Read Ngaju 1 SAMUEL 17 Bible Online

1 SAMUEL 17 - Ngaju bible

1 SAMUEL 17

¹Sinde katika oloh Pilistin mimbit tantarae uka maju parang. Ewen mator barisae intu lewu Sokho, huang tanah Yuda tuntang mampendeng kemahe helat Sokho dengan Aseka, tokep Epes-Damim.

²Saul tuntang kare oloh Israel hapumpong kea tuntang mampendeng kemahe intu Janah Ela; ewen tatap uka manaharep sarangan oloh Pilistin.

³Kalote ampie barisan oloh Pilistin mendeng intu ije bukit tuntang barisan oloh Israel intu bukit je beken, tuntang intu helate aton ije janah.

⁴Aton ije jagau kalahi je arae Goliat, bara lewu Gat, balua bara eka kare kemah oloh Pilistin uka manantang oloh Israel. Kagantong bitie kira-kira telo meter,[50]

⁵ie mahapan salutop tambaga tuntang baju parang bara tambaga je ehate kira-kira lime puluh uju kilogram.

⁶Paie ingalukop awi panutup pai bara tambaga, tuntang intu hunjun bahae ie mumah lunju tambaga.

⁷Tantahan lunjue kahai buntis, tuntang isin lunjue kira-kira uju kilogram ehate. Ije tantara mananjong intu hila baue mimbit talawange.

⁸Goliat tende palus mantehau kare tantara Israel, “Kanjeran mawi en keton hikau nah? En keton handak parang? O kare jipen Saul, aku toh ije biti oloh Pilistin! Intih ije biti bara keton je bahanyi mohon hatampar malawan aku.

⁹Amon huang hado kagancang te aku matei, ikei pahias jadi jipen keton, tapi amon aku manang tuntang mampatei ie, keton je kareh jadi jipen ikei.

¹⁰Toh kea, aku handak bahado dengan tantara Israel; intih ije biti uka bahado malawan aku!”

¹¹Metoh Saul tuntang kare oloh ayue mahining auh te, ewen tarewen tuntang paham mikeh.

¹²Dawid te anak Isai oloh Eprata, bara Betlehem intu Yudea. Isai aton hanya biti anak hatue, tuntang intu jaman Saul marentah Isai jari bakas toto.[51]

¹³Telo anak Isai je tambakase jari haguet akan parang omba Saul. Je bakas arae Eliab, je kaduee Abinadab, tuntang je kateloe Sama.

¹⁴Dawid te anake je busu. Metoh telo kakae je bakas te kanjerae parang omba Saul,

¹⁵Dawid kinjap malihi Saul tuntang buli akan Betlehem uka manyakatik tabirin bapae.

¹⁶Katahin epat puluh andau, sining hanjewu tuntang halemei, Goliat manokep barisan oloh Israel tuntang mimbit ewen hado kagancang.

¹⁷Sinde andau Isai hakotak dengan Dawid, “Duan sapuluh kilogram papui jagung tuntang sapuluh rote toh, imbit akan ewen kakam intu eka kare kemah tantara.

¹⁸Imbit kea sapuluh keju toh akan pangkalima pasukan. Isek kilen ampin kare kakam, tuntang imbit tandae akangku je ikau jari hasondau dengan ewen tuntang je ewen magon salamat.

¹⁹Ewen aton intu janah Ela omba Saul, tuntang kakare oloh Israel kanjerae parang malawan oloh Pilistin.”

²⁰Hanjewu jewue, Dawid misik palus manatap arepe. Tabirie imepelaie dengan ije biti oloh je tukang manjagae. Limbah te ie manduan taloh koae palus haguet, tumon parentah bapae. Ie sampai eka kare kemah metoh oloh Israel haguet akan eka parang sambil malahap handak parang.

²¹Tantara Pilistin tuntang tantara Israel sama hataharep tuntang tata-tatap hakajera.

