Read Ngaju 1 SAMUEL 6 Bible Online

1 SAMUEL 6 - Ngaju bible

1 SAMUEL 6

¹Limbah Patin Janjin TUHAN aton intu Pilistin uju bulan katahie,

²oloh Pilistin mantehau kare imam tuntang oloh panujum palus misek, “En taloh je patut iawi itah dengan Patin Janjin TUHAN te? Amon itah maliae akan ekae kilen carae?”

³Palus ewen tombah, “Patin Janji Hatallan Israel te ela keton maliae kalote bewei, tapi musti impahayak awi panenga akan tewus dosan keton. Tumon te keton kareh impakeleh, tuntang keton kareh katawan mbuhen Hatallan Israel te harajur mahukum keton.”

⁴“Tewus en je musti inenga akae?” koan kare oloh te misek. Tombah kare imam te, “Lime baha amas tuntang lime balawau amas, tumon kare jumlah raja Pilistin. En dia calaka je manamunan ampin baha tuntang ampin balawau te kea je jari buah keton, aloh rayat aloh raja?

⁵Jadi, keton musti manampa sadiri akan baha tuntang akan balawau je kanjerae sabak mawi intu lewun keton. Awi kilau te mangat keton mahormat Hatallan Israel. Mikeh Ie kareh tau terai mahukum keton tuntang kare dewa hayak dengan tanah keton.

⁶Kanduen keton badungil kilau rajan tuntang rayat oloh Misir horan? Ela kalapean kilen ampie Hatalla jari mureh ewen, sampai ewen jera tuntang oloh Israel te inalua ewen balua bara Misir.

⁷Tagal te natap ije garobak je taheta tuntang due kongan sapi je magon mampatuso anake tuntang je hindai puji ihapan akan mihir garobak. Masang due sapi te intu garobak, tuntang imbit kare anak sapi te haluli akan karambang.

⁸Limbah te duan Patin Janjin TUHAN, muat akan hunjun garobak; ingkes intu balikate pati korik je basuang kare ramo bara amas je musti iluput akae kilau tewus dosan keton. Nauhe garobak tuntang sapi te miar kabuate.

⁹Nanture jalae; Amon Patin Janji te iimbit manintu lewue kabuat, iete lewu Bet-Semes, jete rimae Hatallan oloh Israel te jari mawi calaka je babehat te akan itah. Tapi amon garobak te dia manintu akan hete, ie kareh katawan je calaka te dia bara Hatallan Israel, tapi kanateke ih taloh te mawi itah.”

¹⁰Kare oloh te manumon; ewen manduan due kongan sapi je magon mampatuso anake, palus inyoho mihir garobak te, tapi kare anak sapi te inamean akan huang karambange.

¹¹Palus Patin Janji te imuat akan hunjun garobak, kalote kea pati korik je basuang sadiri balawau amas tuntang sadiri baha te.

¹²Kare sapi te miar palus manintu Bet-Semes, meto te munguh sambil miar palus, jaton mahiwang akan sambil atawa akan gantau bara jalan hai, lime raja Pilistin te palus manuntut sampai akan helat Bet-Semes.

¹³Metoh te oloh lewu Bet-Semes metohe manggetem gandom intu janah. Metoh ewen mite Patin Janji te, ewen hanjak manambange.

¹⁴Garobak te tende intu tokep ije batu hai huang tanan Yosua, ije biti bara oloh lewu Bet-Semes. Oloh lewu te manyila kayu garobak te palus manyambalih due kongan sapi te indu parapah je ingehu akan TUHAN.

¹⁵Limbah te kare oloh Lewi mampamohon Patin Janjin TUHAN tuntang pati korik je basuang sadiri amas te, palus mingkese intu hunjun batu hai te. Limbah te oloh lewu Bet-Semes maluput parapah je ingehu tuntang kare parapah je beken akan TUHAN.

¹⁶Katika lime raja Pilistin te mite kakare taloh te, ewen palus buli akan Ekron andau te kea.

¹⁷Tumon te oloh Pilistin jari manyarah akan TUHAN parapah akan tewus dosa akan oloh lewu bara lime lewu je irentah awi lime raja Pilistin. Kare lewu te iete: Asdod, Gasa, Askelon, Gat tuntang Erkron. Bara kare lewu te aton je hakota, aton kea je dia. Genep lewu te sama manyarah ije baha amas tuntang ije balawau amas akan tewus dosan ewen. Tanda akan kajadian te iete batu hai eka ewen mandak Patin Janjin TUHAN sampai andau toh kea batu te magon aton intu tanan Yosua, oloh Bet-Semes te.

¹⁹Tapi awi kare oloh Bet-Semes te manangkilik akan huang Patin Janjin TUHAN, uju puluh biti bara ewen impatei awi TUHAN. Palus rayat manatum awi TUHAN mawi ewen kalote kapahame.

²⁰Palus oloh lewu Bet-Semes hamauh, “Eweh je tahan intu taharep TUHAN, Hatalla Je Barasih te? Kan kueh Pati te musti iagah awi itah mangat kejau bara itah?”

²¹Palus ewen mangirim sarohan manalih oloh lewu Kiryat-Yearim dengan peteh toh, “Oloh Pilistin jari malian Patin Janjin TUHAN. Keleh dumah tuntang mimbit Pati te akan eka keton.”