Read Ngemba Matyo 13 Bible Online

Matyo 13 - Ngemba bible

Matyo 13

¹Tsɛʼ njwi məwa Yeso a ló a ndá wa ngɛn ɨ shiʼtɨ ntsi a ngə́rɨ́ sagɨrə, ɨ sóŋə́ anu a Ŋwi ə.

²Ɨnɔ ɨbɛn wa ɨ kárɨ́sɨ́nɨ́ ayi ɨ gháʼ be tɨ́sə́n adzaŋ za wɛrə tíʼnɨ́ nkón a mu abaŋ a nkyi ɨ shiʼtɨ ntsi ɨwu, ɨnɔ ɨbɛn wa tɛmnkɨ a ngə́rɨ́ ghe.

³A lɔ́gɨ́ mɨgham mə nanɨ ɨ fɨʼtɨ ɨnu tsə ghaʼnɨ ə. Wɛrə a sóŋ ngə́: “A nkfu tse ŋwɔn tse a fú ngɛn a mbi nchwi ɨzhi ɛ.

⁴Adzaŋ za a kɨ́nə́ mbǐ ɨshwom ɨyi wa lá, nchwi za zɨ tse vwókɨ́ alaŋ a ndóm, bɨsɨ́ŋ yen ɨ sɛʼ nkfurɨ ə.

⁵Zɨ mɔʼɔ vwókɨ́ atú aláŋsə́ ngɔʼ adiʼ wa ɨshe sé ɨwu ghaʼtə. Nchwi za wáŋnɨ́ ntóm, mbɨ́ʼ ngə́ ɨshe sé ɨwu shwitə.

⁶Lá nɨnyom a ghɨnə ntá ntiʼə nkfúnə́, ntɔn nchwi za ɨ bvúrɨ́nɨ́ ntóm tsɛʼ tomnɨ lá mbɨ́ʼ ngə́ mɨngaŋ mɨ nchwi za sé a tɨshe shwitɨ, nchwi za ɨ tómnkɨ́nɨ́ lá ɨ zómnkə́.

⁷Nchwi za zɨ mɔʼɔ vwókɨ́ a tɨtərɨ kyɛrə-kyɛrə, kyɛrə-kyɛrə wa a kwi, ndzɔŋ ndzɔŋ sɔbtɨ nchwi za mbyigɨ a tɨshe.

⁸Lá mbum nchwi tsa tsə mɔʼɔ vwókɨ́ atú ɨshe nɨkomə ɨ fɨgɨ nchwi zɨ shiʼnɨ ə. Tsɨ tse fɨ́gɨ́ mbum nchwi táʼ nkɨ, tsə mɔʼɔ mɨghúm mi ntugə, tsə mɔʼɔ mɨghúm mɨntárə́ ghe.”

⁹Yeso a lwɨ́gɨ́nɨ́ ɨ soŋ ngə́, “Be nɨ tsi nɨ ɨtoŋnɨ nɨ zuʼə!”

¹⁰Bɨyɛʼ ɨbyi tíʼ ngyen wəmbo mbitɨ ngə́, “O tɨ ghamə a mbó ɨbɛn o nanɨ nɨgham ɨno ɨ nanɨ lá mbɨ́ʼ ake le?”

¹¹Yeso a chwɨ́gɨ́ ngə́, “Bɨ ghanə azhyɛ mbɨ́ʼ ɨnu nkubə tsə Nɨfɔ nɨ fɔməbvurə a mbó bən, lá nkeʼ a mbó bo be.

¹²Mbɨ́ʼ ngə́ ŋwɔn tsum wa a tsinɨ nɨ azúm; bɨ ghɨ kwiʼtɨ, taŋ á tiʼ ntsi nɨ zɛrə á ghaʼ be tɨsɨŋə; lá ŋwɔn wa a tsinɨ mbômbô, tsɛʼ mɨnyiə wa a tsi nɨ wɛrə lá, bɨ ghɨ kwárə́.

