Read Ngaju 1 SAMUEL 27 Bible Online

1 SAMUEL 27 - Ngaju bible

1 SAMUEL 27

¹Dawid manirok huang ataie, “Aloh kilen kea sinde andau Saul kareh mampatei aku. Jadi, jaton jalan beken bara mandari arepku akan lewu Pilistin. Tumon te Saul kareh dia manggau aku tinai intu Israel, tuntang aku kea kareh sanang bewei.”

²Palus Dawid tuntang jahawen ratus oloh ayue bajeleng haguet akan Akhis anak Noah, raja lewu Gat.

³Ie manetep dengan oloh ayue intu Gat, genep bitin ewen dengan keluargae. Dawid mimbit due sawae, iete Ahinoam oloh bawi bara Yisreel, tuntang Abigail, balon Nabal, bawin oloh Karmel.

⁴Metoh Saul mahining je Dawid jari hadari akan Gat, ie dia handak tinai manawae.

⁵Palus Dawid balaku dengan Akhis, “Amon raja mangkeme sanang dengan rewarm, tenga akan rewarm ije lewu korik intu ngaju akan eka rewarm melai, mangat rewar raja toh tau omba raja intu lewu toh.”

⁶Palus Akhis manenga lewu Siklag akan Dawid, tuntang jete bukue Siklag jadi ayun kare raja Yuda sampai katika toh.

⁷Dawid melai intu lewu Pilistin katahin ije nyelo epat bulan.

⁸Katahin te Dawid tuntang oloh ayue kinjap manyarang oloh Gesur, oloh Gerisi, tuntang oloh Amalek; kare bangsa te jari tahi melai hong tanah te. Ie manyarang tanah te tikas Sur, tuntang palus akan Misir.

⁹Ie mampatei uras oloh hatue tuntang bawi hayak marabut tabiri, sapi, kalidai, onta, tinai pakaian kea. Limbah te ie haluli tuntang manaharep Akhis.

¹⁰Amon Akhis misek dengae, “Akan kueh ikau manyarang sinde toh?” Dawid mansanan je ie jari haguet akan hila salatan Yuda atawa akan tanah oloh Yerahmeel atawa akan tanah eka melai oloh Keni.

¹¹Jaton ije hong kare tanah je inyarange inalua belom, mangat jaton oloh bara kare tanah te je tau haguet akan Gat uka mansanan taloh je toto jari iawi Dawid tuntang oloh ayue. Kalote gawin Dawid katahin ie melai intu lewu Pilistin.

¹²Tapi Akhis percaya dengan Dawid tuntang manirok hong ataie, “Ie paham inyingi awi bangsae kabuat, sampai ie imaksa jadi reawarku hapus umure.”