Read Ngaju 1 SAMUEL 22 Bible Online

1 SAMUEL 22 - Ngaju bible

1 SAMUEL 22

¹ Limbah te Dawid balua bara lewu Gat tuntang manyahokan intu goha tokep lewu Adulam. Metoh kare kakae tuntang hapus keluargae mahining je ie aton intu hete, ewen manalih ie.

²Kalote kea kare oloh je belom susah tuntang je aton utange, tuntang je mangkeme dia puas, urase omba Dawid, tuntang Dawid manjadi pamimpin ewen. Hasean kare oloh ain Dawid te aton kira-kira 400 biti.

³Bara goha te Dawid haguet akan Mispa intu Moab tuntang hamauh dengan raja, “Nyoho bapaku tuntang induku melai dengan tuangku, sampai aku katawan en kahandak Hatalla dengangku.”

⁴Limbah te oloh bakase te iimbite akan rajan oloh Moab, tuntang ewen tetep melai hete katahin Dawid manyahokan intu goha.

⁵Sinde andau ije biti nabi je arae Gad dumah manalih Dawid tuntang hamauh, “Ela melai intu goha toh, lius bajeleng akan tanah Yuda.” Palus Dawid haguet tuntang tame akan pulau Karet.

⁶Sinde andau Saul metoh mondok intu penda batang tamariska intu hunjun bukit hong Gibea. Ie mimbing lunjue tuntang kare pangkalimae mendeng hakaliling ie. Metoh ie mahining je eka Dawid tuntang oloh ayue te jari ingatawan,

⁷ie hamauh dengan kare pangkalima te, “Hining, o keton oloh Benyamin! En Dawid te kareh manenga akan keton tana tuntang kabon anggor? En keton kareh uras iangkate jadi pangkalima huang tantarae?

⁸En jete bukue keton pakat tuntang malawan aku tuntang ije mahin dia mansanan akangku je anakku kabuat jari omba hila Dawid te? Jaton ije bara keton je manirok arepku atawa mansanan akangku je Dawid, oloh ayungku, metoh toh kanjerae manggau jalan mangat mampatei aku, tuntang je anakku Yonatan jari manalanju ie!”

⁹ Doëg kapala sakatik meto ain Saul, kea aton intu hete dengan kare perwira Saul, palus Doëg hamauh, “Aku jari mite Dawid manalih Ahimelekh anak Ahitub intu Nob.

¹⁰Ahimelekh balaku tanda bara TUHAN tahiu taloh je musti ilalus Dawid. Beken bara te Dawid inenga panginan hayak inenga akae padang Goliat, oloh Pilistin te.”

¹¹Palus raja manyoho mantehau Imam Ahimelekh tuntang kakare kolae je jadi imam intu Nob; ewen palus manaharep ie.

¹²Koan Saul dengan Ahimelekh, “Hining, o anak Ahitub!” Tombah ie, “Yoh raja”

¹³Saul misek dengae, “Mbuhen ikau pakat dengan Dawid malawan aku? Mbuhen ie impahatam hapan rote tuntang inengam padang hayak ilakum tanda bara Hatalla? Toh ie malawan aku tuntang metoh manggau jalan uka mampatei aku.”

¹⁴Palus Ahimelekh tombah, “Tapi en dia Dawid pangkalima ain raja je paling baketep? Ie manantun raja kabuat, kapala[65] tantara jagan bitin raja, tuntang paham ihormat awi kare oloh huang istana raja.

¹⁵Puna aku jari balaku tanda bara Hatalla akae, tapi dia ie harue toh[66] aku mawi taloh te. Tahiu kapakat malawan raja, ela raja mandawa aku atawa oloh beken kea huang keluargaku. Aku dia katawan taloh en-en tahiu hal te!”

¹⁶Tapi raja hamauh, “Ahimelekh! Ikau tuntang hapus kolam musti matei.”

¹⁷Palus ie marentah kare pangawal je mendeng tokepe, “Ayo, patei kare imam TUHAN te! Ewen jari pakat dengan Dawid. Ewen katawan je Dawid hadari, tapi ewen dia maku mansanae akangku.” Tapi kare pangawal te dia maku mampatei kare imam TUHAN te.

¹⁸Awi te Saul hamauh dengan Doëg, “Ayo, jeleng. Ikau ih je mampatei ewen!” Palus Doëg maju tuntang impataie kare imam te. Hong andau te ie mampatei hanya puluh lime biti imam je aton hak mahapan baju epod.

¹⁹Saul kea marentah uka mampatei hapus oloh lewu Nob, lewu imam te; hatue, bawi, anak oloh tuntang awau kea sapi, kalidai tuntang tabiri, urase impalomose.

²⁰Baya Abyatar, ije bara kare anak Ahimelekh olih liwus. Ie hadari talih Dawid,

²¹palus mansanan je Saul jari mampatei kare imam TUHAN.

²²Dawid hamauh dengae, “Metoh gitangku Doëg intu hete hong andau te, aku katawan batantu je ie kareh mangadu akan Saul. Jadi, aku je mananggong kajarian[67] pampatei salepah kolam te.

²³Keleh melai dengangku tuntang ela mikeh tagal Saul handak mampatei ikau, tapi ie handak mampatei aku kea. Ikau kareh sanai intu ekaku.”