Read Ngaju 1 SAMUEL 2 Bible Online

1 SAMUEL 2 - Ngaju bible

1 SAMUEL 2

¹ Palus Hana balakudoa, koae, “TUHAN mampahanjak ateiku; gawin Aie manyanang hambaruangku. Huang kasanang aku mahalalea musohku awi toto-toto Hatalla jari mandohop aku

²Jaton je barasih sama kilau TUHAN! Baya Ie je tau manenga kalindong.

³Paterai kamburau aim je ngahus bewei! Patende pander je bajoho! Awi TUHAN te Hatalla je katawan taloh handiai; je mahakim kare gawin oloh.

⁴Panah pahlawan jari imelek, tapi oloh je balemo sasar abas.

⁵Oloh je solake bihin besoh awi panginan je hakutoh, toh manjadi kuli mangat tau mandino panginan. Oloh je solake bihin balau toh ombet angate awi sukup panginae Sawan oloh je tamanang, toh mangkeme andal awie jari manak uju biti anake! Tapi indu oloh je are anake, ilihi tuntang inalua asi-asi.

⁶TUHAN mampatei, Ie kea je mambelom. Akan lewun kare liau Ie mampamohon olon. Tuntang bara hete Ie kea jari manggatange.

⁷Aton oloh je Awie belom susah, aton kea je Awie tatau. Aton oloh je imparandah Awie, aton kea je impagantong Awie.

⁸Bara kapehe Ie manggatang oloh je jaton bara panatau. Bara kajake Ie maliwus oloh je asi-asi. Ewen Awie manjadi sobat oloh bangsawan, tuntang inengae pangkat je mimbit hormat. Galang petak TUHAN bewei je tempoe, intu hunjue Ie mamangun kalunen.

⁹Oloh je baketep harajur sanang ie bakalindong intu TUHAN. Tapi je papa hadate lenyoh binasa hong eka je kaput pijem, oloh dia olih mampatamam kaabase kabuat, kaabas olon jaton mimbit kamanang.

¹⁰Kare musoh TUHAN lenyoh litek ewen mikeh; bara langit Ie mangaruntong. TUHAN akan mamutus perkaran oloh hapus kalunen, tuntang manenga kuasa je paham hai akan raja je iintih Awie.”

¹¹Palus Elkana tuntang keluargae buli akan Rama, tapi Samuel anake te, melai intu Silo tuntang manyang TUHAN hong penda atoh Imam Eli.

¹²Kare anak Eli te oloh je paham papa hadate. Ewen jaton paduli TUHAN.

¹³Kilau imam ewen mawi bangsa Israel mana koae madoe. Amon paribasae aton oloh je maluput parapah, oloh ain imam dumah mimbit sarapang je telo isie. Metoh isin meto te iluntoh,

¹⁴sarapang te iajoke akan huang ketel eka isin meto te impakasak. Palus en bewei je tajijit balua awi sarapang te jadi ayun imam. Kakare oloh Israel je dumah akan Silo uka maluput parapah uras iawi ewen kilau te.

¹⁵Tinai kanateke oloh ain imam te dumah helo bara oloh mamisah enyak meto te bara isie mangat ingehu, palus ie hamauh dengan oloh je maluput parapah te, “Tenga isie je magon manta te akan imam mangat ie manyeheie; ie dia maku manarima isie je iluntoh.”

¹⁶Amon oloh te tombah, “Keleh itah manumon atoran, tuntang mamapui enyak te helo; limbah te tau ikau manduae tumon kahandakm,” maka oloh ain imam te hamauh, “Dia, ikau musti manenga jete toh kea; amon dia, aku kareh manjuju kahandakku manduae bara ikau.”

¹⁷Kalote due anak Eli te badosa hai intu matan TUHAN, awi ewen manawah parapah je iluput akan TUHAN.

¹⁸Metoh te, Samuel je magon korik te harajur malalus gawi manyang TUHAN. Ie mahapan baju dinas bara benang lena, sama kilau baju sombayang je ihapan kare imam.

¹⁹Genep nyelo indue manampa akae jubah korik palus manenga jete akan Samuel; jete iawie amon ie te haya-hayak dengan banae maluput parapah sining nyelo.