¹³Ma nǎ mɨgham a mbó bo lá mbɨ́ʼ ngə́ bo liŋə nkeʼ ndzě ghe, njwíʼtə́ nkeʼ ndzúʼə kə ɨ zuʼ kɨ zhyɛ.

¹⁴Ma lan, anu za ntom Ŋwi Asaya ɨ kwɛ́nə sóŋ a bom a nye bo ngə́: ‹Ŋwi a soŋ ngə́, “Ɨbɛn benə bɨ lo bɨ zhwiʼtɨ nkwiʼ njwiʼtɨ, lá ɨ keʼ zuʼ nkɨ nji anu za a nɨ zɛrə; bo ghɨ len ɨ kwiʼ len lá ɨ keʼ ze,

¹⁵mbɨ́ʼ ngə́ bɨ fɨŋ mɨntəm ɨma, bɨ kwem mɨfə a mu ɨtoŋnɨ ɨtsa nkɨ nchwubtɨ ɨmɨgɨ ɨma ghe. Ntú lá be muŋ ɨmɨgɨ ɨma mɨ ze, á ɨtoŋnɨ ɨtsa zuʼ, á ɨtú ɨtsa zuʼ nkɨ nji anu za a tsinɨ ɨwu, á bo tiʼ mbəŋ awa ngyen a mbó me, á ma tiʼ ntsuʼ awa ghe.”›

¹⁶A mbó bən, atú azən a bɔŋ be tɨsɨŋə! Ɨmɨgɨ ɨmɨŋ zě, ɨtoŋnɨ ɨtsɨŋ kə́ ndzúʼə ghe.

¹⁷Ma sóŋə́ a mbó bən tsɛʼ a nkənu ngə́ ntóm Ŋwi tsə ghaʼnɨ abɔʼnɨ ɨbɛn bə chinɨnɨ bə ghaʼnɨ kə́ ndánə́ ndǒ ndzě anu za nɨ zɛ́nə́, lá bo kɨ chi keʼ ze, ɨ kɨ zuʼ anu za nɨ zúʼnə́ lá bo kɨ chi keʼ zuʼə.”

¹⁸“Nɨ tiʼ lá njwiʼtɨ, ngyɛʼ anu za nɨgham nə nanɨ mbɨ́ʼ a ŋwɔn ngwarɨ mɨdzɨ a nɨ diʼnə.

¹⁹Ɨbɛn ba mbáʼ bɨ zuʼnɨ nkən mbɨ́ʼ Nɨfɔ nɨ Ŋwi, lá nkeʼ zuʼ nkɨ nji, bo be lá tso mbum nchwi tsa tsɨ vwókɨ́nɨ́ alaŋ a ndóm lá. Wu Ntɔmnɨnɨ a yen ɨ fe nkən wa bo zúʼnɨ́ lá ngɛn nɨ wɛrə ghe.

²⁰Mbum tsa tsɨ vwókɨ́nɨ́ atú aláŋsə́ ngɔʼ be lá tso ɨbɛn ba bɨ kwarɨnɨ nkən wu shiʼnɨ nɨ nɨdorɨ tsɛʼ mbáʼ bɨ byinɨ soŋə.

²¹Lá ɨ bvurɨ mɨngaŋ a ntəm bo tɨ twəŋ, bo tsitɨ tsɛʼ a nye məkum a nkfu ə. Ma lan, ngɨ́ʼ abɔʼnɨ ndɨgə yen mbɨ́ʼ nkən wa, bo byi nyɛʼ a wɛrə nkɨə awa ghe.

²²Mbum tsa tsɨ vwókɨ́nɨ́ a mu kyɛrə-kyɛrə be lá tso ɨbɛn ba bɨ zuʼnɨ nkən wa, lá ɨnu atuəshe abɔʼnɨ akɔŋnɨ za bo tsinɨ nɨ zɛrə a nye afuʼ, tsɨ lo ɨ fumsɨ nkən wa ɨ keʼ mɨntam mə tsɛrə konə.