²²Palus Dawid mampelai taloh je iimbite te akan oloh je tukang jaga pakakas tantara, tuntang hadari akan eka parang mangat manyondau kare kakae.

²³Tapi katika ie metohe hakotak dengan ewen, Goliat maju akan baun tuntang mimbit hado kagancang dengan oloh Israel, kilau je bahut kinjap ie mawie. Dawid kea mahining kare auh te.

²⁴Sana oloh Israel mite Goliat, ewen hadari awi mikeh.

²⁵“Item ie!” koan ewen urase. “Hining kare auhe mimbit itah hado kagancang! Saul rajan itah jari hajanji eweh bewei je olih mampatei Goliat, kareh inegae taloh tenga je hai. Raja kea mangawin oloh te dengan anake je bawi. Tuntang keluarga bapa oloh te kareh dia usah mambayar pajak.”[52]

²⁶Palus Dawid hamauh, “Bahanyi toto oloh Pilistin je kapir te manawah tantara ain Hatalla je belom!” Limbah te ie misek dengan ije bara kare tantara te, “En kareh je inenga raja akan oloh je tau mampatei oloh Pilistin tuntang manganan kahawen bara bangsa Israel?”

²⁷Rayat mansanan akae taloh je jari injanji raja.

²⁸Eliab kaka Dawid je bakas mahining Dawid hamauh dengan kare tantara te. Ie malait Dawid tuntang hamauh, “Kilen ikau dumah akan hetoh? Eweh je jari inyohom manantuani kare tabirim je pire-pire kongan te intu padang pasir? Aku katawan ikau baya pura-pura bahanyi; ikau dumah akan hetoh baya handak mite oloh hakajera ih dia?”

²⁹Tombah Dawid, “En kasalangku? Aku toh baya misek!”

³⁰Palus ie haguet bara hete tuntang misek taloh je kilau te kea dengan tantara je beken; tuntang ie mandino panombah je sama auhe kilau te kea.

³¹Tapi pire-pire biti oloh je mahining auh Dawid, mayampai jete akan Saul. Palus Dawid intehau manaharep raja.

³²Koan Dawid dengan Saul, “Tuan raja, itah dia usah mikeh dengan oloh Pilistin te! Aku jari tatap handak malawan ie.”

³³“Ela,” tombah Saul. “Kilen ampie ikau tau bahado dengae? Ikau magon tabela toto, tapi ie jari kanjeran kagancange tuntang patoh parang bara katabelae.”

³⁴Tapi Dawid hamauh, “Tuan raja, rewarm toh jari patuh manyakatik tabirin bapa rewarm. Amon aton singa atawa bahuang dumah manangkarap tabiri,

³⁵meto basiak inggoangku tuntang iawiku, palus tabiri te inyalamatku. Tuntang amon singa atawa bahuang te malawan aku, maka aku mimbing janggute, palus aku mamantu ie sampai matei.

³⁶Aku jari mampatei singa tuntang bahuang, tuntang oloh Pilistin je kapir te kea kareh sama kilau meto te, awi ie bahanyi mampahawen tantara ain Hatalla je belom.

³⁷TUHAN jari manyalamat aku bara singa tuntang bahuang, ie kea kareh manyalamat aku bara oloh Pilistin te.” Palus koan Saul dengae, “Yoh, keleh TUHAN mandohop ikau.”

³⁸Saul manenga pakaian parange, iete ije baju sanaman akan Dawid tuntang Dawid mangkepae. Palus Saul mangkepan salutop tambaga intu takolok Dawid.

³⁹Kajariae Dawid manangking padang Saul intu kahange je habaju sanaman te tuntang handak mananjong, tapi dia tau, awi Dawid dia patuh mahapan pakaian parang. “Aku dia tau mananjong mahapan pakaian toh,” koae dengan Saul. “Aku dia tau mahapae.” Palus lepah pakaian parang te iengkake.

