Read Ngaju 1 SAMUEL 23 Bible Online

1 SAMUEL 23 - Ngaju bible

1 SAMUEL 23

¹Sinde andau oloh mansuman akan Dawid je oloh Pilistin manyarang lewu Kehila tuntang marampas gandom je harue nampara inggetem.

²Palus ie misek dengan TUHAN, “En musti aku haguet manyarang oloh Pilistin te?” “Yoh,” tombah TUHAN, “Sarang ewen tuntang nyalamat oloh lewu Kehila te.”

³Tapi oloh ayun Dawid hamauh dengae, “Intu hetoh, hong Yuda bewei, itah jari paham mikeh; mahin tinai amon itah musti haguet manyarang tantara Pilistin intu Kehila.”

⁴Awi te sinde tinai Dawid balaku tanda bara TUHAN, tuntang TUHAN tombah, “Ela mikeh. Sarang lewu Kehila, karana tantara Pilistin te kareh inyarahku akam.”

⁵Dawid haguet dengan oloh ayue akan Kehila palus ie manyarang tuntang mampatei are oloh Pilistin, tuntang ie marabut meto ain ewen. Kalote Dawid manyalamat oloh lewu te.

⁶Katika Abyatar anak Ahimelekh hadari talih Dawid, tuntang mangawal Dawid intu Kehila, ie aton mimbit epod.

⁷Katika oloh mansanan akan Saul je Dawid aton intu Kehila, tirok Saul, “Dawid jari inyarah Hatalla akangku. Ie tajabak awi jari tame akan huang lewu je ingaliling dinding batu tuntang lewu te halawang.”

⁸Palus Saul mimbit tentarae tuntang haguet akan Kehila uka mangapong Dawid haya-hayak dengan oloh ayue.

⁹Tapi Dawid jari katawan je Saul aton kahandake papa dengae. Awi te ie hamauh dengan Imam Abyatar, “Imbit Epod te akan hetoh.”

¹⁰Palus Dawid balakudoa, “TUHAN, Hatallan Israel, aku mahining je Saul aton kahandake uka dumah akan Kehila tuntang mamplomos lewu toh tagal aku, rewarm.

¹¹En toto kabar je ihiningku te? TUHAN, Hatallan Israel, keleh sanan akangku.” TUHAN tombah, “Yoh, Saul kareh dumah.” Palus isek Dawid tinai, “En oloh lewu Kehila kareh manyarah aku tuntang oloh ayungku akan Saul?” TUHAN tombah, “Yoh.”

¹³Palus Dawid dengan oloh ayue lakau 600 biti, jeleng balua bara Kehila tuntang miar bara ije eka akan eka je beken. Metoh Saul mahining je Dawid jari haguet bara Kehila, ie mambalang kanahuange manyarang.

¹⁴Limbah te Dawid melai kare goha hong kare bukit intu padang pasir Sip. Ie harajur inggoang awi Saul, tapi TUHAN dia manyarah ie akan raja te.

¹⁵Aloh kalote Dawid mikeh kea, awi Saul aton kahandake mado mampatei ie. Sinde katika Dawid aton intu Hores, intu padang pasir Sip.

¹⁶Yonatan haguet manyondau ie akan hete uka mampaabas kaparcayan Dawid je ie kareh ingalindong awi Hatalla.

¹⁷Koan Yonatan dengae, “Ela mikeh, ikau dia kareh manjato intu lengen bapaku. Ie katawan toto je ikau kareh manjadi raja Israel tuntang aku kareh mandino eka intu penda kuasam.”

¹⁸ Limbah te Dawid tuntang Yonatan mampendeng janji hasobat intu taharep TUHAN. Limbah te Yonatan buli akan humae, tuntang Dawid tetep melai intu Hores.

¹⁹ Limbah te pire-pire biti oloh bara Sip manaharep Saul intu Gibea tuntang hamauh, “Dawid manyahokan intu tanah ikei huang kare goha tokep Hores, intu hunjun Bukit Hakhila hila salatan padang pasir Yuda.

²⁰Ikei katawan je raja handak toto manawan ie; awi te, keleh dumah akan tanah ikei. Ikei katawan batantu je raja kareh tau manawan ie.”

²¹Saul tombah, “Keleh TUHAN mamberkat keton awi keton malalus kahalap akangku!

²²Keleh haguet tuntang riksa toto-toto tuntang labih batantu tinai hong kueh Dawid aton tuntang eweh je jari mite ie intu hete. Aku mahining je ie paham pintar hayak bakalilit.

²³Jadi, riksa titi-titip kare goha je puji jadi ekae manyahokan, tuntang haluli tinai akan hetoh mansuman akangku. Palus aku kareh haguet haya-hayak dengan keton. Amon ie magon aton intu tanah te, pasti kareh aku manggau ie, aloh aku musti mangorah hapus tanah Yuda!”

²⁴Palus kare oloh te buli akan Sip helo bara Saul. Metoh te Dawid tuntang oloh ayue aton intu padang pasir Maon, intu janah je tunis benyem hong tanah salatan padang pasir Yuda.

²⁵Saul tuntang tantarae dumah handak manggau Dawid, tapi oloh mansuman taloh te akan Dawid, sampai ie haguet akan bukit batu intu padang pasir Meon tuntang melai intu hete. Limbah Saul katawan taloh te ie bajeleng manggoang Dawid.

²⁶Saul tuntang tantarae mananjong intu saran bukit hila hetoh, tapi Dawid tuntang oloh ayue intu saran hila kanih. Dawid kaje-kajeng maliwus arepe bara Saul je jari nampara mangapong handak manawan ewen.

²⁷Tapi salenga dumah ije sarohan naharep Saul tuntang hamauh, “Keleh raja jeleng haluli! Oloh Pilistin jari manyarang lewun itah!”

²⁸Palus Saul mampatende gawie manggoang Dawid, tuntang haguet uka parang malawan oloh Pilistin. Jete bukue eka te inyewut Bukit Kapisah.