Read Ngemba Matyo 23 Bible Online

Matyo 23 - Ngemba bible

Matyo 23

¹Yeso a tíʼ sóŋ a mbó ɨnɔ ɨnɔ ɨbɛn wa abɔʼnɨ bɨyɛʼ ɨbyi ngə́,

²“Bɨdiʼ bɨ Nyɔngɔŋ bo bɨ bə Farisao lɔgɨ ɨtumbəm tsa tso ɨbɛn ba bɨ tíʼnə́ faʼə afaʼ a Mose a ndiʼ nyɔngɔŋ ə.

³Ma lan, á nɨ ndzúʼnə́ nkə́ ngɨ̌ ɨnu ɨtsum tsa bo sóŋnə́ ngə́ á nɨ ngɨə; lá nkeʼ ngɨə a tsa bɛrə ghɨnə; mbɨ́ʼ ngə́ bo sóŋə́ nkeʼ ngɨə ghe.

⁴Bo kórə́ ɨbyɛʼ tsə wi tɨ ɨdentɨ, njiʼə a mbyɛʼnɨ ɨbɛn; lá bo mboŋ, bo chi keʼ gha akwatɨ tsɛʼ nɨ shwi abó a ntsɔ́ʼ tsɛrə ɨ byɛʼə.

⁵Ngɨnɨ mɨnu ɨma mɨtsum tsi lá tsɛʼ ngə́ á ɨbɛn zɛn awa ghe. Nɨ ze ɨbobtɨ tsɨ sa mɨnkɨ tsa bɨ vwuŋnɨ anu a Ŋwi ɨwu, tsa tsɨ dzənkɨnɨ a nye mɨdzenɨ ɨma abɔʼnɨ mɨnkwe ɨma ghe. Nɨ ze adzaŋ za tsɨ fankɨnɨ ə! Nɨ kɨ ndze adzaŋ za mɨndzə́gɨ́rɨ́ mɨ ɨtsɛʼ tsa sakɨnə!

⁶Bo kɨ nkɔŋ ɨlaŋ ɨbɛn bə wi a nye ɨdiʼ nɨdorɨ abɔʼnɨ ɨlaŋ ɨbɛn bə wi a mu ndáŋwi bə Yuda;

⁷bo kɔŋ ngə́ á bɨ ntsáʼtə́ awa ngvótə́ a tɨshe nɨ ɨdiʼ mɨtan, á ɨbɛn kə́ ntɔ́ŋə́ awa ngə́, ‹Ndiʼ Aŋwaʼnɨ›.

⁸Ka bɨ tsi ayi nɨ ɨ zagɨ tɔŋ agho ngə́, ‹Ndiʼ Aŋwaʼnɨ›, mbɨ́ʼ ngə́ bən bɨtsum nɨ ɨbɔmbɨma nkɨ ntsi tsɛʼ nɨ táʼ Ndiʼ Aŋwaʼnɨ ə.

⁹A nkwiʼtə, ka nɨ tsi awən nɨ ntɔŋ ŋwɔn tse atuəshe ngə́, ‹Tarɨ› mbɨ́ʼ ngə́ nɨ tsi tsɛʼ nɨ táʼ Tarɨ, mbáʼ a tsinɨ a fɔməbvurə ghe.

¹⁰Kə ngə́ á bɨ tɔŋ agho ngə́, ‹Ntsagɨnɨ›, mbɨ́ʼ ngə́ nɨ tsi tsɛʼ nɨ táʼ ntsagɨnɨ, mbe Wa bɨ Zɔ́ʼnɨ́ wa.

¹¹Ŋwɔn wu ngwi a tɨtərɨ bən a tsi nɨ ɨ zagɨ be be ŋwɔn afaʼ ɨwɨŋ ə.

¹²Ŋwɔn tsum wa a kɔ́ʼsɨ́nə́ atuəmbəm azhi atɨ́, bɨ ghɨ shíʼsɨ́ ayi, á ŋwɔn tsum wa a shíʼsɨ́nə́ atuəmbəm azhi a tɨshe, á bɨ kɔʼsɨ ayi ɛ.”

¹³“Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ vwuʼnɨ ntsundá a mbó ɨbɛn a nkúŋə́ a mu Nɨfɔ nɨ fɔməbvurə ghe. Bɨŋ mboŋ ka nɨ kə́ nkúŋə́ awən ɨwu, nkeʼ nkə́ nyɛ́ʼtə́ á ɨbɛn ba bɨ lɔnɨ nkuŋə ɨwu, á bɨ kuŋə.

¹⁵Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ tǒm bɨsagɨrə bə wi nkə́ ngyǐŋ nɨyen nə sa taŋ ɨ chi bəŋ tsɛʼ ntəm táʼ ŋwɔn ə. A kɨ mbəŋ ntəm ɨyi, nɨ ghɨ ayi a kuʼnɨ a ngén a mu ɨmugɨ nɨnkoŋ nkfu tsi bá ntsa adzaŋ za nɨ benɨ lá!

