Read Ngemba Matyo 14 Bible Online

Matyo 14 - Ngemba bible

Matyo 14

¹A bé a nkfu məwa lá, Ɛrɔd, ŋwɔn wa a kɨ́nə́ sáʼə Mbuʼ Galili, a zúʼ anɛʼɛtɨ a Yeso;

²ɨ soŋ a mbó bɨkum ɨbyi ngə́, “A lanɨ mbe lá Yoane Ngaŋ Nga Nkyi wa, mbáʼ a zhwemnɨnɨ a mbó nɨvwo, nə nɨ anu za a tsinɨ nɨ mɨtən a ngɨ ɨnu tsɨ yerɨnɨ-yerɨnɨ lá.”

³Mbɨ́ʼ ngə́ Ɛrɔd a kwɛ́nə soŋ bɨ ko a Yoane, ngɨ bɨ korɨ nɨ mɨnkɨ mɨ atɨŋə, ɨ nɨŋ atsáŋ ə. A ghɨ́ mə lan lá mbɨ́ʼ a Ɛrodiasɨ, ngwe mɨma Ɛrɔd wa bɨ kɨ́nə́ ntɔ́ŋə́ ngə́ Firɨbɔ ghe.

⁴A nye abaŋ zə tse, Yoane Ngaŋ Nga Nkyi a kə́ sóŋə́ a mbó Ɛrɔd nɨ nkfu nɨ nkfu ngə́, “Ka a kuʼnɨ ayi a mbó gho a ndzɔ́ʼ Ɛrodiasɨ ə!”

⁵Ɛrɔd a tíʼə ndǒ njwitɨ wɛrə, lá mbɔ́gɨ́ ɨmɨgɨ mɨ bə Yuda, mbɨ́ʼ ngə́ bo lɔ́gɨ́ a Yoane a nye ntom Ŋwi ə.

⁶A ghɨnə mbé njwi nɨdorɨ mbɨ́ʼ njwi za bɨ jwínɨ́ a Ɛrɔd, mɔn Ɛrodiasɨ wu mangye a ŋwɛ́ʼ mbɨŋ a ɨshi ngǒtə ɨbɛn za ɨ tsínɨ́ ɨwu tsum ə. Anu zə wu a lánɨ́ mbɔŋ a Ɛrɔd a nye ndóm wa

⁷a káʼnɨ́ a mɔn wa ngə́, “Ma kan nɨ ntəm ɨghə ɨtsum ngə́ ma mɨ gha agho nɨ azúm atsum za o bitɨnə!”

⁸Nɨmi ɨyi a tótɨ́ ayi ngə́ á soŋ a mbó Ɛrɔd ngə́, “Gha aghan, adiʼ wɛnə, tɨtsɔŋnɨ, nɨ atú a Yoane Ngaŋ Nga Nkyi a mu akáŋ asəŋ ə!”

⁹Ɨfɔ wa a dzə́ŋnə́, lá mbɨ́ʼ akaʼ za wɛrə a kwɛ́nə ngɨ a ɨshi bɨghən ɨbyi bɨtsum, a sóŋ ngə́ á bɨ ghɛn ngɨ adzaŋ za mɔn wa a bítɨ́nɨ́ lá.

¹⁰A tíʼ sóŋ bɨ ghɛn sobɨ atú a Yoane a ndá atsáŋ wa.

¹¹Bɨ yén nɨ atú za a mu akáŋ asəŋ nga a mbó mɔn mangye wa, a lɔgɨ ngɛn nɨ zɛrə a mbó nɨmi ɨyi ɛ.

¹²Bɨyɛʼ bɨ Yoane yén mbyɛʼ akəbyim a Yoane ngɛn ntwə́ŋə́; ntíʼ ngɛ́n sóŋ a mbó Yeso ghe.

¹³Mbáʼ Yeso a zúʼnɨ́ anu za a fúnɨ́ a nye Yoane lá, a ló adiʼ wa a mu abáŋ a nkyi ngɛn a nkubə, ntsi ɨwu zɨzɨ ə. Ɨbɛn zúʼ mbɨ́ʼ a məzen, ntiʼ ndo nɨ ntáʼmbagə ɨtsa ɨ nyəŋ nɨ mɨku, ndzɔŋ a Yeso ghe.

¹⁴Yeso a fú a mu abáŋ a nkyi za a ngə́rɨ́ sagɨrə wa, ndzɛn ɨnɔ ɨbɛn, mɨlɨŋnɨ ɨwa a lon wə ntəm, a tiʼ ntsuʼ a ba bɨ kɨ́nə́ ngǒ ghe.

¹⁵A nkwɛfɔ məwa, bɨyɛʼ ɨbyi yén wəmbo ɨ soŋ ngə́, “Nkfu lanɨnə ntsa be tɨ́sə́n, ɨbɛn keʼ adiʼ wen a nkə́ nchyɛ̌ ghe. Soŋ a mbó ɨbɛn ben á bo shɛmnɨ ngɛn nɨ ɨtóm ɨtóm ndzuŋ mɨdzɨ a mbó ɨtumbəm ɨtsa ɨwu ə.”

¹⁶Yeso a chwɨ́gɨ́ ngə́, “Ka bo tsi awa nɨ ndǒ adiʼ wiŋ ə. Bɨŋ mboŋ, ghanə azúm á bo dzɨə!”

¹⁷Bo byígɨ́ ngə́, “A nu tsɛʼ mbɛʼ abán tsi tə̧̂ abɔʼnɨ ɨshwú tsi bá mbáʼ bɨgɨ tsinɨ nɨ tsɛrə ghe.”

