Read Ngaju 1 SAMUEL 9 Bible Online

1 SAMUEL 9 - Ngaju bible

1 SAMUEL 9

¹Aton ije biti oloh tatau tuntang hai pangaruhe bara suku Benyamin, arae Kis. Ie te oloh bara keluarga Bekhorat, cabang bara jalahan Apiah. Bapae Abiel tuntang buee Seror.

²Kis aton anake hatue, arae Saul, ije biti oloh tabela je bakena tuntang tagap. Ije mahin jaton bara bangsa Israel je labih bakena bara ie. Bitie kea labih gantong; rata-rata kambo oloh Israel baya sampai hunjun bahae.

³Sinde andau pire-pire kongan kalidai ayun Kis nihau. Awi te Kis hamauh dengan Saul, “Imbit ije bara anak oloh ain itah tuntang gau kare kalidai te.”

⁴Palus Saul tuntang pelayan ayue mangombang eka je habukit hong daerah Epraim tuntang daerah Salisa, tapi dia sondau kare meto te. Limbah te ewen mananjong palus akan tanah Sahalim, tapi kare kalidai te jaton kea intu hete. Ewen manggau kea intu tanah Benyamin, tapi hayang bewei.

⁵Metoh ewen sampai intu tanah Sup, Saul hamauh dengan pelayae, “Ayo itah buli ih, ela-ela bapa labih gogop manirok itah bara kare kalidai te.”

⁶Pelayan te tombah, “Entai helo! Intu lewu toh aton ije biti rewar Hatalla. Ie paham ihormat oloh awi taloh je ilaluse harajur toto-toto manjadi. Ayo itah haguet talih ie, mikeh ie tau mansuman hong kueh eka kalidai te.”

⁷Koan Saul, “Amon itah haguet manyondau ie, en je kareh inenga itah akae? Bahata je imbit itah bilak lepah, tuntang itah jaton hindai taloh en-en je tau inenga akan rewar Hatalla te, dia kalote?”

⁸Pelayan te tombah, “Kanateke magon aton intu aku ije kabintap duit perak. Jete kareh inengaku akan rewar Hatalla te uka ie maku masanan akan itah hong kueh kare kalidai te.”

⁹“Yoh!” tombah Saul. “Ayo itah haguet.” Palus ewen haguet akan lewu, akan eka rewar Hatalla te. Metoh ewen mandai bukit je manintu bukit je akan lewu te, ewen hasondau dengan pire-pire oloh bawi je handak masip danum bara kalin danum. Palus ewen misek kare oloh bawi te, “En panujum aton intu lewu?” (Hong jaman te nabi inyewut panujum, jadi amon oloh handak misek taloh en-en dengan Hatalla, ie hamauh kalotoh, “Ayo itah haguet talih panujum.”)

¹²“Yoh, aton,” tombah kare oloh bawi te, “harue ih ie mananjong helo bara keton. Amon keton gulong, tau keton manjakee. Ie harue dumah akan lewu andau toh. Intu hunjun mesbeh hong bukit aton parapah akan rayat. Kare oloh je irawei dia baka kuman helo bara ie dumah, awi ie musti mamberkat parapah te helo. Amon keton haguet toh, keton kareh sondau ie helo bara ie mandai bukit uka kuman.”

¹⁴Jadi, Saul tuntang pelayae mananjong akan lewu. Metoh ewen due tame lawang lewu, ewen manjake Samuel je metoh mananjong manintu eka sombayang intu bukit.

¹⁵Ije andau helo bara te TUHAN mantehau Samuel kalotoh,

¹⁶“Hanjewu jewu lakau katika kalotoh, aku manyoho ije biti bara suku Benyamin manyondau ikau. Dudus ie hapan upacara maminyak mangat ie jadi raja akan ungkup-Ku Israel. Ie kareh manyalamat ungkup-Ku bara oloh Pilistin. Aku jari mite kapehen ungkup-Ku tuntang jari mahining tangis ewen balaku awat.”

¹⁷Metoh Samuel mite Saul, TUHAN hamauh dengae, “Toh oloh je inyewut-Ku akam te. Ie kareh marentah ungkup-Ku.”

¹⁸Hemben te kea Saul manokep Samuel tokep lawang lewu, tuntang misek, “Pak, intu kueh huma panujum te?”

¹⁹Samuel tombah, “Aku panujum te. Lius helo bara aku akan eka sombayang intu bukit, awi andau toh ikau kuman omba aku. Hanjewu jewue kare taloh je iisekm kareh inombahku, limbah te tau ih ikau buli.

²⁰Tahiu kare kalidaim je nihau telo andau je halau te, ela mikeh, awi jari sondau. Tinai je paling barega intu hapus Israel inenga akam tuntang keluarga ain bapam.”[17]

²¹Saul tombah, “Aku toh bara suku Benyamin, suku je paling korik intu Israel, tinai keluargaku je paling jaton rimae huang suku te. Jadi mbuhen bapa hamauh kalote dengangku?”

²²Limbah te Samuel mimbit Saul tuntang pelayae tame akan huang kamar je hai, palus ie manenga eka je mambatang akan ewen intu baun kare oloh je irawei je karee lakau telo puluh biti.

²³Limbah te Samuel hamauh dengan tukang barapi manjoho, “Sarongan isin meto je endau impelaiku dengam te.”

²⁴Limbah te tukang barapi manjoho te manduan bagi je iintih bara isin sapak, palus manyarongae intu taharep Saul. Samuel[18] hamauh, “Jetoh bagi je tantai ingabekengku akam uka tau kinan metoh toh hayak dengan kare oloh je irawei te.[19] Ayo kuman.” Palus Saul kuman. Jadi andau te Saul kuman omba Samuel.

²⁵Limbah te ewen mohon akan eka sombayang te tuntang tame akan lewu. Saul inenga eka batiroh[20] intu huma,[21]

²⁶palus ie batiroh.[22] Hayak jajewu, Samuel mantehau Saul je aton intu hunjun te, koae, “Keleh misik, has aku magah ikau haguet.” Saul misik, palus haguet haya-hayak dengan Samuel.

²⁷Metoh ewen sampai intu saran lewu, Samuel hamauh dengan Saul, “Soho pelayan te mananjong helo bara itah.” Palus pelayan te haguet, tuntang Samuel hamauh tinai, “Tende intu hetoh hanjulo, aku handak mansanan peteh Hatalla akam.”