Read Ngaju 1 SAMUEL 18 Bible Online

1 SAMUEL 18 - Ngaju bible

1 SAMUEL 18

¹Limbah Saul tuntang Dawid jari tende hakotak, Dawid iangkat awi Saul jadi pagawaie; bara andau te ie dia inyoho buli akan human oloh bakase. Yonatan anak Saul, jari mahining auh kotak te. Ie rajin kea dengan Dawid, tuntang sinta ie kilau arepe kabuat.

³Tagal te Yonatan sumpah handak hasobat dengan Dawid sampai katatahie.

⁴Yonatan mengkak jubahe palus inengae akan Dawid, kalote kea pakaian parange hayak padange, panahe tuntang peteng kahange.

⁵Dawid jari malalus kare gawi je inyoho Saul dengan bahalap. Awi te ie iangkat Saul jadi pangkalima tantarae, tuntang Dawid eka karajin kare tantara tuntang awi kare oloh ain Saul.

⁶Metoh Dawid haluli limbah mampakalah Goliat oloh Pilistin te, tuntang kare tantara babaris tame akan huang lewu, kare oloh bawi balua hapus lewu intu Israel uka manambang raja Saul. Ewen manyanyi kare lagu kahanjak, tuntang manari sambil mampahiau tarabang tuntang kacapi.

⁷ Sambil manari kare oloh bawi te manyanyi kalotoh, “Saul mampatei bakoya-koyan musoh, tapi Dawid bapulu-puluh koyan.”

⁸Mahining auh te Saul paham sangit. Awi tiroke, “Dawid iitong jari mampatei bapulu-puluh koyan, tapi aku bakoya-koyan bewei. Dia tahi tinai batantu ie iangkat ewen manjadi rajan ewen!”

⁹Bara andau te ie bahiri dengan Dawid.

¹⁰Andau jewue Saul aton intu huang huma metoh mimbing lunjue tuntang salenga ie inalih awi roh papa je inyoho Hatalla, sampai ie mamok kilau oloh gila. Metoh te Dawid metohe mampahiau kacapi kilau bahut.

¹¹“Aku mambelas lunju toh buah Dawid sampai leket intu dinding!” tirok Saul, palus ie mambelas lunju te sampai due tingkat akan Dawid, tapi Dawid olih mahakan.

¹²Saul kasene je Dawid ingalindong awi TUHAN tapi ie kabuat ilihi TUHAN. Awi te ie mikeh dengan Dawid.

¹³Palus ie mindah Dawid bara huang istana, tuntang mangkat ie jadi pangkalima akan sakoyan tantara. Kalote Dawid mamimpin pasukae hong gagenep aton parang.

¹⁴Ie olih nguan kare gawie, awi TUHAN mandohop ie.

¹⁵Metoh Saul mite je Dawid harajur mimbit hasil ie sasar mikeh dengae.

¹⁶Tapi hapus Israel tuntang Yuda sayang dengan Dawid awi ie pamimpin je are pandohope akan bangsa.

¹⁷Saul nahuang uka Dawid impatei awi oloh Pilistin huang parang uka dia ie kabuat je mampataie. Jadi, sinde andau, Saul hamauh dengan Dawid, “Merab, anak bakas ayungku je bawi, handak ihanjeangku dengam, asal ikau mamparahan kahanyim tuntang parang akan TUHAN.”

¹⁸Dawid tombah, “Eweh rewarm toh, tuntang en rimae keluarga bapaku huang Israel, sampai rewarm toh tau jadi manantun raja?”

¹⁹Tapi sana sampai katikae Merab handak ingawin dengan Dawid, salenga oloh bawi te ingawin dengan Adriel bara Mehola.

²⁰Mikhal anak bawi ain Saul je beken sinta dengan Dawid. Metoh Saul mahining taloh te, ie nahuang kea.

²¹Tiroke, “Keleh aku manenga Mikhal akan Dawid, mangat Dawid tahokon tuntang tau impatei awi oloh Pilistin.” Jadi, akan tingkat je kadue Saul hamauh dengan Dawid, “Toh ikau tau jadi manantungku.”

²²Palus ie manyoho kare pagawaie uka mansanan akan Dawid suni-suni, iete, “Tuan raja sayang dengam tuntang kalote kea uras pagawaie; maka toh katika je buah akam uka kawin dengan anake ije bawi.”

²³Tapi metoh ewen manyampai tirok te akan Dawid, ie tombah, “Nyewut keton mangat, amon tau jadi manantun raja? En dia aku toh oloh je belom susah tuntang jaton rimae!”

²⁴Kare pagawai te mansanan akan Saul panombah Dawid te.

²⁵Palus Saul manyoho ewen mansanan akan Dawid kalotoh, “Je ingahandak raja akan palaku kawin te baya saratus upak latak oloh Pilistin, kilau taloh baleh akan musoh raja.” (Jetoh je irancana Saul akan mampatei Dawid mahalau oloh Pilistin)

²⁶Kare pagawai Saul manyampai peteh toh akan Dawid, tuntang Dawid manarima kanahuang raja. Awi te helo bara mahalau katikae, ie haguet dengan oloh ayue akan tanah Pilistin. Ie mampatei 200 oloh Pilistin, balalu induae upak latak ewen tuntang inyarahe akan Saul hayak jaton katapase. Limbah te Saul mangawin Mikhal dengan Dawid.

²⁸Kalote Saul kasene je Dawid ingalindong TUHAN tuntang inyinta Mikhal anake je bawi.

²⁹Palus Saul sasar mikeh dengan Dawid tuntang ie manyingi Dawid hapus umure.

³⁰Sasining katika tantara Pilistin dumah manyarang, Dawid labih are mimbit hasil mambinasa ewen bara kare pangkalima ain Saul je beken. Palus Dawid sasar basewut.