Read Ngemba Matyo 21 Bible Online

Matyo 21 - Ngemba bible

Matyo 21

¹Yeso bo bɨ bɨyɛʼ ɨbyi ghɨnə ntíʼə fátə́ a Yerosalɛm, ntsi a Bɛtɨfage, a kɨʼ ntáʼ olif wa, Yeso a tiʼ ntsagɨ bɨyɛʼ ɨbyi bi bɨbá a mbyi,

²ɨ soŋ a mbó bo ngə́, “Ghɛnə a mu atom za a tsinɨ a mbyi bən lá. Tsɛʼ mbáʼ nɨ byínə́ nkúŋə́ lá, nɨ mɨ zɛn a jakashi wa bɨ tɨŋnɨnɨ abɔʼnɨ mɨmu ɨyi ɛ. Nɨ shwɛn a tsɛrə ngyen nɨ tsɛrə a mbó me ghe.

³Be ŋwɔn tsɛrə a soŋ anu zə tsɛrə a mbó bən, nɨ chwɨgɨ ngə́, ‹Maʼmbyí a lǒ ɨ faʼə nɨ tsɛrə ghe›; a mɨ byi nyɛʼtɨ a tsɛrə ghe.”

⁴Məzen a fú lá taŋ á kɔʼ mbomnkɨ bo za ntom Ŋwi kwɛ́nə soŋ ngə́:

⁵“Soŋ a mbó ntáʼmbagə wu wi Zayɔn ngə́, Ze azo, ɨfɔ ɨgho a yiŋə a mbó gho ghe! A shiʼtɨ nɨ ɨnye ɨzhi a ɨshe, nkɔʼ ntsi atú jakashi, abɔʼnɨ mɨmu jakashi, mɨmu jakashi ɛ.”

⁶Ma lan, bɨyɛʼ ɨbyi ghɛ́n ngɨ tsɛʼ adzaŋ za wɛrə a tɨ́gɨ́tɨ́nɨ́ awa:

⁷bo yén nɨ jakashi wa bo mɔn ɨyi, ntiʼ nyɔŋ ɨtsɛʼ ɨtsa atú tsɛrə, a tiʼ nkɔʼə.

⁸Ɨnɔ ɨbɛn wu wi lɨ́ʼ ɨtsɛʼ ɨtsa a ndómnji, bə mɔʼɔ warɨ mbó mɨ ɨtɨ ndɨʼ a mɛrə a ndómnji ɛ.

⁹Ɨnɔ wa ɨ ghɛ́nɨ́ a mbyi zɨ abɔʼnɨ wa ɨ kɨ́nə́ ndzɔŋə ayi, ɨ kə́ ntɔ́nkə́ ɨ sóŋə́ ngə́, “Osana a mbó Mɔn ɨlə̌ Devidɨ ə! Ɨfɔgə tsi a mbó ŋwɔn wa a yenɨ nɨ ɨkum Maʼmbyí ɛ! Mbontə tsi a mbó Ŋwi a fɔməbvurə ghe!”

¹⁰Mbáʼ a kónɨ́ a Yerosalɛm, nkuŋə ɨzhi chíʼ ntáʼmbagə wu wi wa ɨtsum, ɨbɛn bitɨnə ngə́, “Lá nɨ ɨwa a wen le?”

¹¹Ɨbɛn ba a ɨnɔ ɨnɔ chwɨ́gɨ́ ngə́, “Lə nɨ ntom Ŋwi za bɨ tɔ́ŋnə́ ngə́ Yeso za ɨ lonɨ a Nazarɛ a mu Mbuʼ Galili ə.”

¹²Yeso a kón a mu Ndáŋwi zɨ Ngwi, nkɨŋ ɨbɛn ba bɨ kɨ́nə́ fiŋə nkə́ ndzǔŋ ɨdzúm ɨwu ə. A tíʼ mbənkɨ ɨtɛkɨ ngaŋ nkwebtɨ nkáb abɔʼnɨ ɨlaŋ ɨbɛn ba bɨ kɨ́nə́ fǐŋ bɨbvugɨrə-fɨkon ə.

¹³A sóŋ a mbó bo ngə́, “Bɨ ŋwaʼnɨ a mu aŋwaʼnɨ a Ŋwi ngə́, ‹Bɨ ghɨ tɔŋənɨ Ndáŋwi zɨ Ngwi ɨzan ngə́ adiʼ a ntsaʼtɨ Ŋwi ə.› Lá nɨ ghɨ a zɛrə a nye kfúʼə mɨzɛrə ghe!”