⁴⁰Limbah te ie manduan tongkeh sakatike, tuntang mintih lime kabawak batu je bonter bara sungei, palus inameae akan huang kantonge. Tali pamanting batu aton intu lengee, palus ie haguet manyondau Goliat.

⁴¹Pire-pire katahie limbah te Goliat dengan oloh je meton talawange intu hila baun, nampara mananjong manokep Dawid.

⁴²Tapi metoh ie mite Dawid tuntang mananturee, Goliat tatawe manawah ie awi Dawid magon tabela toto tuntang bakena.

⁴³Koan Goliat dengan Dawid, “Kandue tongkeh te? En nyewutm aku toh aso?” Palus Dawid inyapae huang aran kare dewae.

⁴⁴Tinai ie manyoho Dawid manokep koae, “Ayo maju! Kareh bitim inegaku akan panginan burong tuntang meto.”

⁴⁵Tapi Dawid tombah, “Ikau dumah malawan aku hapan padang, lunju tuntang tirok, tapi aku dumah malawan ikau hapan aran TUHAN je Paham Kuasae, Hatallan tantara Israel je inawahm te.

⁴⁶Andau toh kea TUHAN kareh manyarah ikau akangku. Ikau kareh impakalahku tuntang takolokm kareh inetekku. Bitim tuntang kare tantara Pilistin kareh inengaku akan burong tuntang meto akan kinae. Hapus kalunen kareh katawan je ikei bangsa Israel toh aton Hatalla je inyembah ikei.

⁴⁷Tuntang uras oloh intu hetoh kareh mite je TUHAN dia mahapan padang atawa lunju uka manyalamat ungkup Ayue. Ie je manukas ampin kamiar parang toh tuntang ie kareh manyarah keton akan huang lengen ikei.”

⁴⁸Goliat nampara miar manokep Dawid, palus Dawid bajeleng hadari manintu barisan oloh Pilistin akan manaharep ie.

⁴⁹Dawid mukot kantonge, manduan ije kabawak batu palus manyun batu te manintu Goliat. Batu te mantakan lingkau Goliat sampai pusit bangon takoloke, tuntang ie balongkang tasombau akan petak.

⁵⁰Dawid hadari manalih Goliat, palus mendeng tokep ie; ie manduan padang Goliat tuntang manjawute bara kumpange, palus manetek takolok oloh Pilistin te. Kalote Dawid mampakalah tuntang mampatei Goliat, baya mahapan tali pamanting tuntang batu! Metoh kare oloh Pilistin mite je oloh menteng ain ewen jari matei, ewen hadari.

⁵¹

⁵²Kare oloh Israel tuntang suku Yuda basasurak tuntang manggoang kare oloh Pilistin sampai akan Gat[53] tuntang lawang Ekron. Kare oloh Pilistin je bahimang hakalampah hapus jalan akan Saaraim te!

⁵³Limbah te oloh Israel haluli bara gawi manggoang oloh Pilistin, palus marampas taloh bara huang kare kemah ewen.

⁵⁴Dawid manduan takolok Goliat, tuntang mimbite akan Yerusalem, tapi kare pakakas parang ain Goliat iingkese intu huang kemah ayue kabuat.

⁵⁵Metoh Saul mite Dawid haguet malawan Goliat, ie misek dengan Abner pangkalima tantarae, “Abner, anak eweh ie?” “Aku dia katawan, tuan raja,” tombah Abner.

⁵⁶Palus koan parentah Saul, “Lius, isek taloh te.”

⁵⁷Jadi metoh Dawid haluli akan eka kare kemah limbah mampatei Goliat, ie iimbit Abner manaharep Saul. Dawid magon mimbit takolok Goliat.

⁵⁸Palus Saul misek ie, “O anak tabela! Anak eweh ikau?” Dawid tombah, “Aku toh anak Isai bara Betlehem.”