Read Ngemba Matyo 18 Bible Online

Matyo 18 - Ngemba bible

Matyo 18

¹A nkfu məwa bɨyɛʼ ba yén a mbó Yeso mbitɨ ngə́, “Akɔ́ʼɔ́ntsɨrə a mu Nɨfɔ nɨ fɔməbvurə a nɨ ɨwa le?”

²Ma lan, Yeso a sóŋ mɔn wu nkɨʼnɨ a yen a mbó zɨ; a tiʼ ntɛgɨ ayi a ɨshi bo,

³ɨ soŋ a mbó bo ngə́, “Tsɛʼ a nkənu, ma sóŋə́ a mbó bɨŋ ə, be nɨ tú bənkɨ ɨ tiʼ tso ɨbɔ bə kɨʼnɨ, nɨ láʼ keʼ kon a mu Nɨfɔ nɨ fɔməbvurə ghe.

⁴Ŋwɔn tsum wa a shiʼtɨnɨ nɨ atuəmbəm azhi a ɨshe tso mɔn wen, a nɨ akɔ́ʼɔ́ntsɨrə a mu Nɨfɔ nɨ fɔməbvurə ghe.

⁵Ŋwɔn tsum wa a kwarɨnɨ a mɔn tso məwen a ɨkum me, a kwarɨ lá aghə.”

⁶“Be ŋwɔn tse a ghɨ ngə́ á mɔn wen wu tse a keʼ nɨ abeməntəm a nye me tsi, a kwɛ mbɔŋ ngə́ á bɨ korɨ a təkɨŋ ngɔʼ nghɔʼ abán wə ntɔŋ ɨ maʼ a mu sagɨrə wu ngwi á shwimkɨ a mbyi sagɨrə wu ngwi ə.

⁷Wei, ngɨ́ʼ zɨ ngwi a mbó mbyi mbɨ́ʼ ɨkwaʼnɨ tsa tsɨ tíntɨ́nɨ́ ɨbɛn ntságə́ a ngɨ ɨbvu ə! Ɨbə́ŋ ɨnu mətsiŋ mɨ funə tsɛʼ nkfu tsum, lá ngɨ́ʼ zɨ ngwi ɨ tsi a mbó ŋwɔn wa a ghɨnə ngə́ á tsɨ fúə ghe!

⁸Be abó azo kə aku azo a ghɨ ngə́ o ghɨ ɨbvu, sobɨ a zɛrə ɨ nyɛʼə! A bɔŋ a mbó gho a nkúŋə́ a mu ntsi ntən nɨnkoŋ nɨ táʼ abó kə nɨ táʼ aku ntsa a nchyɛ́ nɨ mbó mɨmbá kə nɨ mɨku mɨmbá á bɨ waŋ agho a mu ɨmugɨ nɨnkoŋ wa.

⁹A nkwiʼtə, be nɨdɨgɨ ɨno mɨ tyiŋ agho a ngɨ ɨbvu, twɛʼ a nɛrə ɨ nyɛʼə! A bɔŋ a mbó gho a nkúŋə́ a mu ntsi ntən nɨnkoŋ nɨ táʼ nɨdɨgɨ ntsa ngə́ á bɨ waŋ agho a mu ɨmugɨ nɨnkoŋ nɨ ɨmɨgɨ mɨmbá ghe.”

¹⁰“Zɛnə ngə́ nɨ se a mɔn wen wu tse wagɨnə. Ma sóŋə́ awɨŋ ə, a fɔməbvurə bɨtsen bɨ ndá bɨ Ŋwi ba gháʼə nchyɛ̌ bo bɨ Ta ɨghə.

¹²Nɨ kwaʼtɨ ngə́ ke? Be ŋwɔn a tsi nɨ mbyindzɨ táʼ nkɨ, táʼ a byé wə mu, a sě nyɛ́ʼtə́ a tsa mɨghúm mi nɨbvuʼə nɨ ntsɔb nɨbvuʼə á tsɨ ndzɨ́ə a mbəm ntáʼ ngěn ndǒ a táʼ wa a byenɨ lá le?

