Read Ngaju 1 SAMUEL 4 Bible Online

1 SAMUEL 4 - Ngaju bible

1 SAMUEL 4

¹Wayah te oloh Pilistin mimbit kare tantarae uka manyarang Israel; awi te[12] tantara Israel miar akan eka parang; ewen mampendeng kemahe tokep Eben-Haeser, tapi tantara Pilistin mampendeng kemahe intu Apek.

²Tantara Pilistin nampara manyarang, tuntang sana parang jari hamok, tantara Israel kalah tuntang lakau epat koyan biti ewen te matei intu eka parang te.

³Metoh tisan tantara je kalah jari haluli akan kemah, kare pamimpin Israel hamauh, “Mbuhen TUHAN salenga manalua itah impakalah awi oloh Pilistin hong andau toh? Keleh itah manduan Patin Janjin TUHAN bara Silo; itah mimbite akan hetoh, mangat TUHAN[13] nahuang mandohop itah tuntang manyalamat itah bara musoh.”

⁴ Palus ewen manyoho oloh akan Silo mangat manduan Patin Janjin TUHAN te kilau padadusan TUHAN je Paham Kuasae. Due anak Eli, Hopni tuntang Pinehas, mamambai Patin Janji te.

⁵Limbah Patin Janji te sampai intu eka kare kemah, oloh Israel malahap hai auh, sampai petak hagerek.

⁶Oloh Pilistin kea mahining auh lahap te palus ewen hamauh, “Mbuhen kare oloh Ibrani te malahap?” Tapi metoh ewen katawan je Patin Janjin TUHAN jari aton intu eka kare tingakap oloh Ibrani,

⁷ewen mikeh, tuntang hamauh, “Aton dewa dumah akan eka kare kemah ewen. Calaka itah! Hindai puji itah mangkeme taloh kilau toh.

⁸Calaka toto! Eweh tau manyalamat itah bara kare dewa je abas te? En dia kare dewa te kea je jari mampatei oloh Misir intu padang pasir horan?

⁹Pahanyi ateim, o oloh Pilistin! Keleh hakalahi kilau oloh hatue, amon dia, keton kareh jadi jipen kare oloh Ibrani te, kilau ewen bihin jadi jipen keton. Awi te keleh hakalahi hapan kamenteng!”

¹⁰Limbah te oloh Pilistin parang manyangit tuntang mampakalah tantara Israel. Oloh Israel hadari akan kemah ayue-ayue. Toto hai kakalah te: 30.000 tantara Israel jari matei.

¹¹Patin Janjin TUHAN irabut musoh Israel, tuntang due anak Eli, Hopni tuntang Pinehas, matei.

¹²Ije biti bara suku Benyamin hadari bara eka parang manalih Silo, tuntang ie sampai intu hete huang andau te kea. Kilau tanda kapehen atei, ie jari marabit pakaiae tuntang petak iingkese intu hunjun takoloke.

¹³Eli, je paham gogop manirok kasalamat Patin Janjin TUHAN, metoh mondok hong karosi intu saran jalan, sambil manure. Metoh oloh te mangabar barita kakalah Israel, oloh lewu lepah manangis hai auhe.

¹⁴Eli mahining tangis te palus misek, “Karidu en toh?” Pandehan te oloh je hadari endau manalih Eli; sana sampai, ie mansanan barita papa te.

¹⁵Eli te jari jalatien puluh hanya nyelo umure tuntang ie bilak babute.

¹⁶Oloh te hamauh dengan Eli, “Aku hadari andau toh bara eka parang tuntang harungku kea sampai.” Eli misek dengae, “Kilen kabar anakku?”

¹⁷Oloh je mimbit barita te tombah, “Israel hadari mahakan oloh Pilistin. Hai toto kakalah itah awi ewen. Are oloh matei, anak bapa, Hopni tuntang Pinehas, mahin matei kea. Tuntang Patin Janjin Hatalla jari irabut musoh!”

¹⁸Metoh oloh te mambarita tahiu Patin Janji te, Eli manjato mantangah bara karosie intu balikat lawang. Ie paham bakas tuntang baseput, sampai metoh ie manjato uyate bapelek, tuntang ie matei. Ie jari mamimpin Israel epat puluh nyelo katahie.

¹⁹Katika te manantun Eli, iete sawan Pinehas, metoh batihi tokep luas. Metoh ie mahining Patin Janjin TUHAN jari irabut, tuntang je empoe dengan banae jari matei, salenga ie mangkeme kapehen kanaie handak manak, palus dia tahi limbah te ie luas.

²⁰Metoh ie jari tokep mahutos, kare oloh bawi je mandohop ie hamauh, “Ela mikeh, anakm hatue!” Tapi ie dia tombah atawa manampayah ewen.

²¹Anak te inggaree Ikabod, [14] koae, “Hatalla je Pangkahai te jari nihau bara Israel.” Taloh je koae te iete: Patin Janji jari irabut tuntang empoe dengan banae jari matei. Awi te ie hamauh, “Hatalla je Pangkahai te jari nihau bara Israel awi Patin Janjin Hatalla jari irabut.”