Read Ngaju 1 SAMUEL 15 Bible Online

1 SAMUEL 15 - Ngaju bible

1 SAMUEL 15

¹ Sinde andau Samuel hamauh dengan Saul, “TUHAN bewei je manyoho aku malantik oloh manjadi rajan Israel ungkup Ayue. Awi te keleh raja mahining parentah TUHAN Je Paham Kuasae.

² Ie kareh mahukum oloh Amalek awi tato hiang ewen malawan oloh Israel katika oloh Israel dumah bara Misir.

³Jadi lius, nyarang oloh Amalek tuntang pahancor kakare taloh je ayun ewen. Ela malihi taloh en-en; patei uras oloh hatue, bawi, anak oloh tuntang anak awau; kare sapi, tabiri, onta tuntang kalidai kea.”

⁴Palus Saul manatap tantarae tuntang misee intu Telaim; aton 200.000 biti tantara bara Israel tuntang 10.000 biti bara Yuda.

⁵Limbah te Saul haguet haya-hayak dengan oloh ayue akan lewu Amalek tuntang mimpa musoh intu ruak sungei je keang.

⁶Ie kea mangirim auh pampingat akan oloh Keni koae, “Lius lihi oloh Amalek, mangat ikau ela tamput impalomosku hayak ewen, awi bihin tato hiang keton jari mamparahan gawi hasobat dengan oloh Israel metoh oloh Israel dumah bara Misir.” Palus oloh Keni haguet bara hete.

⁷Limbah te Saul parang mawi oloh Amalek, tuntang mampakalah ewen hapus jalan bara Hawila sampai akan Asur intu hila timor Misir.

⁸Hapus rayat tuntang tantara Amalek inawan tuntang inalua belom awi Saul tuntang tantarae; kalote kea tabiri tuntang sapi je pangkahalape, anak sapi tuntang anak tabiri je baseput,[46] tuntang kakare taloh je barega; baya meto je dia baguna tuntang je dia barega[47] ih je imbinasa.

¹⁰Palus TUHAN hamauh dengan Samuel,

¹¹“Aku manyasal jari mangkat Saul jadi raja, awi ie jari mules bara Aku, tuntang dia malalus parentah-Ku.” Samuel pehe atei tuntang hapus alem ie bakotok dengan TUHAN.

¹²Hanjewu jewue, Samuel haguet handak manyondau Saul. Oloh mansanan akae je Saul te jari haguet akan lewu Karmel mangat mampendeng batu pampingat akan arepe intu hete, palus akan Gilgal.

¹³Metoh Samuel hasondau dengan Saul, Saul hamauh dengae, “Keleh TUHAN mamberkat Bapa! Aku jari malalus parentah TUHAN.”

¹⁴Tapi Samuel misek, “Amon kalote, mbuhen aku aton mahining auh tahaseng sapi tuntang anak tabiri?”

¹⁵Tombah Saul, “Kare meto te rampasan bara oloh Amalek. Tabiri tuntang sapi je paling bahalap jari induan rayat akan iluput kilau parapah akan TUHAN Hatallan Bapa. Tapi kalabiee jari imbinasa samasinde.”[48]

¹⁶Mahining auh te Samuel hamauh, “Entai hanjulo, aku kareh mansanan taloh je imeteh Hatalla akangku alem endau.” “Sanan” koan Saul.

¹⁷Samuel hamauh, “En dia raja jadi kilau pamimpin akan kare suku oloh Israel, aloh raja mitong arepe dia baguna? Tuan raja jari iintih TUHAN jadi raja akan Israel.

¹⁸Tinai raja inyoho TUHAN mampalomos oloh Amalek je papa te. Tuan raja inyoho parang malawan ewen sampai ewen lepah lingis.

¹⁹Mbuhen raja dia manumon parentah TUHAN? Mbuhen raja rami-rami manduan ramo rampasan, tuntang kalote raja mawi kalait TUHAN?”

²⁰Saul tombah, “Aku jari manumon parentah TUHAN, tuntang jari haguet parang tumon sohon Aie akangku; Agag raja Amalek jadi tawanangku tuntang uras oloh Amalek jari impateiku.

²¹Tapi oloh ayungku dia mampatei uras meto; ewen jari mintih tabiri tuntang sapi je paling bahalap bara hasil rampasan te akan iluput indu parapah akan TUHAN Hatallan Bapa intu Gilgal.”

²²Tapi Samuel hamauh, “Kueh je labih ingilak TUHAN, manumon parentah atawa parapah? Manumon parentah TUHAN labih bahalap bara maluput parapah. Manumon parentah labih bahalap bara enyak tabiri.

²³Awi malawan TUHAN sama kapapae kilau batabit atawa jadi tukang seher, tuntang atei je balecak sama kapapae dengan manyembah dewa. Awi raja jari malawan parentah TUHAN, TUHAN kea dia mangaku raja tinai kilau raja.”

²⁴Mahining auh te Saul mangaku intu taharep Samuel koae, “Punae aku jari badosa. Aku malangkah parentah TUHAN tuntang manalua atoh bapak. Aku mikeh dengan oloh ayungku, palus ilulusku palakun ewen.

²⁵Tapi toh aku balaku dengan bapak, ampun dosangku tuntang keleh haluli buli haya-hayak dengangku akan Gilgal, mangat aku tau sombayang.”

²⁶Tapi Samuel tombah, “Aku dia maku haluli haya-hayak dengan raja. Tuan raja jari malawan parentah TUHAN, tuntang toh ie dia mangaku raja tinai kilau rajan Israel.”

²⁷Palus Samuel mules arepe handak haguet, tapi Saul manahan ie sambil mimbing jubahe, sampai jubah te barabit.

²⁸Palus Samuel hamauh dengae, “Andau toh TUHAN jari marabit karajaan Israel bara lengen raja, tuntang manenga akan oloh beken je labih bahalap bara raja.

²⁹Ie Je Hai, Hatallan Israel, dia mananjaro tuntang dia kea mobah tiroke, awi ie dia olon.”

³⁰Saul tombah, “Aku jari badosa. Tapi dohop pak, keleh haluli haya-hayak dengangku mangat aku tau sombayang intu TUHAN Hatallan Bapa. Tumon te bapak mahormat aku intu taharep kare pamimpin bangsaku tuntang intu taharep hapus bangsa Israel.”

³¹Maka Samuel haluli haya-hayak dengae akan Gilgal, tuntang Saul sombayang.

³²Limbah te Samuel marentah, “Imbit raja Agag kahetoh,” Agag manalih ie dengan kontep kaharap awi ie manirok, “Bahaya pampatei jari halau.”[49]

³³Palus Samuel hamauh, “Kilau padangm jari mawi are indu oloh je nihau anake, tumon te kea indum kareh kea nihau anake.” Palus Samuel manasang Agag intu baun mesbeh hong Gilgal.

³⁴Limbah te Samuel haguet akan Rama, tuntang raja Saul buli akan humae intu Gibea.

³⁵Sampai lawin pambelome Samuel dia hasondau tinai dengan Saul. Tapi Samuel pehe atei awi TUHAN manyasal mangkat Saul jadi raja Israel.