Read Ngemba Matyo 17 Bible Online

Matyo 17 - Ngemba bible

Matyo 17

¹Njwi ghɨnə ntsa tsi ntugə, Yeso a lɔgɨ a Bita, Jemsɨ bo mɨma ɨyi Yoane, ntsa mbyi ɨza bo bo kɔʼ ngɛn atú mbám ntsi ɨwu tsɛʼ bo bo ghe.

²Adzaŋ za bɨyɛʼ ɨbyi məben kɨ́nə́ ndyiŋə, bɨ bə́nkɨ́ a Yeso a ɨshi bo, ɨshi ɨyi tíʼə ntá tso nɨnyom, ɨtsɛʼ ɨchi tíʼə fúgə́ tso nkaʼ ə.

³Ze azo, Alaja bo Mǒse fú a ɨshe; ntíʼə ngámnə́ bo bɨ Yeso ghe.

⁴Ma lan, Bita a sóŋ a mbó Yeso ngə́, “Maʼmbyí, a bɔŋ ngə́ á bɨgɨnə tsi ɨghə! Be o kɔŋ, ma vwu bɨkfúʼə bi bɨtárə́, táʼ a mbó gho, táʼ a mbó Mǒse nɨ wu mɔʼɔ a mbó Alaja ghe.”

⁵A kə́ mbvúrə́ ngámə́ mbáʼ mbaʼ zɨ ŋwenɨnɨ zɨ tse ɨ shíʼnɨ́ mbɔ́m awa, nji zɨ tse fu wə mu ɨ soŋ ngə́, “Nə nɨ Mɔn ɨghə wen wa ma kɔŋnɨ, ɨnye zə kə́ mbɔ́ŋə́ wə ɨnye; nɨ zuʼ wəmbo ə!”

⁶Mbáʼ bɨyɛʼ ɨbyi məben zúʼnɨ́ nji zen lá, abɔgɨtɨ a lwɨ́gɨ́ mɨntəm ɨma, bo shiʼ ngvo nkúbɨ́nɨ́ mɨshi ɨma a tɨshe ə.

⁷Yeso a yén mɔmtɨ awa, ɨ soŋ ngə́, “Nɨ lo atɨ́ nkeʼ kɨ mbɔgə!”

⁸Ma lan, bo bíʼtɨ́ ɨmɨgɨ ɨma atɨ́, nkeʼ a ŋwɔn adaŋ bə ndzɛn ntsatɨ a Yeso ghe.

⁹Bo ghɨnə tɨ shǐʼ atú mbám za, Yeso a gha ntɨgə a mbó bo ngə́, “A nɨ keʼ ndzɛm nəzhwɨgɨnɨ zen fɨʼtɨ a mbó ŋwɔn tsɛrə ɨ kuʼ njwi za Mɔn Ŋwɔn a ghɨnɨ zhwémnɨ́ a mbó nɨvwo ə.”

¹⁰Bɨyɛʼ ba tíʼ mbítɨ́ a Yeso ngə́, “A ghɨ ake bɨdiʼ bɨ Nyɔngɔŋ soŋnə ngə́ Alaja a mɨ zagɨ yen a mbyi lá le?”

¹¹Yeso a chwɨ́gɨ́ ngə́, “Tsɛʼ a nkənu, Alaja a mɨ tsa mbyi ɨ yen taŋ ɨ kyaŋtɨ ɨnu ɨtsum ə.

¹²Lá ma soŋ a mbó bən ngə́ Alaja a kwɛnə ngyen lá bɨ keʼ ayi zhi, lá ngɨ be anu atsum za bo kɔŋnɨ wə ɨnye. Ndəŋndəŋ Mɔn Ŋwɔn a ghɨ kɨ́ zé ngɨ́ʼ a mu mbó bo ghe.”

¹³Bɨyɛʼ ɨbyi məben tíʼ ndzúʼ nkɨ njí ngə́ a kə́ ngamə a mbó bo lá mbɨ́ʼ a Yoane Ngaŋ Nga Nkyi ɛ.

¹⁴Bo ghɨnə ngyén fú a nye ɨnɔ ɨbɛn wa, ŋwɔn tse a yen nkwem mɨkwiʼtɨ ɨmyi a ɨshi Yeso ɨ soŋ ngə́,

¹⁵“Tə̧, ko a mɨlɨŋnɨ mɔn ɨghan wu mbáŋnɨ́ ə! A vwǒ akəbvurə, a diʼnɨ ngɨ́ʼ wəmbo tɨ́sə́n a nye ndóm wa nɨ nkfu nɨ nkfu, a vwǒ a mu ɨmugɨ kə a mu nkyi ɛ.