¹⁴Bɨfɨgɨ abɔʼnɨ bɨmbyinkɨnɨ yén wəmbo a mu Ndáŋwi zɨ Ngwi, wɛrə a tsuʼ awa ghe.

¹⁵Mɨntɔŋ mɨ bɨntumshe bə wi abɔʼnɨ mɨntɔŋ mɨ bɨdiʼ bɨ nyɔngɔŋ lwínɨ́ mbáʼ bo zɛ́nɨ́ ɨnu tsɨ tsanɨnɨ tsa a ghɨ́nɨ́, abɔʼnɨ adzaŋ za ɨbɔ ɨba kɨ́nə́ ntɔ́nkə́ a mu Ndáŋwi zɨ Ngwi ngə́, “Mbontə a mbó Mɔn ɨlə̌ Devidɨ ə!”

¹⁶Ma lan, bo tíʼ mbítɨ́ a Yeso ngə́, “O zúʼə anu za ɨbɔ biŋ sóŋnə́ le?” Yeso a chwɨ́gɨ́ ngə́, “E, tsɛʼ a nkənu ə. Nɨ kwɛnə mbvurɨ adiʼ aŋwaʼnɨ a Ŋwi zen tɨ tɔŋ ngə́, ‹Nɨ mərɨsɨnə ɨbɔ bə bɔrɨ abɔʼnɨ bɨnyɔŋ nɨbən a ngá mbontə za ɨ kɔʼnɨ ntɛm ngə́ tsáŋ le?› ”

¹⁷Yeso a nyɛ́ʼtɨ́ awa, ntiʼ fu a mu ntáʼmbagə zɨ ngwi za, ngɛn a Bɛtani ndye ɨwu ə.

¹⁸A ghɨnə mbé a tənjwi, mbáʼ a kɨ́nə́ mbɨŋə a mu ntáʼmbagə zɨ ngwi za, nji ɨ zaŋnə ayi ɛ.

¹⁹Wɛrə a zɛ́n atɨ a figɨ a ngɔbɨ ndómnji, ngɛn ɨwu, nkeʼ azúm zə tse ɨwu zɛn ntsa ɨzəŋ ɨtɨ tsɛrə tsɛrə ghe. Ma lan, wɛrə a sóŋ a mbó atɨ za ngə́, “O láʼ koʼ mɨntam mə tse bə nkwiʼ nkónə́!” Atɨ a figɨ za a byí ndzómnkɨ́ tsɛʼ a nyom məwa.

²⁰Bɨyɛʼ ɨbyi zɛ́n anu zə wu, a kɨʼnɨ awa ghe. Bo bítɨ́ ngə́, “Atɨ a figɨ za ló mbyí ndzómnkɨ́ nkfu zi mɔ́ʼɔ́ lá ɨ nə́ le?”

²¹Yeso a chwɨ́gɨ́ ngə́, “Tsɛʼ a nkənu, ma sóŋə́ a mbó bɨŋ ə, be nɨ tsi nɨ abeməntəm ndáʼ keʼ məŋnɨ, nɨ mɨ keʼ ghɨ lá tsɛʼ anu za a funɨ a nye atɨ a figɨ ziŋ ə. Nɨ mɨ chi kwɛ soŋ a mbó mbám zen ngə́, ‹Tsɔʼnɨ nzhwibɨnɨ agho a mu sagɨrə wu ngwi ə,› a mɨ fuə.

²²Anu atsum za o bitɨnɨ a mu atsaʼtɨ a Ŋwi, o mɨ kwarɨ a zɛrə mbáʼ be o tsi nɨ abeməntəm ə.”

²³Yeso a bə́ ngyen nkon a mu Ndáŋwi zɨ Ngwi ə. Bɨntumshe bə wi abɔʼnɨ bɨkum bɨ alaʼ yén wəmbo mbáʼ a kɨ́nə́ ndiʼə anu a Ŋwi, mbitɨ ayi ngə́, “O lɔgɨ mɨtən lá ɨ ghé a ngɨ ɨnu tsiŋ ɨtsum ə? A gha ɨwa nga mɨtən məmen a mbó gho ghe?”

²⁴Yeso a chwɨ́gɨ́ a mbó bo ngə́, “Ma mɨ kɨ bitɨ awən tsɛʼ nɨ táʼ abitɨ ə; be nɨ chwɨgɨ aghan, ma mɨ tiʼ fɨʼtɨ a mbó bən adiʼ za ma lɔgɨnɨ mɨtən ɨwu a ngɨ ɨnu tsiŋ ɨtsum ə.

