Read Ngaju 1 SAMUEL 29 Bible Online

1 SAMUEL 29 - Ngaju bible

1 SAMUEL 29

¹Oloh Pilistin mamumpong hapus tantarae intu Apek, tinai oloh Israel bakemah tokep tahasak danum intu Janah Yisreel.

²Lime biti raja Pilistin miar babaris dengan kare tantara je gagenepe aton saratus tuntang sakoyan biti; Dawid tuntang oloh ayue babaris intu likut haya-hayak dengan raja Akhis.

³Kare pangkalima oloh Pilistin mite ewen palus misek, “Kandue kare oloh Ibrani toh intu hetoh?” Akhis tombah, “Jetoh Dawid awan pagawai raja Saul bara Israel. Ie jari tahi kea melai omba aku. Bara katika ie dumah manalih aku sampai andau toh, hindai puji aku sondau kasalan intu ie.”

⁴Tapi kare pangkalima Pilistin te sangit dengan Akhis tuntang hamauh dengae, “Soho oloh toh buli akan lewu je jari inengam akae. Ie dia tau parang haya-hayak dengan itah; ela-ela ie bahianat mawi itah kareh hong bentok eka parang. En dia jetoh katika je paling bahalap akae uka mangatau rajae dengan jalan mampatei oloh ain itah?

⁵ En dia ie te Dawid? Akae kare oloh bawi bihin manari-nari sampai manyanyi kalotoh, ‘Saul jari mampatei bakoya-koyan musoh, tapi Dawid bapulu-puluh koyan.’ ”

⁶Balalu Akhis mantehau Dawid tuntang hamauh dengae, “Aku percaya tagal TUHAN je belom, je ikau baketep dengangku. Aku sanang amon ikau tau mampahayak aku huang parang toh. Awi bara katika ikau dumah talih aku sampai toh, aku jaton sondau kasalam. Tapi kare raja je beken te dia rajin dengam.

⁷Awi te keleh buli dengan selamat, tuntang ela mawi taloh je mampalembut kasangit ewen.”

⁸Dawid tombah, “En kasalan je jari iawi rewarm, raja? Amon tumon koan Tuan raja, Tuan raja dia sondau kasalan en-en intu rewarm bara katika rewarm nampara manyang raja sampai toh, mbuhen rewarm dia inyoho parang malawan musoh raja?”

⁹Akhis tombah, “Ikau katawan je ikau itongku baketep kilau malekat Hatalla. Tapi kare pangkalima te jari mamutus je ikau dia tau omba parang haya-hayak dengan ikei.

¹⁰Awi te Dawid, keton urase je jari malihi Saul tuntang dumah talih aku, musti misik hanjewu jewu tuntang haguet bajeleng limbah matanandau lembut.”

¹¹Awi te hanjewu jewuee tinai, Dawid haguet dengan kare oloh ayue buli akan lewu Pilistin, tapi tantara Pilistin te haguet akan Yisreel.