²³Mbum tsa tsɨ vwókɨ́nɨ́ atú ɨshe nɨkomə lá, be lá tso ɨbɛn ba bɨ zuʼnɨ nkən wa, ndzuʼ nkɨ nji anu za ɨ diʼnɨ; bo konɨ mɨntam, bə tse nkfu nkɨ wu fɨgɨnɨ, bə mɔʼɔ nkfu mɨghúm mi ntugə, bə mɔʼɔ nkfu mɨghúm mɨntárə́ ghe.”

²⁴Yeso a kwíʼ nkɨ́ ná nɨgham nen a mbó bo ngə́: “Nɨfɔ nɨ fɔməbvurə be lá ɨ nanə ghe. Ŋwɔn tse a bí mɨdzɨ a mu ɨshwom ə.

²⁵Nɨ ɨtfúʼ tse mbáʼ ŋwɔn tsum a kɨ́nə́ ndyě, ngaŋ kɨban a yen mbi atəsɔŋ a tɨtərɨ nchwi za, ntiʼ ndo ayi ɛ.

²⁶Mbáʼ mɨdzɨ ma kwínɨ́ nchwuʼ ɨ maʼ mɨsaŋ, atəsɔŋ za a kɨ nkwi wəbɔʼ ə.

²⁷Ngaŋ afaʼ mboŋ ɨshwom wa yén ɨ soŋ wəmbo ngə́, ‹Tə̧, be o bí lá ngwəgɨ mɨdzɨ tsɨ shiʼnɨ a mu ɨshwom wa le? A tiʼ ntsa lá ɨ nə́ atəsɔŋ a nyam wəbɔʼ le?›

²⁸A chwɨ́gɨ́ a mbó bo ngə́, ‹A nɨ afaʼ a ŋwɔn kɨban ə.› Ngaŋ afaʼ tsa bítɨ́ wəmbo ngə́, ‹O lǒ ngə́ á bɨgɨ ghɛn ɨ so atəsɔŋ za le?›

²⁹Mboŋ ɨshwom a chwɨ́gɨ́ ngə́, ‹Ngáŋ; mbɨ́ʼ ngə́ a só atəsɔŋ za nɨ chi zɔŋ chwɛʼtɨ nchwi za wəbɔʼ ə.

³⁰Nyɛʼtɨnə á ɨtsum tsi bá kwi nkɔʼ nkuʼ a nkfu ɨ fuʼə ghe. Ma mɨ tiʼ soŋ a mbó ngaŋ ɨ fuʼə ngə́ ghǒtɨnə atəsɔŋ za a ntsambyi, nkórɨ́kɨnə a nye mɨbɨŋ ntɔn lá ngotɨ mɨdzɨ ma ɨ saŋ a mu ntaŋ mɨdzɨ ɨghə.› ”

³¹Yeso a kwíʼ ná nɨgham nə mɔʼɔ a mbó bo ngə́, “Nɨfɔ nɨ fɔməbvurə be lá tso ndzaŋ ɨsa za ŋwɔn a binɨ a mu ɨshwom zɨə.

³²Ɨ kɨ́gɨ́ ntsa ndzaŋ ɨtsum ə, lá ɨ ghɨ nkwí, ɨ be tso mɨnya mɨ atɨ; adzaŋ za bɨsɨ́ŋ kónə́ ngvǔ nkə ɨtsa a nye mbó ɨmyi ɛ.”

³³Yeso a kwíʼ nkɨ́ ná nɨgham nə mɔʼɔ a mbó bo ngə́, “Nɨfɔ nɨ fɔməbvurə be lá tso ngə́ mangye a lɔgɨ mbɛgə ntɔbɨ a mu ɨtú ɨkáŋ abán tsi tárə́[8], abán za tɛm ɨ fugɨ nkɔʼə.”

³⁴Ɨnu tsiŋ ɨtsum Yeso a sóŋ a mbó ɨnɔ ɨbɛn wa a mu mɨgham mə nanɨ ə; a nkənu a sé anu zə tsɛrə a mbó bo soŋ tɨgha a ná a zɛrə nánə́.

