Read Ngaju 1 SAMUEL 26 Bible Online

1 SAMUEL 26 - Ngaju bible

1 SAMUEL 26

¹ Sinde andau kare oloh bara Sip dumah talih Saul intu Gibea tuntang mansanan akae je Dawid metohe manyahokan intu Bukit Hakhila hong saran padang pasir Yuda.

²Saul bagulong haguet impahayak telo koyan tantara je pangkahalape intu Israel, manintu padang pasir Sip uka manggau Dawid.

³Saul mampendeng kemahe intu saran jalan tokep Bukit Hakhila te. Dawid je aton intu padang pasir, mahining je Saul manggau ie sampai intu padang pasir.

⁴Palus ie mangirim oloh kalati, tuntang ie katawan dengan batantu je Saul aton intu hete.

⁵Dawid bajeleng haguet akan eka kemah Saul tuntang intu hete ie sondau kemah eka Saul batiroh tokep Abner anak Ner. Kemah Saul te aton intu bentok, tuntang tantarae mampendeng kemah hakalilinge.

⁶Limbah te Dawid misek dengan Ahimelekh oloh Het te, tuntang Abisai paharin Yoab (Indu ewen te Seruya), “Eweh bahanyi tame dengangku akan huang kemah Saul?” Abisai tombah, “Aku!”

⁷Maka hong alem te Dawid tuntang Abisai tame suni-suni akan huang kemah te tuntang mite Saul kanjerae batiroh intu bentok kare kemah, lunjue intejek intu petak tokep takoloke. Abner tuntang pasukae batiroh hakaliling Saul.

⁸Palus koan Abisai dengan Dawid, “Hatalla jari manyarah musohm akam hong alem toh. Soho aku mamuno lunjun Saul kabuat intu bitie sampai tembus akan petak, aku mampatei ie hapan sinde mamuno, dia usah sampai handue!”

⁹Tapi Dawid hamauh, “Ela manderoh ie! TUHAN pasti mahukum oloh je mawi kapapa akan raja je iintih Awie.

¹⁰Tagal TUHAN je belom, aku katawan je kareh TUHAN kabuat mampatei Saul, amon umure jari sampai, atawa ie matei huang parang.

¹¹Keleh TUHAN mangahana aku mampatei raja je iintih Awie! Duan ih lunjue tuntang kandie, palus itah haguet!”

¹²Palus Dawid manduan lunju tuntang kandi ain Saul te bara hila takolok Saul, palus haguet. Ije mahin jaton je mite taloh te, atawa mangatawan taloh je jari manjadi, atawa tapisik, awi TUHAN mawi ewen urase tapatiroh paham.

¹³Palus Dawid dimpah akan saran janah je beken sampai akan tantan bukit, sampai ie kejau bara kemah Saul.

¹⁴Limbah te Dawid mantehau Abner tuntang tantara Saul koae, “Abner! En hiningm auhku?” Abner mantehau kea, “Eweh ikau je kariak-kariak te?”

¹⁵Tombah Dawid, “Abner, en ikau dia oloh je paling hebat intu Israel? Mbuhen ikau dia manjaga tuam, raja te? Harue ih aton oloh tame eka kare kemah keton uka mampatei tuan keton.

¹⁶Ikau dia olih malalus gawim Abner! Tagal TUHAN je belom, keton uras patut matei, awi dia manjaga tuan keton, raja paintih TUHAN. Keleh mite! Hong kueh lunjun raja? Hong kueh kandi je aton hila takoloke endau?”

¹⁷Saul kasene auh Dawid tuntang misek, “Dawid, en te ikau, anakku?” Tombah Dawid, “Yoh, raja.”

¹⁸Palus koae tinai, “Mbuhen raja magon kea goa-goang dengangku?

¹⁹Tuan raja, hining sembah rewarm toh. Amon TUHAN je manyoho raja uka malawan rewarm, ije parapah kareh tau mampaterai kasangit Aie dengangku. Tapi amon je manyoho raja te olon, keleh ewen inyapa awi TUHAN. Basa ganan gawin ewen te, rewarm jari iharak bara petak ain TUHAN tuntang imaksa musti haguet akan lewu beken eka rewarm musti sombayang akan kare dewa bangsa beken.

²⁰Ela manalua rewarm matei intu tanah beken, kejau bara TUHAN. Kanduen raja Israel dumah uka mampatei ije guti kilau rewarm toh? Kanduee manggoang rewarm kilau oloh manggoang manuk parak kayu?”

²¹Palus Saul tombah, “Aku jari sala. Keleh buli Dawid, anakku! Aku kareh dia mawi kapapa tinai akam awi ikau jari manalua aku belom alem ndau. Gawingku humong toto. Aku toto-toto jari layau!”

²²Tapi Dawid tombah, “Toh lunjun raja, soho ije tantara raja dumah akan hetoh manduae.

²³TUHAN kareh mamberkat genep oloh je baketep tuntang bujur. Awi aloh andau toh TUHAN manyarah tuangku akan rewarm, tapi rewarm dia nahuang mawi kapapa akan raja, raja paintih TUHAN.

²⁴Jadi, kilau tuan raja jari inaluaku belom andau toh, kalote kea keleh rewarm ingalindong TUHAN tuntang iliwus bara kare bahaya!”

²⁵Palus Saul hamauh dengan Dawid, “TUHAN mamberkat ikau anakku! Ikau kareh mimbit are hasil huang kare gawim!” Palus Dawid marajur pangguete, tuntang Saul kea buli akan humae.