¹³Be a zɛn a zɛrə, tsɛʼ a nkənu, ma sóŋə́ awɨŋ ə, a dórə́ mbɨ́ʼ a táʼ məwen ntsa a tsa mɨghúm mi nɨbvuʼə nɨ ntsɔb nɨbvuʼə tsa tsɨ lónɨ́ nkeʼ byé lá.

¹⁴Ndəŋndəŋ, ka Ta ɨghan a fɔməbvurə a ndǒ ayi ngə́ á táʼ mɔn wen wu tse a byé.”

¹⁵“Be mɨma ɨgho wu mbáŋnɨ́ a fan anu a nye gho, ghɛn ɨ fɨʼtɨ afənu azhi wəmbo, mbáʼ a tsinɨ tsɛʼ bɨŋ zɨ bɨbá ghe. Be a be ngə́ a zuʼtɨ nji ntsu ɨzo, lá be ngə́ o səŋ, mbɨ́ʼ ngə́ o bə ntsi nɨ mɨma ɨgho wu mbáŋnɨ́ wa wədiʼ ə.

¹⁶Lá be a tú nji ntsu ɨzo zuʼtɨ, lɔgɨ a táʼ ŋwɔn kə ɨbɛn bi bɨbá á bɨŋ bo ghɛn nkwatɨ ayi, taŋ á ɨbɛn bi bɨbá kə bi bɨtárə́ chi shiʼtɨ tsi tso bətɛmə-ndzě a nye anu atsum za nɨ ghamnə ghe.

¹⁷Be a kɨ mbvurɨ nton ayi a ndzúʼtɨ́ nji ntsu ɨza, fɨʼtɨ a mbó ndáŋwi ə; be a kɨ mbvurɨ nton ayi a ndzúʼtə́ a mbó ndáŋwi, lɔgɨ ayi tso tɨbeməŋwi kə ngaŋ nkwarɨ ashɛbɨ ə.”

¹⁸“Tsɛʼ a nkənu, ma sóŋə́ awɨŋ ə, anu atsum za nɨ tonɨ atuəshe, bɨ mɨ kɨ ton a zɛrə a fɔməbvurə, anu atsum za nɨ bemnɨ atuəshe, á bɨ kɨ mbem a zɛrə a fɔməbvurə ghe.

¹⁹Ma kwiʼə sóŋə́ a mbó bən ngə́: be bən bi bɨbá bemnɨ ndɔntɨ anu zə tsɛrə a mu atsaʼtɨ, Ta ɨghan a fɔməbvurə a mɨ ghɨ a zɛrə a mbó bɨŋ ə.

²⁰Mbɨ́ʼ ngə́ be ɨbɛn bi bɨbá kə bi bɨtárə́ ghotɨ táʼ adiʼ nɨ ɨkum ɨghan, ma mɨ tsi a tɨtərɨ bo ghe.”

²¹Bita a tíʼ ngɛn ɨ fátɨ́ a Yeso mbitɨ ayi ngə́, “Maʼmbyí, a mɨ ghaʼtɨ ɨ be tso nkfu tsi sɛʼ mbáʼ be mɨma ɨghan a fan anu a nye me ma lɨgɨnɨ ɨbvu ɨyi le? Ɨ ghaʼtɨ ɨ kuʼ nkfu tsi samba le?”

²²Yeso a sóŋ wəmbo ngə́, “Ma mɨ kaʼ soŋ a mbó gho ngə́ nkfu samba ghe, a nɨ nkfu mɨghúm mi samba nkfu samba ghe.

²³Mbɨ́ʼ ngə́ Nɨfɔ nɨ fɔməbvurə be lá tso ɨ lə. Ɨfɔ wu tse wa a kə́ ndǒ ɨ shaŋ nkáb bo bɨ ngaŋ afaʼ ɨchi ɛ.

²⁴A biʼnɨnə a ngɨə ma lan, bɨ yen nɨ táʼ ŋwɔn wəmbo wa a chwánɨ́ ayi nɨ nkáb nkám mɨghúm mɨmbá ghe.

