Read Ngemba Matyo 16 Bible Online

Matyo 16 - Ngemba bible

Matyo 16

¹Bə Farisao abɔʼnɨ bə Sadukai yén a mbó Yeso ghe. Mbɨ́ʼ ngə́ bo kə́ ndǒ njwəŋtɨ Yeso, bo sóŋ ngə́ á wɛrə a ghɨ anu zə yerɨnɨ-yerɨnɨ a ndiʼə ngə́ Ŋwi a bemtɨ ɨnu tsa wɛrə ghɨnə ghe.

²Lá Yeso a chwɨ́gɨ́ awa ngə́, “Nyom a tɨ tsǒ lá, nɨ soŋ ngə́, ‹Abyɛn a mɨ bɔŋ mbɨ́ʼ ngə́ nɨkaŋ baŋə ghe.›

³A be a tənjwi, nɨ soŋ ngə́, ‹Mbəŋ mɨ tunɨ mbɨ́ʼ ngə́ nɨkaŋ baŋə, mbaʼ zɨ fɨŋnɨ kɨ ntsi atɨ́ ə.› Nɨ zhi ɨ fɨʼtɨ adzaŋ za abyɛn a mɨ be ndzɔ̌ŋ adzaŋ za nɨkaŋ kyérɨ́nə́, lá ɨnu tsɨ yerɨnɨ-yerɨnɨ fuənə tɨtsɔŋnɨ nɨ chi tiʼ keʼ fɨʼtɨ ɨnu tsa tsɨ diʼnɨ lá ngə́ ke le?

⁴Nɨwə nə sɨŋə nɨ nə ngaŋ ngɨ ɨbvu bo nə bɨtɨbeməŋwi be tɨsɨŋə. Nɨ lǒ ndze anu zə yerɨnɨ-yerɨnɨ, lá bɨ mɨ keʼ a zə tsɛrə diʼ a mbó bən ntsa a zə Yǒna ghe.” A tíʼ nyɛʼtɨ awa ngɛn ayi ɛ.

⁵Bɨyɛʼ ɨbyi lɨ́gɨ́nɨ́ ndɔgɨ abán bɔŋ ɨ daŋ ɨ ghɛn a ndzɨŋ sagɨrə wa zɨ mɔʼɔ ghe.

⁶Yeso a sóŋ a mbó bo ngə́, “A nɨ lə ɨtú ɨtsən a nye mbɛgə zɨ bə Farisao abɔʼnɨ bə Sadukai ghe.”

⁷Bo tíʼə mbəgɨrə anu məzen a tɨtərɨ bo nɨbo, ɨ sóŋə́ ngə́, “A sóŋə́ a məzen lá mbɨ́ʼ ngə́ bɨgɨnə ló nkeʼ nɨ abán yiŋə.”

⁸Lá mbáʼ Yeso a zhínɨ́ a məzen lá, ɨ soŋ ngə́, “O mbáŋnɨ́ tsa abeməntəm aza a kɨ́gɨ́nɨ́, nɨ bəgɨrɨ a tɨtərɨ bən ngə́ nɨ se nɨ abán tsi lá ngə́ ke le?

⁹Nɨ bvurɨ tɨ zuʼ nkɨ nji le? Nɨ sě mbvúrə́ ngwáʼtɨ́ mbɛʼ abán tsa tsi tə̧̂ tsa ma bátɨ́nɨ́ ndzɨ́gɨ́ ɨbɛn nchwuʼ tsi tə̧̂ nɨ tsɛrə nɨ ndvuŋ nkye tsa nɨ ghótɨ́nɨ́ lá le?

¹⁰Kə mbɛʼ abán tsa tsi samba tsa ma bátɨ́nɨ́ ndzɨ́gɨ́ ɨbɛn nchwuʼ tsi nɨkwa nɨ ndvuŋ nkye tsa nɨ ghótɨ́nɨ́ lá le?

¹¹Lá ghɨ ake nɨ keʼ zuʼ nkɨ nji ngə́ ma lo nkaʼ ngamə lá mbɨ́ʼ abán a mbó bən le? Lanɨ ɨtú ɨtsən a nye mbɛgə bə Farisao abɔʼnɨ bə Sadukai ghe.”

¹²Ɨtú bɨyɛʼ ba tíʼ ŋáʼnɨ́ ngə́ a sé ngámə́ a mbó bo lá ngə́ á bo lə ɨtú ɨtsa a nye mbɛgə za bɨ nɨ́ŋnə́ a mu abán lá, a báŋnɨ́ mbé lá mbɨ́ʼ ɨnu tsa bə Farisao abɔʼnɨ bə Sadukai diʼnə ghe.

¹³Yeso a ghɨnə ngyén nkón a mu mbuʼ Seseria Filibi, mbitɨ bɨyɛʼ ɨbyi ngə́, “Ɨbɛn sóŋə́ ngə́ Mɔn Ŋwɔn a lá ɨwa le?”