³⁵A kə́ ngɨə mə lan lá taŋ á kɔʼ mbomnkɨ bo ɨnu tsa ntom Ŋwi[9] kwɛ́nə́ soŋ ngə́: “Ma mɨ tɨ ghamə a mbó bo ɨ na nɨgham, ma mɨ soŋ ɨnu tsa bɨ kwɛ́nɨ́ ndwɛ́ʼ a mbó bo nchwuʼnɨ nkfu za Ŋwi a káʼnɨ́ mbyi ɛ.”

³⁶Yeso a ghɨnə nyɛʼtɨ ɨnɔ ɨbɛn wa ngɛn a mu ndá, bɨyɛʼ ɨbyi yen soŋ wəmbo ngə́, “Fɨʼtɨ awɨgɨ nɨ anu za nɨgham nə nanɨ mbɨ́ʼ ngvúŋ a mu ɨshwom diʼnə.”

³⁷Yeso a chwɨ́gɨ́ ngə́, “Ŋwɔn wa a bínɨ́ mɨdzɨ ma lá, a nɨ Mɔn Ŋwɔn;

³⁸ɨshwom wa ɨ be mbyi ziŋə; mbum ɨdzum tsɨ shiʼnɨ tsa bɨ bínɨ́ lá be ɨbɛn bɨ Nɨfɔ na; ngvúŋ za be ɨbɛn bɨ Wu Ntɔmnɨnɨ,

³⁹ŋwɔn kɨban wa a bínɨ́ ngvúŋ za lá a be Dəbɨrɨ ə. Ɨfuʼ mɨdzɨ za ɨ be ndwitɨ mbyi, bɨfuʼ bɨ mɨdzɨ ma be bɨtsen bɨ ndá bɨ Ŋwi ə.

⁴⁰Tsɛʼ adzaŋ za bɨ sónɨ́ ngvúŋ za ngotɨ ntɔn nɨ ɨmugɨ lá, nə nɨ adzaŋ za a ghɨnɨ bé a ndwitɨ mbyi ɛ.

⁴¹Mɔn Ŋwɔn a ghɨ tsagɨ bɨtsen bɨ ndá bɨ Ŋwi ɨbyi, á bɨ tye ɨbɛn ba bɨ tíntɨ́nə́ a bə mɔʼɔ bɨ ghɨnɨ ɨbvu abɔʼnɨ ba bɨ ghɨnɨ ɨbvu bo mboŋ ɨ fu nɨ bɛrə a mu Nɨfɔ ɨni,

⁴²á bo tiʼ maʼ awa a mu ɨmugɨ nɨnkoŋ, adiʼ wa bo ghɨnɨ búgɨnə ɨ kə́ kfúrɨnə mɨsɔŋ ɨma ghe.

⁴³Ɨbɛn bə chinɨnɨ ghɨ tíʼ tá tso nɨnyom a mu Nɨfɔ nɨ Ta ɨwa ghe. Zhwiʼtɨnə lá, mbáʼ be nɨ tsi nɨ ɨtoŋnɨ ə!”

⁴⁴“Nɨfɔ nɨ fɔməbvurə be tso ɨnə. Ŋwɔn a zɛn azúm atɨŋndvuŋ zə tsɛrə za bɨ lwɛʼnɨ a mu ɨshwom ə. Mbə nyaʼ mbɔmtɨ wədiʼ ntiʼə ndánə́ ndórə́ a nye mbon wa a kwɛnɨ ngɛn ɨ fen azúm atsum za zɨə tsinɨ nɨ zɛrə, ntiʼ mbə ngɛn ndzuŋ ɨshwom wa.”

⁴⁵“A nkwiʼtə, Nɨfɔ nɨ fɔməbvurə be lá tso ɨnə. Ŋwɔn a lǒ mbaŋətuʼ tsa tsɨ ŋwenɨnə,

⁴⁶a ghɨnə ndzɛ́n a zɨ tsɛrə za ɨ ŋwenɨnə be tɨ́sə́n, ngɛn ɨ fen azúm atsum za zɨə tsinɨ nɨ zɛrə, ntiʼ ndzuŋ mbaŋətuʼ za.”