²⁵Yoane Ngaŋ Nga Nkyi a lɔ́gɨ́ mɨtən lá ɨ ghé a ngá nkyi ɛ? A fɔməbvurə kə a mbó ɨbɛn le?” Bo bíʼnɨ́ nkwə́nkə́ a tɨtərɨ bo nɨbo ngə́, “Bɨgɨnə mɨ soŋ lá ngə́ ke le? Be bɨgɨnə soŋ ngə́ ‹A fɔməbvurə,› a mɨ bitɨ awɨgɨnə ngə́, ‹Nɨ tíʼ nkeʼ nɨ́ŋ mɨntəm ɨmən a nye Yoane lá ngə́ ke le?›

²⁶Lá be bɨgɨnə soŋ ngə́, ‹A mbó ŋwɔn mɨsɔŋ a ntsu ə,› bɨgɨnə bɔ́gɨ́ ɨmɨgɨ mɨ ɨnɔ ɨbɛn ben; mbɨ́ʼ ngə́ ŋwɔn tsum a zhi ngə́ Yoane a bé ntom Ŋwi ə.”

²⁷Ma lan, bo tíʼ nchwɨ́gɨ́ a mbó Yeso ngə́, “Ka bɨgɨ zhi awɨgɨ ə.” Wɛrə a sóŋ a mbó bo ngə́, “Ma mɨ kaʼ kɨ soŋ adiʼ za ma lɔgɨnə mɨtən ɨwu a ngɨ ɨnu tsiŋ ə.”

²⁸Yeso a ghɛ́n nɨ mbyi ngə́, “Nɨ wiʼtɨ ngə́ ke? Ŋwɔn tse a tsí nɨ ɨbɔ mbáŋnɨ́ ɨbyi bi bɨbá ghe. Wɛrə a ghɛ́n a mbó wu ndəmə ɨ soŋ ngə́, ‹Mɔn ɨghan, ghɛn faʼ a mu ako atɨ a mɨntam mɨ nyɛtɨ mɨluʼ ɨ sɨŋə ghe.›

²⁹Mɔn wa a chwɨ́gɨ́ ngə́, ‹Ma mɨ kaʼ ghen›; lá ntsi a ndzum nkwebtɨ ntəm ɨyi ngen.

³⁰Tarɨ wa a kɨ́ ngɛn a mbó wu ndzɔŋtɨnɨ ɨ soŋ ndəŋndəŋ anu ə. Məwen a chwɨ́gɨ́ ngə́, ‹Tə̧, ma mɨ ghen,› lá nkeʼ ghen.

³¹A tɨtərɨ ɨbɔ ben bɨbá, a ghɨ́ wɨŋə ngɨ́ anu za ta ɨyi a kɨ́nə́ ndǒ ghe?” Bo chwɨ́gɨ́ ngə́, “Wu ndəmə wa.” Yeso a sóŋ a mbó bo ngə́, “Tsɛʼ a nkənu, ma sóŋə́ a mbó bɨŋ ə, ngaŋ nkwarɨ ashɛbɨ abɔʼnɨ ɨkwarɨ kúŋə́ ngěn a mu Nɨfɔ nɨ Ŋwi a mbyi bɨŋ ə.

³²Mbɨ́ʼ ngə́ Yoane Ngaŋ Nga Nkyi a yén a mbó bən, ndiʼ ndóm wa ɨ kuʼnɨnɨ a ntsǎ ɨwu, lá nɨ sé nɨ́ŋ mɨntəm ɨmən a nye wɛrə; lá ngaŋ nkwarɨ ashɛbɨ abɔʼnɨ ɨkwarɨ nɨ́ŋ mɨntəm ɨma a nye a wɛrə ghe. Nɨ báʼtɨ́ ndzé a ziŋ zɛ́nɨ́ lá, nɨ sé tsi a nkfu ndzum nkwebtɨ mɨntəm ɨmən ɨ nɨŋ a mɛrə a nye anu azhi ɛ.”

³³“Nɨ zuʼ nɨgham nə nanɨ nə mɔʼɔ ghe. Mboŋ adiʼ wu tse a bí ako atɨ a mɨntam mɨ nyɛtɨ mɨluʼ, nkorɨ nká nkarɨsɨ a zɛrə, ntoŋ nɨbɨ́ nɨ nkám mɨluʼ ɨwu, nkɨ nkorɨ a kɔ́ʼtɨ́ ntsiŋ ɨdiʼ ə. A tíʼ ntɛ́gɨ́ a zɛrə a mbó ngaŋ nyɛtɨ mɨluʼ ntiʼ ngɛn ayi a nɨghan a mu alaʼ zə daŋ ə.