¹⁴Bo chwɨ́gɨ́ ngə́, “Bə tse sóŋə́ ngə́ o nɨ Yoane Ngaŋ Nga Nkyi, bə mɔʼɔ soŋənə ngə́ o nɨ Alaja, bə mɔʼɔ soŋənə ngə́ o nɨ Wemɨyɛrə kə táʼ ntom Ŋwi wa wu tse ghe.”

¹⁵A bítɨ́ awa ngə́, “Lá ɨzɨŋ nkfu, nɨ soŋ ngə́ ma lá ɨwa le?”

¹⁶Samɔn Bita a chwɨ́gɨ́ ngə́, “O nɨ Wa bɨ Zɔ́ʼnɨ́, Mɔn Ŋwi, zɨ wa a tsinɨ ntɨŋ ə.”

¹⁷Yeso a chwɨ́gɨ́ ayi ngə́, “Mbɔnɨ tsi atú gho a Samɔn mɔn Yoane! Ka nkənu zen a mbó gho a kyɛʼ ayi ŋwɔn mɨsɔŋ a ntsu ə, ɨ lanɨ ndo lá a mbó Ta ɨghan mbáʼ a tsinɨ a fɔməbvurə ghe.

¹⁸Ma lan, ma soŋ a mbó gho ghe, gho Bita, o nɨ aláŋsə́ ngɔʼ, atú aláŋsə́ ngɔʼ məzen ma mɨ korɨ ndaŋwi ɨzan, á mɨtən mɨ nɨvwo keʼ nɨ mɨtən mə tsɛrə atú zɛrə chyɛ.

¹⁹Ma mɨ gha ɨkugɨ Nɨfɔ nɨ fɔməbvurə a mbó gho, anu atsum za o tonɨ atuəshe, bɨ mɨ kɨ ton a fɔməbvurə, anu atsum za o bemnɨ atuəshe, á bɨ kɨ mbem a zɛrə a fɔməbvurə ghe.”

²⁰Yeso a tíʼ nkwantɨ bɨyɛʼ ɨbyi ngə́ á bo keʼ soŋ a mbó ŋwɔn tse ngə́ zɨə lá Wa bɨ Zɔ́ʼnɨ́ wa.

²¹Ɨ lɔgɨnɨ a nyom məwa, Yeso a chwúʼ ndǐʼ bɨyɛʼ ɨbyi ngə́ zɨə mɨ zagɨ ghɛn a Yerosalɛm, ɨ ze ngɨ́ʼ a mu ɨnu tsɨ ghaʼtɨnɨ a mbó bɨkum, bɨntumshe bə wi nɨ bɨdiʼ bɨ Nyɔngɔŋ ə. Bɨ mɨ zhwitɨ ayi, á zɨə bə nzhwemnɨ a ndzum njwi tsi tárə́ ghe.

²²Bita a shwúŋtɨ́ ayi bo zɨ ghɛntɨ a ngɔbə, a ghamtɨ ayi ɨ soŋ ngə́, “A Ŋwi a ton ayi ɛ, a Maʼmbyí! Məzen a chi láʼ keʼ a nye gho fuə.”

²³Lá Yeso a bə́ŋ ayi ɨ soŋ a mbó Bita ngə́, “Bɨŋ agho a ndzum me ghe, a Satan! O kɨ̌ŋ ndómnji ɨghə, mbɨ́ʼ ngə́ ɨnu tsa o kwaʼtɨnə se a mbó Ŋwi lo, tsɨ lo be a mbó ɨkwaʼtɨ ŋwɔn mɨsɔŋ a ntsu ə.”

²⁴Yeso a sóŋ a mbó bɨyɛʼ ɨbyi ngə́, “Be ŋwɔn a tsi nɨ ndzɔŋə a ndzum me a nyɛʼ ɨnu tsa mbáʼ ntəm ɨyi lɔnə be tɨ́sə́n lá mbyɛʼ abaŋnɨ-baŋnɨ azhi ndzɔŋ aghə.

²⁵Ŋwɔn tsum wa mbáʼ a lɔnɨ ndoŋ ntsi mbyi ɨzhi a mɨ sam a zɛrə; ŋwɔn tsum wa a samnɨ ntsi mbyi ɨzhi mbɨ́ʼ aghan, a mɨ bə tsi nɨ zɛrə ghe.

²⁶Ŋwɔn mɨ tsi lá nɨ abi ake mbáʼ be a tsi nɨ mbyi tsum ɨ sam ntsi mbyi ɨzhi le? Kə ŋwɔn a chi lanɨ gha lá ake ɨ kwebtɨ ntsi mbyi ɨzhi ɨwu le?

²⁷Mɔn Ŋwɔn a mɨ ghɨ yen bo bɨ bɨtsen bɨ ndá bɨ Ŋwi a mu nɨfáŋ nɨ Ta ɨyi, ɨ tiʼ tsɔʼ afaʼ a ŋwɔn tsum ɨ zɔŋ adzaŋ za mbáʼ a faʼnə.

²⁸Tsɛʼ a nkənu, ma sóŋə́ awɨŋ ə, bə tse tsi ɨwu ɨghan ba bɨ mɨ keʼ kfo tɨgha Mɔn Ŋwɔn a yen tso ɨfɔ ghe.”