Read Ngaju 1 SAMUEL 21 Bible Online

1 SAMUEL 21 - Ngaju bible

1 SAMUEL 21

¹ Dawid haguet akan imam Ahimelekh intu Nob. Marak tarewen Ahimelekh balua manyondau Dawid tuntang misek ie, “Mbuhen ikau akan hetoh kabuat ih?”

²Dawid tombah, “Akangku jari inyarah ije gawi awi raja tuntang ingahanae mansuman akan eweh bewei tahiu gawi te. Awi te oloh ayungku inyohoku mentai intu ije eka.

³Maap, toh aku handak misek, panginan en je aton intu bapak? Tenga akangku lime rote atawa en bewei je aton intu hetoh.”

⁴Palus koan imam te, “Aku jaton mina rote toto, baya rote parapah je aton; ikau tau manduae, asal oloh ayum dia hinje oloh bawi hong katika je haru-harue toh.

⁵Batantu ih ewen dia malaluse. Harajur amon ikei malalus gawi, anak buahku mahaga, mangat ewen barasih manumon agama, padahal bahut jete baya akan kare gawi je dia babehat. Mahin hindai akan tugas khusus je kilau toh!”

⁶ Palus imam te manenga akan Dawid rote parapah te, awi je aton dengae baya rote je inenga akan Hatalla, tuntang jari iangkat bara mesbeh akan ingganti hapan rote je taheta. (

⁷Tabarong, Doëg oloh Edom, pamimpin sakatik meto ain Saul aton intu hete andau te uka malalus ije kapatut agama)

⁸Limbah te Dawid misek dengan Ahimelekh, “En bapak mingkes lunju atawa padang je tau ihapaku? Parentah raja te paham manyalenga sampai aku haguet kajeng-kiso toto tuntang dia sampet tinai manduan padang atawa pakakas parang je beken.”

⁹ Palus Ahimelekh tombah, “Aku mingkes padang Goliat, oloh Pilistin je impateim intu Janah Ela te; padang te aton intu likut Epod, habungkus huang benang. Amon ikau nahuang, duan ih, awi baya jete pakakas je aton intu hetoh.” Koan Dawid, “Padang te padang je pangkahalape intu hapus lewu, tenga te akangku.”

¹⁰Adau te kea Dawid hadari bara Saul, palus sampai akan Akhis raja lewu Gat.

¹¹ Akan Akhis insanan awi kare pagawaie kalotoh, “En dia ie toh Dawid, raja intu lewue? En dia akae kare oloh bawi metoh te manari sambil manyanyi kalotoh, ‘Saul mampatei bakoya-koyan musoh, tapi Dawid bapulu-puluh koyan?’ ”

¹² Kare auh te manderoh tirok Dawid, tuntang ie mikeh toto dengan raja Akhis.

¹³ Awi te intu baun oloh are Dawid pura-pura gila. Metoh ewen handak manawan ie, ie kilau oloh bojon. Ie gaya-gayau dengan lawang lewu[64] tuntang manalua iwehe mahasor akan janggute.

¹⁴Palus Akhis hamauh dengan kare pagawaie, “En keton dia mite je oloh te gila? Mbuhen keton mimbite akan hetoh?

¹⁵En magon tapas oloh je bojon gila lakau tokep aku, sampai keton mimbit oloh gila tinai akan humangku toh?”