Read Ngemba Matyo 15 Bible Online

Matyo 15 - Ngemba bible

Matyo 15

¹Bə Farisao bə tse abɔʼnɨ bɨdiʼ bɨ nyɔngɔŋ bɨ ló a Yerosalɛm ngyen mbitɨ a Yeso ngə́,

²“Bɨyɛʼ bo se ndzúʼnɨ́ ɨnu tsa bɨta ɨbɨgɨnə bə kɔ́ʼɔ́nguʼ díʼnɨ́ lá ngə́ ke le? Ka bo sugə awa mbó ɨma ndzɔ́ŋə́ adzaŋ za a tsinɨ a mu Nyɔngɔŋ bɔŋ ɨ dzɨə!”

³Yeso a chwɨ́gɨ́ ngə́, “Nɨ tiʼ nkeʼ ntɨgə Ŋwi a ndě mbáŋnə́ ndzɔŋə be ɨnu ɨtsən tsa nɨ diʼnə lá ngə́ ke le?

⁴Mbɨ́ʼ ngə́ Ŋwi a sóŋ ngə́, ‹Diʼ mbɔm zɨ shiʼnɨ a mbó ta ɨgho bo nɨmi ɨgho ghe.› Nkɨ nkwiʼtɨ ngə́, ‹Ŋwɔn tsum wa a ghamnɨ ɨnu tsɨ tɔmnɨnɨ mbɨ́ʼ a ta ɨyi kə nɨmi ɨyi, bɨ tsi nɨ njwitɨ zɨə.›

⁵Lá nɨ diʼə ngə́ be ŋwɔn a tsi nɨ azúm za a chinɨ lɔgɨ ɨ kwatɨ a ta ɨyi bo nɨmi ɨwu, lá mbə soŋ ngə́, ‹Zɛnə, a nɨ zə Ŋwi ə,›

⁶ka a tsi ayi nɨ ɨ bə kɔʼsɨ a ta ɨyi atɨ́ ə. Mbáʼ nɨ ghɨnə mə lan lá, nɨ wágɨ́nɨ́ ntɨgə Ŋwi, mbɨ́ʼ ngə́ nɨ lǒ ndzɔŋ ɨnu tsa nɨ diʼnə ghe.

⁷Bɨŋ ngaŋ ngɨ ɨtsi! Ntom Ŋwi Asaya kwɛ́ nkuʼnɨ be tɨ́sə́n a sóŋə́ mbɨ́ʼ awən ngə́,

⁸‹Ŋwi a soŋ ngə́, “Ɨbɛn ben, bo kɔ́ʼsə́ aghan atɨ́ tsɛʼ nɨ ɨwəŋ ntsu ɨtsa, lá mɨntəm ɨma tsi nəghagɨ a nye me ghe.

⁹Bo ghúʼsə́ aghə atú adaŋədaŋə, mbɨ́ʼ ngə́ bo dǐʼ ntɨgə tsa a ghɨnɨ ŋwɔn mɨsɔŋ tso ngə́ a nɨ bɨnyɔngɔŋ ɨbə!”›”

¹⁰Yeso a tíʼ ntɔ́ŋ ɨnɔ wa ɨ soŋ a mbó bo ngə́, “Zhwiʼtɨnə nkɨ ndzuʼ nkɨ njinə anu za a benɨ zɛrə ghe!

¹¹Ka a be ayi azúm za ŋwɔn a dzɨ́nə́ mbáʼ a ghɨnə ŋwɔn a keʼ fɛm a ɨshi ɨmɨgɨ Ŋwi; a baŋnɨ mbe be za ŋwɔn a fɨ́gɨ́nə́ sóŋə́ nɨ ntsu ɨyi mbáʼ a ghɨnə a keʼ fɛm a ɨshi ɨmɨgɨ Ŋwi ə.”

¹²Bɨyɛʼ ɨbyi tíʼ ngyen soŋ wəmbo ngə́, “O zhi ngə́ anu za o sóŋnɨ́ lá a tsə́ŋ mɨntəm mɨ bə Farisao le?”

¹³Yeso a chwɨ́gɨ́ ngə́, “Atɨ atsum za Ta ɨghan a fɔməbvurə a sé bi, bɨ ghɨ dvuŋ a zɛrə ghe.

