Read Ngaju 1 SAMUEL 19 Bible Online

1 SAMUEL 19 - Ngaju bible

1 SAMUEL 19

¹Saul mansanan akan Yonatan anake, tuntang akan kakare pagawaie je ie handak mampatei[54] Dawid. Tapi Yonatan paham sayang dengan Dawid,

²awi te ie hamauh dengae, “Bapaku handak mampatei ikau; awi te batawat! Keleh hanjewu jewu ikau manyahokan intu eka je basilim, tuntang melai intu hete.

³Aku kareh haguet akan janah hayak dengan bapaku tuntang mendeng tokep ekam manyahokan te. Palus aku kareh hakotak dengae tahiu kahandake dengam, tuntang hasil kotak te kareh insanangku akam.”

⁴Palus Yonatan mangotak taloh je bahalap tahiu Dawid dengan Saul koae, “Bapa, ela bapa mangapehe rewarm Dawid. Awi ie jaton mawi taloh sala en-en dengam; malengkan ie jari paham mandohop bapa.

⁵Ie jari nahuang mampahancor tahasenge katika ie mampatei Goliat tuntang TUHAN jari manenga kamanang hai hajamban ie. Bapa kabuat jari mite kajadian te. Jadi mbuhen toh bapa handak mangapehe oloh je dia sala tuntang mampatei Dawid jaton bara buku sabab?”

⁶Saul ingarendeng tagal kare auh Yonatan, tuntang ie sumpah tagal aran TUHAN je Dawid dia kareh impatei.

⁷Limbah te Yonatan mantehau Dawid, tuntang manyarita uras auh pander te nah. Limbah te ie mimbit Dawid akan Saul, tuntang Dawid manyang ie kilau solake.

⁸Limbah te lembut tinai parang dengan oloh Pilistin. Dawid manyarang tuntang mampakalah ewen samasinde, sampai ewen hadari.

⁹Sinde andau Saul metohe mondok intu huma dengan lunju intu lengee tuntang salenga Saul inalih tinai awi roh papa je inyoho TUHAN. Metoh te Dawid magon mampahiau kacapie.

¹⁰Palus Saul handak mambelas lunjue mawi Dawid je aton tokep dinding. Tapi Dawid mahakan, sampai lunju leket intu dinding. Dawid hadari uka manyalamat arepe.

¹¹ Alem te kea Saul mangirim pire-pire biti oloh manalih human Dawid mangat mimpa Dawid tuntang mampateie amon jari hanjewu. Tapi Mikhal sawae, hamauh dengae, “Amon ikau dia hadari alem toh, hanjewu jewu ikau batantu impatei.”

¹²Balalu Mikhal moloh Dawid bara baunsengok, tuntang Dawid hadari sampai liwus.

¹³Palus Mikhal manduan hampatong dewa humae balalu mingkese intu eka Dawid batiroh. Limbah te intu hila takoloke iingkese bantal bara bulun kambing, palus ie mamungkor hampatong te hapan kahowut.

¹⁴Metoh kare sarohan Saul dumah handak manyingkap Dawid, Mikhal hamauh, “Dawid metohe haban.”

¹⁵Tapi Saul manyoho ewen haluli akan hete mangat mite Dawid dengan matan ewen kabuat. Parentahe, “Imbit ie akan hetoh dengan ekae batiroh mangat aku mampatei ie.”

¹⁶Palus kare sarohan te tame akan huang kamar palus gitan ewen hampatong aton hong eka batiroh tuntang bantal bulun kambing intu hila takoloke.

¹⁷Saul hamauh dengan Mikhal, “Puron toto ikau manipu aku kalotoh! Musohku indohopm hadari!” Tombah Mikhal, “Ie maancam mampatei aku amon aku dia mandohop ie hadari.”

¹⁸Limbah Dawid olih hadari, ie haguet akan human Samuel intu Rama, palus mansanan uras taloh je iawi Saul dengae. Limbah te Samuel haya-hayak dengan Dawid haguet akan Nayot tuntang melai intu hete.

¹⁹Tapi akan Saul insanan je Dawid aton intu Nayot tokep Rama.

²⁰Awi te Saul mangirim pire-pire sarohan uka manawan Dawid. Tapi ewen hasondau[55] dengan ije kumpulan nabi je metohe manari-nari tuntang kariak-kariak haya-hayak, imimpin awi Samuel. Palus kare sarohan Saul te inguasa awi Roh Hatalla sampai ewen kea nampara manari-nari tuntang kariak-kariak.

²¹Metoh barita te sampai Saul, ie mangirim kare sarohan je beken tuntang ewen kea nampara manari-nari tuntang kariak-kariak. Akan tingkat je kateloe Saul mangirim kare sarohan tuntang kalote kea taloh je manjadi dengan ewen.

²²Awi te Saul haguet akan Rama. Sana sampai intu kalin danum je hai intu Sekhu, ie misek oloh, hong kueh Samuel tuntang Dawid, tuntang oloh intu hete mansanan akae ewen due te aton intu Nayot.

²³Palus ie manalih akan eka te, tapi ie inguasa awi Roh Hatalla, sampai omba manari-nari tuntang kariak-kariak hapus jalan akan Nayot.

²⁴ Sana sampai intu hete, ie mengkak pakaiae tuntang kariak-kariak intu taharep Samuel, palus balongkang akan petak hayak halowai hapus andau alem. (Jetoh tamparan paribasa je mansanan, “En Saul kea jadi nabi?”)