Sungei Yordan tuntang tame akan tanah Gad tuntang Gilead. Saul magon intu Gilgal, tuntang rayat je omba ie hakitik hagenjeh mikeh.

⁸ Saul mentai Samuel uju andau katahie, tumon peteh Saul akae, tapi Samuel hindai kea sampai Gilgal, padahal Saul nampara ilihi rayate.

⁹Awi te ie hamauh dengan ewen, “Imbit akan hetoh parapah je ingehu tuntang parapah hapa badamai te.” Palus ie kabuat maluput parapah je ingehu te.

¹⁰Tapi pas limbah ie malaluse, Samuel dumah. Saul manambang ie handak manabe ie,

¹¹tapi Samuel misek, “En je jari iawim raja?” Tombah Saul, “Aku mite je rayat nampara malihi aku, padahal bapa dia dumah hong katika je inantu bapa. Mahin tinai, oloh Pilistin jari hapumpong intu Mikhmas.

¹²Palus tirokku, ela-ela tantara Pilistin hanjulo tinai manyarang aku intu hetoh hong Gilgal, padahal aku hindai balaku asin TUHAN. Awi te aku manukas uka maluput parapah te.”

¹³Mahining auh te Samuel hamauh dengan Saul, “Gawin raja te humong toto. Amon raja manumon parentah TUHAN Hatalla akan raja, pasti TUHAN kareh manukas uka raja tuntang turonan raja manjadi raja Israel sampai katatahie.

¹⁴ Tapi toh pamarentah ain raja kareh dia tahi. Awi raja dia tumon parentah TUHAN, maka TUHAN mintih oloh beken je eka kahandak Aie uka iangkat jadi raja akan ungkup Ayue.”

¹⁵Limbah te Samuel malihi Gilgal tuntang marajur pangguete akan Gibea intu tanah Benyamin. Pandehan te Saul mariksa pasukae, karee aton kira-kira 600 biti.

¹⁶Kalote Saul tuntang Yonatan anake, tuntang kare oloh ayun ewen mampendeng kemah intu Geba hong tanah Benyamin; tuntang oloh Pilistin mampendeng kemah intu Mikhmas.

¹⁷Metoh te kea telo kawan rampok Pilistin haguet bara eka kemah Pilistin handak marampok. Kawan je ije haguet manintu Opra hong tanah Sual.

¹⁸Kawan je kaduee manintu Bet-Horon; kawan je ijee tinai manintu akan watas tanah je manintu janah Seboim hong padang pasir.

¹⁹Intu hapus Israel jaton ije biti oloh je nguan gawi jadi tukang sanaman, awi oloh Pilistin dia manyoho oloh Ibrani manampa padang tuntang lunju.

²⁰Jadi, oloh Israel musti manalih oloh Pilistin amon handak maninih isin lukue, cangkule, kapake tuntang pisaue.[33]

²¹Upahe iete ije kabawak duit korik hapan maninih kapak tuntang mangambuah isin bajak je iahapan sapi,[34] tuntang due kabawak duit korik akan maninih isin luku tuntang cangkul.

²²Jete bukue hong andau parang intu Mikhmas te, jaton ije bara rayat Israel aton padang atawa lunju, beken bara Saul tuntang Yonatan anake.

²³Oloh Pilistin mampendeng ije pos eka jaga akan manjaga ije bowos helat bukit intu Mikhmas.