¹⁶Ma yén nɨ zɨ a mbó bɨyɛʼ ɨbo, lá bo kɨ chi keʼ ayi tsuʼə.”

¹⁷Yeso a chwɨ́gɨ́ ngə́, “Wei nɨwə nə tɨ abeməntəm bo nə ngaŋ ngɨ mɨbvu! Ma ghɨ tsí bɨgɨnə ɨ kɔʼ kuʼ lá nkfu ake le? Ma ghɨ chigɨ ntəm bɨgɨnə ɨ kɔʼ kuʼ lá nkfu ake le? Nɨ yen nɨ mɔn mbáŋnɨ́ wa ɨghan a mbó me ghe!”

¹⁸Yeso a ghá ntɨgə a mbó dzɨŋ wa, dzɨŋ wa a nyɛʼtɨ a mɔn mbáŋnɨ́ wa. Mɔn mbáŋnɨ́ wa byí shwétɨ́ tsɛʼ a nyom məwa.

¹⁹Bɨyɛʼ bɨ Yeso tíʼ ngyen wəmbo ndzum ndzum, mbitɨ ayi ngə́, “Bɨgɨ kɨ chi keʼ a dzɨŋ wa kɨŋ lá ngə́ ke le?”

²⁰Yeso a chwɨ́gɨ́ ngə́, “Mbɨ́ʼ azhwebtɨ abeməntəm azɨŋ ə. Mbɨ́ʼ ngə́ tsɛʼ a nkənu, ma sóŋə́ a mbó bɨŋ ə, be nɨ tsi nɨ abeməntəm tsɛʼ tso ndzaŋ ɨsa, o chi soŋ a mbó mbám zen ngə́, ‹Tsɔʼnɨ adiʼ wen ngɛn ntɛm ɨ ghɨrɨ ə!› ɨ mɨ kɨ ghen. O chi ghɨ anu atsum za o kɔŋnə!”

²²Mbáʼ bɨyɛʼ ba ghótɨ́nɨ́ bɨtsum táʼ adiʼ a Galili lá, Yeso a sóŋ a mbó bo ngə́, “A bvurɨ mɨnya á bɨ gha a Mɔn Ŋwɔn a mu mbó ɨbɛn,

²³á bo zhwitɨ ayi; lá a ndzum njwi tsi tárə́, á bɨ bə nzhwemnɨ ayi ɛ.” Bɨyɛʼ ba tíʼ ndánɨ́ ndzə́ŋnɨ́ be tɨsɨŋə.

²⁴Yeso bo bɨ bɨyɛʼ ɨbyi ghɨnə ngyén nkón a Kabɛrɨnaum, ngaŋ nkwárɨ́ ashɛbɨ a ndáŋwi zɨ ngwi, yen a mbó Bita mbitɨ ayi ngə́, “Ndiʼ aŋwaʼnɨ ɨwən wen a mɛrə ntfǔ ashɛbɨ zə ndáŋwi zɨ ngwi le?”

²⁵Bita a chwɨ́gɨ́ ngə́, “E, tsɛʼ a nkənu ə.” Bita a ghɨnə nkón ngɛ́n a mu ndá, Yeso a gham wəmbo a ntsambyi, ngə́, “O wiʼtɨ ngə́ ke, a Samɔn? Bɨfɔ bɨ atuəshe wiŋ kwárɨ́ ashɛbɨ lá a mbó bɨwa le? A mbó ngaŋ alaʼ kə a mbó bɨngyen-yenɨ le?”

²⁶Bita a chwɨ́gɨ́ ngə́, “A mbó bɨngyen-yenɨ ə.” Yeso a tíʼ sóŋ wəmbo ngə́, “Lá be ngə́ ka ngaŋ alaʼ tsi awa nɨ ntfu azúm zə tse ghe.

²⁷Lá ka tɨ ndǒ a ghɔgə a ngɨə á mɨntɔŋ mɨ ɨbɛn biŋ lwinə. Ma lan, ghɛn a mu sagɨrə, ɨ maʼ ɨsáʼ ɨwu ə. Ntsambyi ɨshwú za o konɨ, shwuŋ a zɛrə ɨ fɨgɨ a ntáʼə, o mɨ tiʼ zɛn nkáb atɨŋə wə mu ntsu za ɨ kuʼnɨnɨ a ntfú ashɛbɨ zə ndáŋwi zɨ ngwi azɔgə ghe. Fɨgɨ a zɛrə ngɛn ntfú ashɛbɨ azɔgə ɨwu ə.”