¹⁴A nɨ keʼ ɨnye ɨtsən a mbúʼə mbɨ́ʼ awa ghe! Bo lá bɨfɨgɨ ba bɨ tsagɨnɨnɨ bɨfɨgɨ ə; a ghɨ́ ntíʼ mbé ngə́ ɨfɨgɨ ɨ tsagɨnə a zɨ mɔʼɔ muŋ bo bɨtsum mɨ vwokɨ a mu abɨ́ ə.”

¹⁵Bita a sóŋ a mbó Yeso ngə́, “Fɨʼtɨ anu za nɨgham nə nanɨ niŋ diʼnɨ a mbó bɨgɨ ə.”

¹⁶Yeso a bítɨ́ awa ngə́, “Lá be ngə́ nɨ bvurɨ nkɨ mbe tsɛʼ bɨtəyigɨnɨ tso abvuʼ a ɨbɛn le?

¹⁷Nɨ sě ndzúʼə nkə́ njíɛ anu za a benɨ zɛrə le? Azúm atsum za a kónə́ a ntsu ŋwɔn, a kúŋə́ ngěn lá wə mɨto, ndzɔŋtɨ ntsa fu ayi wə mu ɨnye ə.

¹⁸Lá, ɨnu tsa ŋwɔn a fɨ́gɨ́nə́ ɨ sóŋə́ nɨ ntsu ɨyi, tsɨ lǒ lá wə mu ntəm, nkɨ mbe lá ɨnu tsa tsɨ ghɨnə ŋwɔn a keʼ fɛm a ɨshi ɨmɨgɨ Ŋwi ə.

¹⁹Mbɨ́ʼ ngə́ ɨwiʼtɨ tsə tɔmnɨnɨ fúə lá a mu ntəm ɨyi, ntyíŋə́ ayi ntságə́ ngə́ á zhwitɨ a ŋwɔn, nchwurɨ nkɨ ngɨ ɨtɨshwe ɨnu tsɨ mɔʼɔ; ndze, nchwe ɨnu nkɨ ngam ɨnu tɨbɔŋ mbɨ́ʼ ɨbɛn bə mɔʼɔ ghe.

²⁰Nə nɨ ɨnu tsa tsɨ ghɨnə ŋwɔn a keʼ fɛm a ɨshi ɨmɨgɨ Ŋwi ə. Lá a ndzɨ́ə tɨ sugɨ mbó adzaŋ za bo sóŋnə́ lá — ka məzen a ngɨə ayi á ŋwɔn a keʼ fɛm á ɨshi ɨmɨgɨ Ŋwi ə.”

²¹Yeso a ló adiʼ wa ngɛn a mu mbuʼ za ɨ fátɨ́nɨ́ a Taya bo Saidɔn lá.

²²Búʼshe mangye bə Kanaʼan wa a kɨ́nə́ nchyɛ̌ a mbuʼ məwa a yén wəmbo ə. A búʼ mbó wəmbo nɨ nji zɨ ntən ngə́, “Mɔn Devidɨ; ko a mɨlɨŋnɨ ɨghə, a Tə̧! Dzɨŋ a tsi a nye mɔn ɨghan wu mangye, ntsi ɨzhi tɨtsɔŋnɨ ɨ bɨ́gɨ́ be tɨsɨŋə.”

²³Lá Yeso a sé anu zə tsɛrə wəmbo soŋə. Bɨyɛʼ ɨbyi yén mbúʼ mbó wəmbo ngə́, “Kəntɨ a mangye wiŋ ə! A zɔŋə awɨgɨnə njǎ ɨdiʼ ə!”

²⁴Yeso a tíʼ nchwɨ́gɨ́ ngə́, “Bɨ tyígɨ́ aghan lá tsɛʼ a mbó bə Izrai ba bɨ benɨ tso mbyindzɨ tsa tsɨ byenə.”

²⁵Mbáʼ Yeso a sóŋnɨ́ a məzen lá, mangye wa a yén ngvo a mɨku Yeso ɨ soŋ ngə́, “Kwatɨ aghə, a Tə̧!”

²⁶Yeso a byígɨ́ ngə́, “Ka a kuʼnɨ ayi a ndɔgɨ mɨdzɨ mɨ ɨbɔ ɨ maʼ a mbó ngvo ə.”

²⁷Mangye wa a chwɨ́gɨ́ ngə́, “Tsɛʼ a nkənu ə, a Tə̧. Lá tsɛʼ ngvo dzɨ̌ ɨbagɨ mɨdzɨ tsa tsɨ lonə atú atɛkɨ a ta ɨwa ngvókə́ a tɨshe.”