³⁴Nkfu nka mɨntam mɨ atɨ ɨ ghɨnə nkúʼ, wɛrə a tsagɨ ngaŋ afaʼ ɨchi a mbó ngaŋ nyɛtɨ mɨluʼ tsa ngə́ á bɨ ghɛn nkwarɨ ɨmyi mɨntam mɨ atɨ ə.

³⁵Ngaŋ nyɛtɨ mɨluʼ tsa chwá ngaŋ afaʼ ɨchi tsa, ɨ shwom a táʼ, njwitɨ a wu mɔʼɔ nkɨ ntumtɨ a wu mɔʼɔ nɨ mɨngɔʼ ə.

³⁶Ŋwɔn wa a bə́ nkwiʼ ntsagɨ ngaŋ afaʼ tsə mɔʼɔ ɨ ghaʼ ntsa a tsə ntsambyi tsa; bo kwiʼ nkɨ ngɨ tsɛʼ ndəŋndəŋ anu za bo ghɨ́nɨ́ a nye bə ntsambyi ba.

³⁷A lwɨ́gɨ́nɨ́ ntsagɨ a mɔn ɨyi wu mbáŋnɨ́ a mbó bo, nkwáʼtə́ a mbó atuəmbəm azhi ngə́, ‹Bo mɨ diʼ mbɔm zɨ shiʼnɨ a mbó mɔn ɨghan wu mbáŋnɨ́ wiŋ ə.›

³⁸Lá a nkfu za ngaŋ afaʼ tsa zɛ́nɨ́ a mɔn ɨyi wu mbáŋnɨ́ wa lá, bo sóŋ a mbó ɨtumbəm ɨtsa ngə́, ‹Nə nɨ mɔn wa a mɨ dzɨ ndá mboŋ adiʼ wiŋ ə. Yenə á bɨgɨnə zhwitɨ ayi taŋ ɨ tiʼ tsi nɨ ɨdzúm ɨchi ɛ!›

³⁹Ma lan, bo tíʼ nchwá ayi, ɨ maʼ ayi a ndzum nká wa, njwitɨ ayi ɛ.”

⁴⁰Ma lan, Yeso a bítɨ́ awa ngə́, “Mboŋ adiʼ wa a ghɨ ngyén, a mɨ ghɨ ɨ nə́ nɨ ngaŋ afaʼ tsa le?”

⁴¹Bo chwɨ́gɨ́ wəmbo ngə́, “A mɨ zagɨ zhwitɨ ngaŋ ngɨ ɨnu tsɨ tɔmnɨnɨ tsa, ɨ tiʼ tɛgɨ ako atɨ a mɨntam mɨ nyɛtɨ mɨluʼ za a mbó ngaŋ afaʼ tsə daŋ tsa tsɨ mɨ gha ɨmyi mɨntam mɨ atɨ a nkfu za mɨ tənə ghe.”

⁴²Yeso a tíʼ mbítɨ́ awa ngə́, “Nɨ bvurɨ tɨ tɔŋ anu za aŋwaʼnɨ a Ŋwi a soŋnɨ ngə́: ‹Ngɔʼ za ngaŋ ngvwu ndá nyɛ́ʼnɨ́ lá, ɨ tíʼ mbəŋ mbe ngɔʼ nɨbú nɨ ndá; Maʼmbyí a ghɨ́ a məziŋ ə, a bɔŋ be tɨ́sə́n a ndzé ghe!›

⁴³Ma lan, ma soŋə a mbó bən ngə́, bɨ ghɨ kwárɨ́ Nɨfɔ nɨ Ŋwi a mbó bən ɨ gha a mbó ɨbɛn ba bɨ kónɨ́nɨ́ mɨntam mɨ Nɨfɔ məna.”

⁴⁴[12]

⁴⁵Mbáʼ bɨntumshe bə wi abɔʼnɨ bə Farisao zúʼnɨ́ nɨgham nə nanɨ nen lá, nji ngə́ a kə́ ngamə lá mbɨ́ʼ awa ghe.

⁴⁶Ma lan, bo zhwə́ŋtɨ́ a nkó zɨə. Lá bo kə́ mbɔ́gɨ́ ɨmɨgɨ mɨ ɨnɔ, mbɨ́ʼ ngə́ ɨnɔ wa lɔ́gɨ́ a Yeso tso ntom Ŋwi ə.