Read Ngaju 1 SAMUEL 24 Bible Online

1 SAMUEL 24 - Ngaju bible

1 SAMUEL 24

¹Bara hete Dawid haguet akan tanah En-Gedi, tuntang manyahokan arepe intu kare goha.

²Katika Saul harue buli bara parang malawan oloh Pilistin, ie manarima kabar je Dawid aton intu padang pasir tokep En-Gedi.

³ Balalu hemben te kea Saul mintih telo koyan tantara je paling bahalap bara hapus Israel, palus haguet manggau Dawid tuntang oloh ayue intu hila timor Bukit Batu Kambing Parak Kayu.

⁴Maka Saul sampai hong tokep pire-pire karambang tabiri intu saran jalan. Intu hete aton kea ije goha, tuntang Saul tame handak mamani. Tabarong toto Dawid tuntang oloh ayue metohe manyahokan intu goha te kea, tapi labih kahuang hindai.

⁵Palus oloh ayun Dawid hamauh dengae, “Jetoh andaue akan bapa! En dia TUHAN jari hamauh dengan bapa iete, ‘Musohm kareh inyarahku akam, lalus tumon kahandakm dengae!’ ” Limbah te Dawid tame suni-suni akan eka Saul, ineteke isut saran jubah Saul.

⁶Tapi limbah te Dawid mangkeme sala awi ie jari mawi taloh te.

⁷Ie hamauh dengan oloh ayue, “Keleh TUHAN mahaga ela sampai aku mawi kapapa akan rajangku je jari intih TUHAN!”

⁸Kalote Dawid mampong oloh ayue, tuntang dia manyoho ewen manyarang Saul. Saul hingkat tuntang balua bara goha te, palus marajur pangguete.

⁹Dawid kea balua bara goha te tuntang mantehau intu hila likut Saul, “Tuan raja!”

¹⁰Saul tampaliau akan likut tuntang Dawid sontop dengan hormat palus hamauh, “Mbuhen raja mahining auh oloh je mansanan aku handak mancalaka raja?

¹¹Toh raja mangkeme kabuat je intu huang goha endau, TUHAN jari manyarah raja akangku. Aku jari inantiring awi ije oloh uka mampatei raja, tapi aku dia maku. Koangku tombah, je aku dia maku mangapehe rajangku je iintih TUHAN.

¹²Item, bapa! Item tetek jubah raja je imbingku toh! Sapunae aku tau mampatei raja. Tapi aku baya manetek isut saran jubah raja. Jadi, ampie je aku jaton kahandak papa atawa darhaka. Tuan raja goang-goang dengangku handak mampatei aku, aloh aku jaton sala en-en imtu taharep raja.

¹³Keleh TUHAN je mamutus perkara toh marak itah eweh je sala! Keleh TUHAN je mamaleh gawin raja dengangku, tapi isut kea mahin dia bitingku kareh mangapehe raja.

¹⁴Tuan raja katawan tanding tampengan oloh horan toh, ‘kapapa baya ilalus awi oloh je papa.’ Awi te aku dia akan mangapehe raja.

¹⁵Tampayah aku toh je handak impatei awi raja Israel! Item aku toh je inggoang awie! Aku baya ije kongan aso matei, ije kongan guti bewei.

¹⁶TUHAN kareh jadi hakim akan raja tuntang akangku kea. Keleh Ie mariksa taloh toh, tuntang milang aku hayak manyalamat aku bara raja.”

¹⁷Limbah Dawid lepah mangotak auh te, Saul hamauh, “En ikau te, o Dawid, anakku?” Palus ie manangis.

¹⁸Koae dengan Dawid, “Ikau je bujur, tuntang aku toh je sala.

¹⁹Kapapangku dengam jari imalehm hapan kahalap. Hong andau toh ikau jari mamparahan je ikau aton kahandak bahalap dengangku, awi ikau dia mampatei aku, aloh TUHAN jari manyarah aku akam.

²⁰Jarang toto ije biti oloh hasondau dengan musohe tapi inaluae musohe te belom! Jadi, keleh TUHAN mamberkat ikau awi gawim je bahalap dengangku andau toh!

²¹Toh aku percaya je ikau kareh jadi raja akan Israel tuntang je karajaan Israel kareh tetep dehen intu penda parentahm.

²²Toh keleh hajanji dengangku tagal TUHAN, iete ikau dia kareh mampatei turonangku, tuntang dia kareh manganan aran oloh hong keluargaku!”

²³Palus Dawid sumpah akan malalus kare taloh te. Limbah te Saul buli akan humae, tuntang Dawid dengan oloh ayue kea haluli akan ekae manyahokan.