¹⁸Yeso a sóŋ ngə́, “Yenə nɨ tsɛrə a mbó me ɨghə.”

¹⁹A sóŋ a mbó ɨbɛn ba ngə́ á bo tsi atú ngyɛn; ntiʼ ndɔgɨ mbɛʼ abán tsa tsi tə̧̂ abɔʼnɨ ɨshwú tsa tsi bá, mbiʼ atú azhi ndyiŋ fɔməbvurə, ntiʼ ntsaʼtɨ a Ŋwi ə. A bátɨ́ mbɛʼ abán tsa ntiʼ nga a mbó bɨyɛʼ ɨbyi, bɨyɛʼ ɨbyi tiʼ ngyɛbɨ a mbó ɨbɛn ba.

²⁰Ŋwɔn tsum a dzɨ́ nzhwúrə́. Bɨyɛʼ ba tíʼ mbə ngotɨ abvuʼ a mɨdzɨ za a bvúrɨ́nɨ́ a luŋ nkye nɨghúm ntsɔb bá ghe.

²¹Ndvuŋ ɨbɛn wa ɨ dzɨ́nɨ́ ɨ kúʼ nchwuʼ tsi tə̧̂, tɨ kwaʼ bəngye bo bɨ ɨbɔ ə.

²²Yeso a tíʼ ngɨ bɨyɛʼ ɨbyi kon a mu abáŋ a nkyi za, ntsambyi ngɛn a ndáŋ ndzɨŋə sagɨrə wa, wɛrə a tsi a ndzum ntiʼ ngɨ ɨbɛn ba kwenkə.

²³A ghɨnə sóŋ ɨbɛn ba shɛmnɨ, a kɔʼ ngɛn atú a ntáʼ zɨzɨ a ntsaʼtɨ Ŋwi ə. A ghɨnə mbé a nkwɛfɔ, Yeso a tsi ɨwu zɨzɨ ə;

²⁴a nyom məwa, abáŋ a nkyi za a kónə ngɛn nəghagɨ a mu sagɨrə wa. Nkyiɛ yiŋənɛmə ɨ kə́ ngyiŋə ntúmə́ nkɔʼə ngěn nɨ zɛrə atɨ́ mbɨ́ŋə́ shíʼə, mbɨ́ʼ ngə́ kɨfɛrɨ a kə́ njintə abáŋ a nkyi za.

²⁵A tɨtərɨ bɨnyom bɨtárə́ bo bɨnyom bi ntugə, a tənjwi, Yeso a ghɛ́n nkwatɨ bɨyɛʼ ɨbyi, wɛrə a kə́ ntɛ́mə́ ngěn atú nkyi ɛ.

²⁶Bo ghɨnə ndzɛ́n ayi a tɛmə ngěn atú nkyi, ntsi nɨ nɨbɔgɨ be tɨsɨŋə. Bo tɔ́nkɨ́ nɨ nɨbɔgɨ ɨ soŋ ngə́, “A nɨ nkfúshe!”

²⁷Yeso a byí ngam a mbó bo ɨ soŋ ngə́, “Chigɨnɨ ntəm ə! A nɨ me ghe. A nɨ keʼ bɔgə!”

²⁸Bita a chwɨ́gɨ́ a Yeso ngə́, “Maʼmbyí, be a be gho a nkənu, ghɨ á ma ntɛ́mə́ ngěn atú nkyi ngyen mbom agho.”

²⁹Yeso a chwɨ́gɨ́ ngə́, “Yiŋə!” Bita a tíʼ fú a mu abáŋ a nkyi za mbiʼnɨ ntɛ́mə́ ngěn atú nkyi ɨ ghɛn bom a Yeso ghe.

³⁰Lá Bita a ghɨnə ndzɛ́n a kɨfɛrɨ wu ntən, ntsi nɨ nɨbɔgɨ, mbiʼnɨ ɨ shiʼ ghɛn a mbyi nkyi ɛ. A búgɨ́ ɨ soŋ ngə́, “Maʼmbyí, loŋ aghə!”

³¹Nkfu zi mɔ́ʼɔ́ Yeso a tságɨ́ abó azhi nchwa ayi ɨwu ɨ soŋ ngə́, “Abeməntəm azo a kɨ́gɨ́ be tɨsɨŋə! O chi məŋnɨ lá ngə́ ke le?”

³²Bo wa bɨbá bɨ kón a mu abáŋ a nkyi za, kɨfɛrɨ wa tiʼ mbɔrə.

³³Bɨyɛʼ bɨ Yeso ba a mu abáŋ a nkyi za tíʼ ngúʼsɨ́ a Yeso, ɨ sóŋə́ ngə́, “Tsɛʼ a nkənu, o lá Mɔn Ŋwi ə!”

³⁴Bo dáŋ a sagɨrə wa ɨ fú nkón a ɨshe Gɛnɛsarɛ,

³⁵ɨwu, ɨbɛn ba zhí a ŋwɔn wa Yeso a nɨ wɛrə ghe. Ma lan, bo tíʼ ntsagɨ mɨnkən a mbó ngaŋ mɨghɔ a mu mbuʼ za tsum, bɨ tiʼ ngyen nɨ bo a mbó Yeso ghe.

³⁶Bo búʼtɨ́ mbó wəmbo ngə́ á wɛrə a nyɛʼtɨ á ngaŋ mɨghɔ tsa mɔmtɨ tsɛʼ atsə́ŋ atsɛʼ azhi; bo wa bɨtsum ba bɨ mɔ́mtɨ́nɨ́ a zɛrə, bɨ shwétə́.