Read Ngaju 1 SAMUEL 7 Bible Online

1 SAMUEL 7 - Ngaju bible

1 SAMUEL 7

¹ Oloh lewu Kiryat-Yearim manduan Patin Janjin TUHAN te palus mimbite akan huang human oloh je bagare Abinadab; huma te aton intu hunjun bukit. Limbah te ewen mandudus Eleasar anak Abinadab, uka manjaga Patin Janji te.

²Tahi kea Patin Janjin TUHAN te melai intu Kiryat-Yearim, lakau due puluh nyelo. Katahin te hapus ungkup Israel balaku awat dengan TUHAN.

³Palus Samuel hamauh dengan ungkup Israel, “Amon keton nahuang haluli akan TUHAN tuntang manyembah Ie hapan salepah atei keton, keton musti manganan uras dewa ain bangsa beken tuntang hampatong dewi Astoret. Sarah arep keton samasinde akan TUHAN tuntang manempo Ie bewei, maka keton kareh iliwuse bara oloh Pilistin.”

⁴Palus oloh Israel manganan kare hampatong dewa Baal tuntang hampatong dewi Astoret, palus manempo intu TUHAN bewei.

⁵Limbah te Samuel hamauh, “Mumpong hapus bangsa oloh Israel intu Mispa, te aku kareh balakudoa intu TUHAN akan keton.”

⁶Palus ewen handiai hapumpong intu Mispa. Ewen masip danum balalu manusohe kilau parapah akan TUHAN, limbah te ewen puasa hapus andau te. Koan ewen, “Ikei jari badosa intu TUHAN.” (Intu Mispa te Samuel nampara manantuani kare pakara kapaut kabantah.)

⁷Metoh oloh Pilistin mahining je oloh Israel jari hapumpong itu Mispa, lime raja Pilistin te haguet akan hete dengan tantara ain ewen uka manyarang oloh Israel. Oloh Israel mahining taloh te palus mikeh.

⁸Koan ewen dengan Samuel, “Ela terai balakudoa intu TUHAN, Hatallan itah mangat itah inyalamat Awie bara oloh Pilistin.”

⁹Awi te Samuel manyambalih ije kongan anak tabiri tabela palus malupute indu parapah je ingehu akan TUHAN. Limbah te ie balakudoa mangat TUHAN mandohop oloh Israel, tuntang lakudoae te ihining TUHAN.

¹⁰Metoh Samuel magon maluput parapah je ingehu te, oloh Pilistin nampara manyarang; tapi hemben te kea TUHAN mangaruntong bara langit akan hunjun ewen. Ampin ewen jadi kusak kasik palus hadari awi dia katawan taloh je iawie.

¹¹Tantara Israel balua bara Mispa palus manggoang oloh Pilistin te bilak sampai Bet-Kar, tuntang mampahancor ewen.

¹²Limbah te Samuel mampendeng ije batu, intu helat Mispa dengan Sen. Ie hamauh, “TUHAN jari mandohop itah.” Palus batu te inggaree “Batu Pandohop.”

¹³Kalote oloh Pilistin impakalah. TUHAN dia manyoho ewen tame tanah Israel tinai, katahin Samuel magon belom.

¹⁴Uras lewun oloh Israel je jari induan awi oloh Pilistin, nampara bara Ekron sampai Gat, ilian akan Israel. Israel mandino tinai tanahe. Oloh Israel tuntang oloh Kanaan kea belom dengan sanai.

¹⁵Samuel marentah Israel hapus umure.

¹⁶Genep nyelo ie nguan jalanae kaliling akan Betel, Gilgal tuntang Mispa. Tuntang intu kare eka te ie manantuani kare pakara kapaut-kabantah.

¹⁷Harajur limbah te ie buli akan humae intu Rama. Intu hete ie jadi hakim akan oloh Israel tuntang ie kea mampendeng ije mesbeh akan TUHAN.