⁴⁷“A nkwiʼtə, Nɨfɔ nɨ fɔməbvurə be lá tso ɨnə. Ɨbɛn bɨ achwiʼ bə tsɛrə máʼ nɨghoŋ ɨna a mu sagɨrə, nko ɨbə́ŋ ɨshwú tsɛʼ ɨtsum ə.

⁴⁸Nkfu za nɨghoŋ na lonɨ, bo shwuŋ ngɛn nɨ nɛrə a ngə́rɨ́ ntiʼ ntsi a ɨshe a ntye ɨshwú tsa: tsɨ shiʼnɨ ɨ kon a mu ɨlonga ɨtsa, tsɨ tɨbɔŋ bo nyɛʼnə.

⁴⁹A ghɨ kɨ́ bé lá adzaŋ məwen a ndwɨgɨnɨ mbyi ɛ: bɨtsen bɨ ndá bɨ Ŋwi ghɨ fú abyɛn, ɨ tye bɨntɔmnɨnɨ a tɨtərɨ ɨbɛn bə shiʼnɨ

⁵⁰ɨ maʼ awa a mu ɨmugɨ nɨnkoŋ, adiʼ wa bɨ ghɨnɨ tíʼə búgɨnə ɨ kə́ kfúrɨnə mɨsɔŋ ɨma ghe.”

⁵¹Yeso a bítɨ́ bɨyɛʼ ɨbyi ngə́, “Nɨ zúʼə nkə́ njǐ anu za ɨnu tsiŋ diʼnɨ le?” Bo chwɨ́gɨ́ ngə́, “E.”

⁵²Ma lan, Yeso a tíʼ mbyigɨ ngə́, “Məzen a tiʼ ndiʼ lá ngə́, ndiʼ nyɔngɔŋ tsum wa a tiʼnɨ ngyɛʼ a mu Nɨfɔ nɨ fɔməbvurə a fi lá a mboŋ ndá wa a fɨgɨnɨ ɨdzúm tsə fi abɔʼnɨ tsə lvuŋ a mu ntaŋ nɨle ɨyi ɛ.”

⁵³Yeso a ghɨnə mɛ́tɨ́ a ná ɨnu tsen, ndo adiʼ wa,

⁵⁴ntiʼ mbə́ ngɛn a ntáʼmbagə bo ghe. A díʼ anu a Ŋwi a mu ndáŋwi bə Yuda, ɨbɛn ba bɨ zúʼnɨ́ wə ntsu a kɨ́ʼnɨ́ awa ghe. Bo bítɨ́ ngə́, “A lanɨ ndɔgɨ abə́ŋ a zóŋ məzen lá ɨ ghé le? A kɨ ndɔgɨ mɨtən lá ɨ ghé a ngɨ ɨnu tsɨ yerɨnɨ-yerɨnɨ tsen le?

⁵⁵A se mɔn nkɔm atɨ wa a wen be le? Ɨkum nɨmi ɨyi se Mɛrɨ be le? Ɨbɔmbɨma ɨbyi bə mbáŋnɨ́ se Jemsɨ, Yosɛb, Samɔn abɔʼnɨ Yudasɨ be le?

⁵⁶Ɨbɔmbɨma ɨbyi bə bəngye bɨtsum se bɨgɨ bo ɨghan nchyɛ̌ le? A lanɨ tiʼ ndɔgɨ a tsenə ɨtsum lá ɨ ghé le?”

⁵⁷Ma lan, bo tón awa ayi ɛ. Yeso a sóŋ a mbó bo ngə́, “Bɨ dǐʼ mbɔm zɨ shiʼnɨ a mbó ntom Ŋwi tsɛʼ ɨdiʼ ɨtsum, lá nkeʼ mə lá be alaʼ bo kə a ngwəgɨ bo ghe.”

⁵⁸Mbɨ́ʼ ngə́ bo sé nɨ abeməntəm tsi, a sé ɨnu tsɨ yerɨnɨ-yerɨnɨ tsɨ ghaʼtɨnɨ ɨwu ghɨə.