Read Ngaju 1 SAMUEL 5 Bible Online

1 SAMUEL 5 - Ngaju bible

1 SAMUEL 5

¹Limbah oloh Pilistin marampas Patin Janjin Hatalla, ewen mimbite bara Eben-Haeser akan lewun ewen, Asdod.

²Intu hete pati te iimbit tame akan human dewan ewen, Dagon, tuntang iingkes ewen intu balikat hampatong dewa te.

³Katika oloh lewu Asdod hanjewu jewue dumah akan human dewa te, ewen mite je hampatong Dagon jari manjato mahingkep intu petak, intu Baun Patin Janjin TUHAN! Ewen manggatang hampatong te tuntang malian akan ekae solake.

⁴Tapi hanjewu jewue tinai, ewen mite je hampatong te jari manjato tinai intu baun Patin Janji te. Sinde toh takolok hampatong te tuntang due lengee bapuntung tuntang lanto-lantong tokep bauntonggang baya bitin hampatong te ih je magon bahalap. (

⁵Jete bukue sampai andau toh kare imam dewa Dagon tuntang uras oloh je manyembah ie intu Asdod dia maku mahunje laseh bauntonggang human Dewa Dagon te tapi baya mingkange bewei).

⁶Limbah te TUHAN mahukum oloh lewu Asdod tuntang daerah hakalilinge dengan baha hong biti-bereng ewen.[15]

⁷Metoh ewen mite taloh je kanjerae manjadi intu ewen te, ewen hamauh, “Hatallan Israel mahukum itah tuntang dewan itah Dagon. Itah dia tau manalua Patin Janji te melai intu hetoh labih tahi hindai.”

⁸Awi te ewen marawei lime raja Pilistin uka hapumpong palus misek, “En je iawi itah dengan Patin Janji Hatallan Israel te?” Tombah kare raja te, “Indah akan lewu Gat,” Jadi, pati te indah akan lewu Gat, ije lewu Pilistin je beken.

⁹Tapi limbah Pati te sampai hete, TUHAN mahukum lewu te kea tuntang mampalembut karidu je paham hai. Oloh lewu te aloh je tabela aloh je bakas ihukum dengan baha je lembut hong biti-bereng ewen.

¹⁰Palus Patin Janji te iagah akan Ekron, lewu Pilistin je beken tinai. Sana Pati te sampai intu hete; oloh lewu te mangkariak koae, “Patin Janji Hatallan Israel te iimbit akan hetoh mangat mampatei lepah itah toh.”

¹¹Awi te ewen mantehau kakare raja Pilistin mangat hapumpong, palus hamauh, “Lian Patin Janji Hatallan Israel te akan ekae solake mangat ela mampatei itah tuntang keluarga itah.” Intu hapus lewu palus manjadi karidu awi Hatalla mahukum oloh lewu dengan hukuman je paham babehat.

¹²Kare oloh je dia matei, intakan panyakit baha te, sampai kare oloh lewu te mangkariak intu kare dewan ewen, balaku awat.