²⁰Palus Eli mamberkat Elkana tuntang sawae. Ie hamauh dengan Elkana, “Keleh TUHAN manenga kare anak tinai akam bara sawam toh, hapa mangganti anak je jari inyarahm akan TUHAN.” Limbah te ewen palus buli akan Rama.

²¹Hana imberkat Hatalla, kalote ie manak tinai telo anak hatue tuntang due anak bawi. Samuel sasar tahi sasar hai tuntang katika te kea ie manyang Hatalla.

²²Eli jari bakas toto. Ie harajur mahining auh dawa tahiu gawin kare anake akan oloh Israel. Eli katawan kea je kare anake te batiroh dengan kare oloh bawi je bagawi intu hila baun bauntonggang Kemah TUHAN.

²³Tagal te ie hamauh dengan kare anake, “Aku jari mahining auh bara hapus ungkup tahiu gawin keton je papa. Mbuhen keton mawi taloh te?

²⁴Ela mawi taloh kilau te tinai anakku, puna papa toto taloh je inahiu ungkup TUHAN tahiu keton!

²⁵Amon oloh sala taharep olon, Hatalla tau mangalindong ie; tapi amon oloh badosa taharep TUHAN, eweh je tau mandohope?” Tapi ewen dia paduli auh Eli bapa ewen, awi TUHAN jari mamutus handak mampatei ewen.

²⁶Beken haliai tahiu Samuel, anak te, sasar hai tuntang sasar ingilak, aloh awi TUHAN, aloh awi oloh samandiai.

²⁷Sinde andau aton ije biti nabi dumah manalih Eli manyampai tabe bara TUHAN akae, koae, “Metoh tato hiang keton Aron tuntang keluargae jadi rewar raja Misir, Aku jari mamparahan arep-Ku akan Aron.

²⁸ Bara kakare suku hong Israel keluargae jari iintih-Ku manjadi imam aing-Ku, uka nguan gawi intu mesbeh, mamapui garo, tuntang mahapan baju epod[7] amon hakotak dengang-Ku. Tuntang akan ewen, tinai turonan ewen kea jari inenga hak tau manduan belah bara parapah je ingehu intu mesbeh.

²⁹Jadi, mbuhen ikau magon bakoho mite [8] kare parapah je tumon peteh-Ku, iluput bangsa Aing-Ku akang-Ku? Mbuhen ikau Eli, labih mahormat kare anakm bara mahormat Aku, tuntang manalua ewen mampaseput arepe bara taloh je pangkahalape bara genep parapah je iluput bangsa aing-Ku akang-Ku?

³⁰Aku, TUHAN, Hatallan Israel, bihin jari hajanji, mangat keluargam tuntang jalahan ayum kareh bagawi manyang Aku kilau imam palus katatahie. Tapi toh Aku dia nahuang kare taloh te tinai! Basa oloh je mahormat Aku, ihormat-Ku kea, tapi oloh je manawah Aku, kareh inawah-Ku kea.

³¹Hining, kareh dumah katikae Aku mampatei kakare oloh tabela huang keluargam tuntang jalaham, sampai ije biti oloh hatue mahin jaton huang humam kareh je tau panjang umure.

³²Ikau kareh pehe ateim tuntang bahiri mite[9] kare berkat je kareh inenga-Ku akan oloh beken intu Israel; padahal huang ungkup oloh humam kabuat kareh uras matei katika umur ewen magon tabela.

³³Tapi ije biti bara turonam, kareh inaluaku belom mangat tau manyang Aku kilau imam. Tapi ie[10] kareh babute tuntang belom asi-asi awi nihau kaharape. Uras turonam je beken kareh impatei.

³⁴Kilau tanda akan taloh je insanang-Ku te kareh toto manjadi, maka due anakm te, Hopni tuntang Pinehas kareh matei huang ije andau.

³⁵Limbah te Aku kareh mintih imam je baketep intu taharep-Ku tuntang je pahias malalus taloh je irentah-Ku akae. Aku kareh manenga akae turonan je harajur bagawi kilau imam intu taharep kare raja je intih-Ku.

³⁶Gagenep turonam je magon belom, akan manalih imam te uka balaku duit tuntang panginan. Ie kareh balaku: “Soho aku mandohop kare imam, mangat aku tau kuman aloh ije kasuap barangai.”