Read Ngemba Matyo 11 Bible Online

Matyo 11 - Ngemba bible

Matyo 11

¹Mbáʼ Yeso a mɛ́tɨ́nɨ́ a ngá ntɨgə tsen a mbó bɨyɛʼ ɨbyi ba nɨghúm ntsɔb bá lá, wɛrə a ló adiʼ məwa ngɛn a ndiʼə ɨ kɨ soŋnə anu a Ŋwi a mu ntáʼmbagə tsa tsɨ tsínɨ́ ɨ fátə́.

²Mbáʼ Yoane Ngaŋ Nga Nkyi a tsínɨ́ atsáŋ ndzuʼ mbɨ́ʼ ɨnu tsa Kristo a kɨ́nə́ ngɨə lá, a tyígɨ́ bɨyɛʼ ɨbyi bə tse wəmbo ə.

³Bo yén mbítɨ́ a mbó Yeso ngə́, “Soŋ awɨgɨ ə, lá nɨ gho wa Yoane a sóŋnɨ́ ngə́ a ghɨ yen lá kə bɨgɨ ntsiŋə a ŋwɔn adaŋ le?”

⁴Yeso a chwɨ́gɨ́ ngə́, “Bənə ngɛn soŋnə a mbó Yoane anu za nɨ zúʼnə́ nkə́ ndzě ghe:

⁵bɨfɨgɨ bɨŋə ndzě ɨdiʼə, bɨtə́ngórə́kuʼ bɨŋə ntɛ̌m ɨ shiʼnɨ, ɨtɨchwen bɨŋə shwétə́[5] ghe, ɨkfo ɨtú bɨŋə ndzǔʼ ɨnu, bɨkfú bɨŋə nzhwémnə́, bɨ kə sǒŋ Nkən wu Shiʼnɨ a mbó ɨfúm ə.

⁶Ŋwi a mɨ gha nɨdorɨ nə wi a mbó ɨbɛn ba ka bɨ mə́ŋnə́ awa aghə!”

⁷Mbáʼ bɨyɛʼ bɨ Yoane Ngaŋ Nga Nkyi kɨ́nə́ ndǒ adiʼ wa ɨ kwɛn awa lá, Yeso a ghám mbɨ́ʼ a Yoane a mbó ɨnɔ ɨbɛn wa ngə́: “Nkfu za nɨ ghɛ́nɨ́ a mbó Yoane Ngaŋ Nga Nkyi a mu mɨkɨghonɨ lá, nɨ kə́ ngwíʼtɨ́ ndze ake? Azəŋ a ngyɛn á nchíʼnə́ a mu kɨfɛrɨ le?

⁸Nɨ lánɨ́ ngɛn lá a ndzé ake le? A ŋwɔn wa a wɛgɨnɨ ɨtsɛʼ mɨsom le? Ɨbɛn ba bɨ wɛ́gɨ́nə́ awa adzaŋ məwa, bɨ chyɛ̌ lá a ntɔ́ʼ ə!

⁹Soŋnə aghə, nɨ ghɛ́n lá a ndzé ake le? Ntom Ŋwi le? E tsɛʼ a nkənu ə, nɨ zɛ́n a ŋwɔn wa a tsanɨ ntom Ŋwi ə.

¹⁰Mbɨ́ʼ ngə́ aŋwaʼnɨ a Ŋwi a ghám lá mbɨ́ʼ a Yoane Ngaŋ Nga Nkyi ngə́: ‹Ŋwi a sóŋ ngə́, ma mɨ tsagɨ Ntom ɨzan a mbyi gho á ɨ ŋaʼ ndóm a mbó gho ghe.›

¹¹Ma sóŋə́ awən tsɛʼ a nkənu ngə́, Yoane Ngaŋ Nga Nkyi a tsa a ŋwɔn tsum wa a kwɛ́nə ntsi atuəshe. Lá ŋwɔn wa mbáʼ a kɨgɨnɨ ntsa a ŋwɔn tsum a mu Nɨfɔ nɨ fɔməbvurə a tsa a Yoane ghe.

¹²Nchwuʼnɨ nkfu za Yoane a sóŋnɨ́ nkən ɨyi ɨ kɔʼ kuʼ ɨtfúʼ mbyi ɨ sɨŋə, bɨ kwɛ́ʼtɨ́ mbaŋ fɨlam a nye Nɨfɔ nɨ fɔməbvurə, ngaŋ fɨlam kə ntiʼə ndɔ́btɨ́ nkuŋə a mu nɛrə nɨ adaʼ ə.

¹³Ɨ kɔʼ kuʼ a nkfu Yoane, ntóm Ŋwi ɨtsum abɔʼnɨ Nyɔngɔŋ Mǒse kə́ ngamə mbɨ́ʼ Nɨfɔ məna;

¹⁴be nɨ ndǒ ɨ nɨŋ mɨntəm ɨmən a nye nkən wa, Yoane a lá Alaja wa bɨ sóŋnɨ́ ngə́ a láʼ yen lá.

¹⁵Zuʼnə, mbáʼ be nɨ tsi nɨ ɨtoŋnɨ ə!