²⁸Ma lan, Yeso a byígɨ́ wəmbo ngə́, “O nɨ mangye wa abeməntəm azo a faŋnɨ be tɨsɨŋə! Anu za o lɔnə lá bɨ mɨ ghɨ a zɛrə a mbó gho ghe.” Tsɛʼ a nyom məwa mɔn ɨyi wu mangye wa a shwétə́.

²⁹Yeso a ló ɨwu ntíʼə ngěn a ngə́rɨ́ Sagɨrə Galili ə. Wɛrə a kɔ́ʼ ntáʼ wu tse ɨ shiʼtɨ ntsi a tɨshe.

³⁰Ɨnɔ ɨnɔ ɨbɛn bɨ lɔ́gɨ́ bɨtə́ngórə́kuʼ, bɨfɨgɨ, bɨmbyinkɨnɨ, ɨkɨkúgɨ́ abɔʼnɨ ɨbɛn bə ghaʼnɨ ba bɨ kɨ́nə́ ngǒ, ngyen ndɛn wə ɨshi; a tsuʼ awa ghe.

³¹A kɨ́ʼnɨ́ ɨbɛn adzaŋ za bo zɛ́nɨ́ ɨkɨkúgɨ́ ghamnə, bɨmbyinkɨnɨ shwetɨ, bɨtə́ngórə́kuʼ tɛmnə, bɨfɨgɨ kɨ ntíʼə ndzě ɨdiʼ ə; bo tíʼ mbontɨ a Ŋwi bə Izrai ghe.

³²Yeso a tɔ́ŋ bɨyɛʼ ɨbyi ɨ soŋ a mbó bo ngə́, “Ma kǒ a mɨlɨŋnɨ ɨbɛn ben, mbɨ́ʼ ngə́ bo tsinə bɨgɨ bo atú njwi tsi tárə́ ghe. Tɨtsɔŋnɨ bɨ se nɨ azúm zə dzɨnɨ chyɛ. Ma sa kɔŋ ɨ soŋə ngə́ á bo shɛmnɨ tɨkə ma dzɨgɨ awa mbɨ́ʼ ngə́ bo chi tsúmnkɨ́ mbáʼ bo kwɛ́nə́ ngěn nɨ njwuʼ ɨtsa ghe.”

³³Bɨyɛʼ ɨbyi bítɨ́ ayi ngə́, “Bɨgɨ mɨ lɔgɨ mɨdzɨ ma mɨ kuʼnɨnɨ a ndzɨ́gɨ́ ɨnɔ ɨbɛn wen lá ɨ ghé ɨghan a mu mɨkɨghonɨ men le?”

³⁴Yeso a bítɨ́ awa ngə́, “Nɨ tsi nɨ ndvuŋ abán ake le?” Bo chwɨ́gɨ́ ngə́, “Mbɛʼ tsi samba abɔʼnɨ bə mbum ɨshwú tsə kɨʼnɨ ə.”

³⁵Ma lan, Yeso a tíʼ sóŋ a mbó ɨnɔ ɨbɛn wa ngə́ á ɨ shiʼtɨ ntsi a tɨshe ə.

³⁶A tíʼ ndɔgɨ mbɛʼ abán tsa tsi samba abɔʼnɨ ɨshwú tsa, ntsaʼtɨ a Ŋwi, mbatɨ nga a mbó bɨyɛʼ ɨbyi; bɨyɛʼ ɨbyi tiʼ ngyɛbɨ a mbó ɨbɛn ba.

³⁷Bo bɨtsum dzɨ́, nzhwúrə́. Bɨyɛʼ ɨbyi tíʼ ngótɨ́ ɨbagɨ ɨbán tsa tsɨ bvúrɨ́nɨ́ tsɨ luŋ nkye tsi samba ghe.

³⁸Ndvuŋ mbáŋnɨ́ tsa tsɨ dzɨ́nɨ́ bé nchwuʼ tsi nɨkwa tɨ kwaʼ bəngye bo bɨ ɨbɔ ə.

³⁹Yeso a tíʼ sóŋ ɨbɛn ba shɛmnɨ, a kon a mu abáŋ a nkyi za, ntiʼ ngɛn a mbuʼ Magadan ə.