²⁵Ngaŋ afaʼ za sé tsi nɨ nkáb za ɨ kúʼnɨ́ a ntfú nɨká ɨni ɛ, ma lan, ɨfɔ wa a ghá ntɨgə ngə́ á bɨ fen ayi tso abuʼ ndzɔŋ nkwiʼtɨ a ngwe ɨyi bo bɨ ɨbɔ ɨbyi nɨ ɨdzúm ɨchi ɨtsum taŋ ɨ tfu nɨká ɨni na ɨwu ə.

²⁶Ngaŋ afaʼ za ɨ vwó nkwem mɨkwiʼtɨ ɨmyi a ɨshi ɨfɔ wa, mbuʼ mbó wəmbo ɨ soŋ ngə́, ‹Bɔrɨsɨ ntəm ɨgho a nye me ghe, ma mɨ tfu azúm atsum ə.›

²⁷A mu akômɨlɨŋnɨ, ɨfɔ wa a nyɛ́ʼtɨ́ ayi nkɨ ndɨ́gɨ́nɨ́ nɨká ɨni na.

²⁸Lá tsɛʼ ŋwɔn afaʼ məwa, mbáʼ a fúnɨ́ abyɛn, a bóm a ŋwɔn afaʼ wa wu mɔʼɔ wa bo zɨ kɨ́nə́ faʼə, wa a chwánɨ́ nɨká ɨni, nɨ be ɨban nkáb tsi bá; ɨ faŋnɨ ayi a fúʼntɔŋ ɨ soŋ ngə́, ‹Tfu nɨká ɨnə.›

²⁹Ŋwɔn nɨká ɨyi wa bo zɨ kɨ́nə́ faʼə lá a vwó wə mɨku, mbuʼ mbó wəmbo ngə́, ‹Bɔrɨsɨ ntəm ɨgho a nye me ghe, ma mɨ tfu azúm atsum ə!›

³⁰Lá a túŋə́, ngɛn fárɨ́ a ŋwɔn nɨká ɨyi wa atsáŋ nkuʼnɨ nkfu za a mɨ tfu nɨká ɨni ɛ.

³¹Mbáʼ ngaŋ afaʼ tsa bo bo kɨ́nə́ faʼə zɛ́nɨ́ anu za a fúnɨ́, bɨ lánɨ́ ndzə́ŋnɨ́ tsɛʼ nkan, ngɛn fɨʼtɨ a mbó ɨfɔ wa anu atsum za a fúnə́.

³²Ɨfɔ wa a bə́ ntíʼ ntɔ́ŋ ayi ɨ soŋ wəmbo ngə́, ‹Gho a bɨ́gɨ́ a mɨkyiʼ ŋwɔn afaʼ! Ma lo ndɨgɨnɨ nɨká ɨno na nɨtsum mbɨ́ʼ ngə́ o lo mbuʼtɨ mbó a mbó me ghe.

³³O lo nchi koʼ kɨ nko a mɨlɨŋnɨ a nye ŋwɔn afaʼ wen wa bɨŋ zɨ faʼnə, tsɛʼ tso mbáʼ ma lonɨ nko a mɨlɨŋnɨ a nye gho lá le?›

³⁴A mu alwɛntɔ́ŋ, ɨfɔ wa a bə́ŋ ayi nga a mbó bɨntsiŋ bɨ atsáŋ ngə́ á bɨ ləŋ ayi nɨ ngwan ɨ kuʼnɨ nkfu za a tfunɨ nɨká ɨni nɨtsum ə.”

³⁵Yeso a tíʼ ndwɨgɨnɨ ɨ soŋ ngə́, “Nə nɨ ndəŋndəŋ anu za Ta ɨghan a fɔməbvurə a ghɨnɨ kɨ́ ghɨ a nye ŋwɔn nɨ bɨŋ tsum mbáʼ be o tú lɨgɨnɨ ɨbvu mɨma ɨgho nɨ ntəm ɨgho ɨtsum ə.”