¹⁶Tɨtsɔŋnɨ, be ma fɨʼnɨ ɨbɛn bɨ tɨtsɔŋnɨ lá bo bɨ ake le? Bo fi ɨbɔ bə bɔrɨ ba bɨ tsinɨ a samnɨ mɨtan ə. Táʼ bagɨ a tɔnkɨnə a mbó bagɨ wu mɔʼɔ ngə́,

¹⁷‹Bɨgɨ búʼ mɨkom mɨ nɨzɔ́ʼ a mbó bən, lá nɨ keʼ awən bɨŋə! Bɨgɨ zɔ́bɨ́ mɨnkyi mɨ nɨvwo a mbó bən, lá nɨ keʼ awən bugə!›

¹⁸Yoane Ngaŋ Nga Nkyi a yén lá, nchigɨ nji tsə ntsaʼtɨ Ŋwi, nkeʼ mɨluʼ kɨ no. Ŋwɔn tsum a sóŋ ngə́, ‹A tsi nɨ dzɨŋ a mu ɨnye zɨə!›

¹⁹Mɔn Ŋwɔn a ghɨnə ngyén, ndzɨ mɨdzɨ nkɨ no mɨluʼ, nɨ soŋ ngə́, ‹Zɛnə a mba wiŋ ə! A nɨ ndánɨdzɨ nkɨ mbe abarə a mɨluʼ, mbe ɨson bɨ bɨkwárɨ́ bɨ ashɛbɨ bo ngaŋ ngɨ mɨbvu bə mɔʼɔ ghe!› Lá bɨ zhyɛ̌ a zóŋ Ŋwi lá a nye ɨnu tsɨ kuʼnɨnɨ tsa ɨbɛn ghɨnə ghe.”

²⁰Ɨbɛn ba bɨ tsínɨ́ a mu ntáʼmbagə tsa Yeso a ghɨ́nɨ́ ɨnu tsɨ yerɨnɨ-yerɨnɨ tsə ghaʼnɨ ɨwu lá, bɨ sé bəŋ mɨntəm ɨma a nye mɨbvu ɨma, ma lan, Yeso a tíʼ nkagɨ ɨbɛn bɨ ntáʼmbagə mətsa ə.

²¹“Wei ngɨ́ʼ zɨ ngwi a nye bɨŋ ə, a Chorəzɨn! Wei ngɨ́ʼ zɨ ngwi a nye bɨŋ ə, a Bɛtɨsaida! Ɨnu tsɨ yerɨnɨ-yerɨnɨ tsa bɨ ghɨ́nɨ́ a nye bən, bɨ bé ghɨ a tsɛrə lá a Taya bo Saidɔn, muŋ ɨbɛn ba ɨwu, ɨ lɔgɨnɨ a lɔʼkwam, bɨ wəgɨnɨ ɨtsɛʼ adzə́ŋnɨ nkɨ fuʼ ɨtumbəm ɨtsa nɨ abvu, a ndiʼə ngə́ bo bəŋnə mɨntəm ɨma a nye mɨbvu ɨma ghe!

²²Ma sóŋə́ awən tsɛʼ a nkənu ngə́ Ŋwi a lo kó a mɨlɨŋnɨ wu ngwi a Njwi Nɨsáʼ a nye Taya bo Saidɔn ɨ tsa awɨŋ ə.

²³A mbó bən nə Kabɛrɨnaum! Nɨ kə́ ndǒ ntsɔʼ ɨtumbəm ɨtsən ɨ kɔʼ ghɛn nɨ tsɛrə a fɔməbvurə le? Bɨ ghɨ zhwíbɨ́nɨ́ awən a mu ɨmugɨ nɨnkoŋ ə! Ɨnu tsɨ yerɨnɨ-yerɨnɨ tsa bɨ ghɨ́nɨ́ a nye bən, bɨ bé ghɨ a tsɛrə lá a nye bə Sodom, muŋ tsɨ bvurɨ ntsi ɨ kɔʼ kuʼ sɨŋə ghe!

²⁴Nɨ tsi nɨ njiɛ tsɛʼ a nkənu ngə́ Ŋwi a lo diʼ akômɨlɨŋnɨ zə wi a Njwi Nɨsáʼ zɨ be a mbó bə Sodom ɨ keʼ a mbó bən be!”

²⁵A nkfu məwa Yeso a sóŋ ngə́, “Tarɨ, Maʼmbyí, gho wa o tsinɨ nɨ fɔməbvurə abɔʼnɨ atuəshe! Ma gha a mɨya a mbó gho mbɨ́ʼ ngə́ o diʼnə a mbó ɨbɔ bə bɔrɨ ɨnu tsa o lwɛʼnɨ a mbó ba bɨ kwaʼtɨnɨ ngə́ bo nɨ bə zóŋ abɔʼnɨ bə ayigɨnɨ ə.

²⁶Eŋə, a Ta ɨghan, nə nɨ adzaŋ za o kɨ́nə́ ndǒ ngə́ á ghɨ fúə.

²⁷Ta ɨghan a ghanə ɨdzúm ɨtsum a mbó me ghe. Ka ŋwɔn tse a zhi ayi a Mɔn ntsa a Tarɨ, ŋwɔn tse a keʼ kɨ nji a Tarɨ ntsa a Mɔn abɔʼnɨ ba Mɔn a zarɨnɨ taŋ ɨ kyɛʼ a ta ɨyi a mbó bo ghe.

²⁸Bən ba nɨ byɛʼnɨ ɨbyɛʼ tsɨ dɨrɨnə, nɨ kɨ nkan, á nɨ yen a mbó me á ma gha ashwetɨ a ntəm a mbó bɨŋ ə.

²⁹A nɨ kwarɨ ɨnu tsa ma diʼnə, ngyɛʼ anu a mbó me, mbɨ́ʼ ngə́ ma bɔnɨ nkaʼ nkə́ ntsɛ́gɨ́nɨ́ ntəm; nɨ mɨ tiʼ tsi nɨ ashwetɨ a ntəm ə.

³⁰Mbɨ́ʼ ngə́ ɨnu tsa ma diʼnə awən nɨ tsɛrə tsɨ waŋnɨ a njíɛ, abyɛʼ za ma mɨ gha a mbó bən ngə́ á nɨ byɛʼ a yaŋə.”