Read Ngaju 1 SAMUEL 28 Bible Online

1 SAMUEL 28 - Ngaju bible

1 SAMUEL 28

¹Pire-pire katahie limbah te oloh Pilistin mimbit tantarae uka manyarang Israel, tuntang Akhis hamauh dengan Dawid, “Tantu ikau harati je ikau tuntang oloh ayum musti baparang omba aku.”

²Tombah Dawid, “Batantu, kareh raja mite kabuat taloh je ilalus rewarm dengan raja.” Palus Akhis hamauh, “Yoh! Ikau iangkatku jadi pangawalku je tetep.”

³ Samuel jari matei tuntang ie inatum awi hapus oloh Israel hayak ingubur intu Rama, lewue kabuat. Pire-pire katahie je halau Saul jari maharak bara Israel uras panujum tuntang oloh je tau misek liau.

⁴Metoh tantara Pilistin hapumpong tuntang mampendeng kemahe tokep lewu Sunem, Saul kea mamumpong oloh Israel, tuntang ewen mampendeng kemahe intu bukit Gilboa.

⁵Metoh Saul mite tantara Pilistin te, ie paham mikeh.

⁶ Palus ie balaku tanda bara TUHAN, tapi TUHAN dia tombahe, aloh dengan nupi atawa mahapan Urim tuntang Tumim atawa kare nabi.

⁷Awi te Saul hamauh dengan kare pagawaie, “Gau ije oloh bawi je tau mantehau liau, aku kareh talih ie tuntang balaku tanda.” Ewen tombahe, “Intu En-Dor aton oloh kilau te.”

⁸Palus Saul manyamar uka dia ingasene oloh. Impahayak awi due biti oloh hatue, ie palus haguet tuntang sampai human oloh te hamalem. Koan Saul, “Tehau liau oloh je kareh inyewutku arae tuntang laku mangat ie manujum taloh je akan manjadi.”

⁹Oloh bawi te tombah, “Batantu tuan kea katawan je raja Saul jari maharak bara Israel uras panujum tuntang tabit liau.[71] Mbuhen tuan maningkes mancalaka aku sampai aku matei?”

¹⁰Palus Saul sumpah koae, “Tagal TUHAN je belom, aku hajanji ikau kareh dia ihukum awi mawi taloh te.”

¹¹Oloh bawi te misek, “Liau eweh je musti intehauku akan tuan?” Tombah Saul, “Liau Samuel.”

¹²Metoh oloh te mite Samuel, ie mangkariak tuntang hamauh dengan Saul, “Mbuhen tuan manipu rewarm? Tuangku je ampie raja Saul!”

¹³Tombah raja, “Ela mikeh! Sanan en je gitam!” Oloh bawi te tombah, “Rewarm mite roh lembut bara petak.”

¹⁴Saul misek, “Kilen ampie?” Tombah ie, “Ije biti oloh hatue je bakas. Ie lembut hapakaian jubah.” Palus katawan Saul je ie Samuel, tuntang ie sontop mahormate.

¹⁵Limbah te Samuel hamauh dengan Saul, “Mbuhen ikau manderoh aku? Mbuhen ikau mantehau aku haluli?” Tombah Saul, “Aku jari nihau akal awi inyarang oloh Pilistin, tuntang Hatalla jari malihi aku. Aku dia inombahe tinai, aloh mahalau kare nabi aloh dengan nupi. Awi aku balaku dengan bapa, mangat bapa mansuman akangku taloh je musti ilalusku.”

¹⁶Palus koan Samuel, “Kanduem mantehau aku amon TUHAN jari malihi ikau tuntang jadi musohm?

¹⁷ TUHAN jari mawi ikau sama kilau je jari insanae mahalau aku. TUHAN jari manduan karajaan Israel bara ikau tuntang manenga te akan Dawid.

¹⁸ Ikau jari malawan parentah TUHAN tuntang dia maku mambinasa oloh Amalek tuntang kare taloh je ain ewen. Jete bukue toh ikau iawi kalotoh awi TUHAN.

¹⁹Ikau tuntang kare oloh Israel kareh inyarah Awie akan oloh Pilistin. Jewu ikau tuntang kare oloh ayum je hatue hapumpong dengangku; tinai hapus tantara Israel kea kareh inyarah TUHAN akan oloh Pilistin.”

²⁰Metoh te kea, Saul balihang hambujur akan petak kilau inyambar nyaho, awi ie paham tarewen mahining kare auh Samuel te. Mahin tinai ie balemo toto, awi dia kuman en-en ije andau ije alem.

²¹Tukang mantehau liau te manokep Saul tuntang mite je ie nihau akale; awi te oloh bawi te hamauh dengae, “Tuangku rewarm jari bakurban akan mawi taloh je ilaku tuan.

²²Jadi, keleh tuangku kea manenga palakun rewarm, keleh kuman isut panginan je kareh inyarongan rewarm mangat tuan tau marajur pangguet tuan.”

²³Saul manolak tuntang hamauh je ie dia maku kuman. Tapi limbah kare pagawaie kea hajajuan ie, ie manumon. Ie harikas bara petak tuntang mondok intu bale-bale.

²⁴Bajeleng oloh bawi te manyambalih anak sapie je baseput tuntang manduan tepong palus mupete, inampae jadi rote je dia iragi.

²⁵Limbah te inyarongae panginan te akan Saul tuntang kare pagawaie, ewen uras kuman. Limbah te ewen haguet alem te kea.