Read Ngaju 1 SAMUEL 3 Bible Online

1 SAMUEL 3 - Ngaju bible

1 SAMUEL 3

¹Samuel je magon anak korik te bagawi manyang TUHAN manumon atoh Eli. Wayah te jarang toto aton peteh atawa paite bara TUHAN.

²Sinde alem, Eli je jari bakas toto tuntang bilak babute te, metohe batiroh intu kamare.

³Samuel batiroh tokep Patin Janjin TUHAN, intu huang Kemah Barasih. Metoh tampalawei tuntang sumbo magon hanyala,

⁴TUHAN mantehau Samuel. Palus Samuel tombah, “Toh aku!”

⁵Limbah te ie hadari manyondau Eli tuntang hamauh, “Narai Pa? Mbuhen aku intehau?” Tapi Eli tombah, “Aku jaton mantehau ikau, batiroh ih.” Palus Samuel haguet batiroh tinai.

⁶Limbah te TUHAN mantehau Samuel tinai, tapi Samuel dia katawan je mantehau te TUHAN, awi hindai puji TUHAN hakotak dengae. Awi te ie misek, “Narai Pa? Mbuhen bapak mantehau?” Eli tombah, “Aku jaton mantehau ikau anakku; keleh batiroh ih.”

⁸Akan tingkat je kateloe TUHAN mantehau Samuel; palus Samuel misik tuntang manalih Eli sambil hamauh, “Mbuhen Pa? Mbuhen bapa mantehau?” Metoh te Eli katawan je TUHAN jari mantehau anak te.

⁹Awi te ie hamauh dengan Samuel, “Keleh batiroh haluli, tuntang amon ikau intehau tinai, suman, ‘Keleh hakotak, TUHAN, rewar Ayum mahining!’ ” Palus Samuel haguet akan ekae batiroh tinai.

¹⁰Limbah te TUHAN dumah, tuntang mendeng intu eka te hayak mantehau tinai, “Samuel, Samuel.” Samuel Tombah, “Keleh hakotak, TUHAN, rewar Ayum mahining.”

¹¹Palus TUHAN hamauh dengae, “Aku kareh malalus taloh je hai akan oloh Israel, sampai genep oloh je mahininge kareh hengan.

¹²Hong andau te kareh Aku malalus kakare taloh je jari iancam-Ku akan hong keluarga Eli bara tamparae sampai kahapuse.

¹³Jari insanang-Ku akae[11] je oloh keluargae kareh ihukum-Ku sampai katatahie awi kare anake jari manawah Aku. Eli katawan kare dosan ewen, tapi ie dia malait ewen.

¹⁴Awi te Aku sumpah tahiu keluarga Eli, basa dosan ewen je paham te dia baka tau inganan awi parapah en bewei sampai katatahie.”

¹⁵Limbah te Samuel batiroh tinai, hong hanjewu ie misik tuntang muap kare bauntonggang Human TUHAN. Ie mikeh mansanan paite te akan Eli.

¹⁶Tapi Eli mantehau ie, koae, “Samuel anakku.” Tombah Samuel, “Toh aku.”

¹⁷Eli misek, “En taloh je insanan TUHAN akam? Sarita urase akangku. Amon aton taloh je iilim awim, pasti ikau ihukum Hatalla.”

¹⁸Palus Samuel mansanan kakare taloh te akan Eli. Jaton ije taloh je irahasiae. Limbah te Eli hamauh, “Ie te TUHAN, nauhe Ie mawi taloh je inirok Awie bahalap.”

¹⁹Samuel sasar hai. TUHAN mampahayak ie tuntang malalus kakare taloh handiai je insanan Samuel te toto manjadi.

²⁰Tagal te hapus ungkup Israel bara hapus lewu te mangaku je Samuel te nabi ain TUHAN. Sining katika Samuel hakotak, uras oloh Israel mahining auhe. TUHAN magon tetep mamparahan arepe intu Silo, intu hete ie solake mamparahan arepe akan Samuel tuntang hakotak dengae.