¹⁶Wei ngɨ́ʼ zɨ ngwi a nye bɨŋ bɨdiʼ bɨ ndómnji bɨ tə́ ndzě ɨdiʼ! Nɨ sóŋə́ ngə́, ‹Be ŋwɔn a kan nɨ ɨkum Ndáŋwi zɨ Ngwi, ka a tsi ayi nɨ ɨ zagɨ lɛn akan azhi ɛ; lá be a kan nɨ ɨkum ŋwaʼŋwaʼ wa a tsinɨ a mu Ndáŋwi zɨ Ngwi, a tsi nɨ nde akan azhi ɛ.›

¹⁷Bɨŋ ɨbərɨ tsa tsɨ nɨ bɨfɨgɨ! A tsi zɨŋə ntsi nɨ ɨlɨŋ ngɛn nɨ mbyi ɛ? Ŋwaʼŋwaʼ wa kə Ndáŋwi zɨ Ngwi za ɨ ghɨnə ŋwaʼŋwaʼ wa a be wu fɛmnɨ le?

¹⁸Nɨ kə́ sóŋə́ ngə́, ‹Be ŋwɔn a kan nɨ ɨkum atú a mɨkúʼ, ka a tsi ayi nɨ ɨ zagɨ lɛn akan azhi ɛ; lá be a kan nɨ ɨkum azúm zə ghanɨ za a nɔŋnɨ atú a mɨkúʼ, a tsi nɨ nde akan azhi ɛ.›

¹⁹Bɨŋ bɨfɨgɨ! A tsi zɨŋə ntsi nɨ ɨlɨŋ ngɛn nɨ mbyi ɛ? Azúm zə ghanɨ za kə atú a mɨkúʼ za a ghɨnə azúm zə ghanɨ za a fɛm le?

²⁰Ma lan, ŋwɔn tsum wa a kanɨ nɨ ɨkum atú a mɨkúʼ, a kan lá nɨ ɨkum atú a mɨkúʼ abɔʼnɨ ɨdzúm tsə ghanɨ ɨtsum tsa tsɨ nɔŋnɨ ɨwu;

²¹ŋwɔn tsum wa a kanɨ nɨ ɨkum Ndáŋwi zɨ Ngwi, a kan lá nɨ ɨkum zɛrə abɔʼnɨ ɨkum Ŋwi, zɨ wa a tsínə́ wə mu;

²²ŋwɔn tsum wa a kanɨ nɨ ɨkum fɔməbvurə, a kan lá nɨ ɨkum abərɨ a Ŋwi abɔʼnɨ zɨ wa a shíʼtɨ́nə́ nchyɛ̌ atú abərɨ məza.

²³Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ yɛbtɨ ɨdzúm ndza tsa bɨ tɔ́ŋnə́ ngə́ mintɨ, dilɨ abɔʼnɨ kuminɨ ɨdiʼ tsi nɨghúm, ngǎ a táʼ adiʼ a mbó Ŋwi, lá ngwágɨ́nɨ́ ɨnu tsɨ dɨtɨnɨ tsa Nyɔngɔŋ a diʼnə tso ngɨ̌ ɨnu tsa tsɨ tɛmnɨnɨ abɔʼnɨ akǒmɨlɨŋnɨ abɔʼnɨ ɨ faʼə nɨ táʼ ntəm; mbáʼ a nɨ tsɛrə tsa nɨ tsinɨ nɨ ngɨə nkeʼ a tsə daŋ a ngwágɨ́nə́ ghe.

²⁴Bɨŋ bɨdiʼ bɨ ndómnji bɨ tə́ ndzě ɨdiʼ, nɨ kyɛ́rə́ ɨbagɨ ɨdzúm tsɨ kɨʼnɨ a mu mɨluʼ ɨmən, lá mbaŋnə myiɛ a tsə wi ə!

²⁵Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ sugɨ ndzum ndɔ́ŋ ɨtsən abɔʼnɨ ndzum ɨbatɨ ɨkáŋ ɨtsən, lá ɨmu ɨtsa lon nɨ ɨdzúm tsa nɨ kwarɨnɨ nɨ adaʼ abɔʼnɨ mbɔm amyiɛnɨngam ə.

²⁶Bɨŋ bə Farisao ba nɨ nɨ bɨfɨgɨ! Fom sugɨnə ɨmu ndɔ́ŋ za abɔʼnɨ ɨmu abatɨ akáŋ za taŋ á ndzum ɨzhi tiʼ nkɨ fɛmə!

²⁷Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ fi ɨtú mɨshe tsa bɨ zɔʼnɨ tsɨ fúgɨnə, mbáʼ tsɨ lanɨ mbɔŋ abyɛn lá wə mu a luŋ ɨkwɛn ɨkfú ɨbɛn abɔʼnɨ ɨkfú ɨbɛn tsa tsɨ byenə ghe.

²⁸Ndəŋndəŋ nɨ tsi tso nɨ bɔŋ a ɨshi ɨmɨgɨ ɨbɛn abyɛn, lá ɨtsi abɔʼnɨ ɨbvu ɨ lon a mu ɨnye ɨtsɨŋ ə.”

²⁹“Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ vwǔ ɨtú mɨshe ntóm Ŋwi nkə́ ŋwɛ́ʼsə́ tsə ɨbɛn ba bɨ chinɨnɨ

³⁰ɨ sóŋə́ ngə́, ‹Bɨgɨ bá be tsi atuəshe a nkfu za mbáʼ bɨta ɨbɨgɨ bə kɔ́ʼɔ́nguʼ tsínɨ́ atuəshe muŋ bɨgɨ sé nɨŋ mbó ɨmɨgɨ a njwítɨ́ ntóm Ŋwi tsa bo zhwítɨ́nɨ́ lá.›

³¹Ma lan, nɨ bémə́ nɨ mɨntsu ɨmən ngə́ nɨ lá ɨbɔ bɨ ɨbɛn ba bɨ zhwítɨ́nɨ́ ntóm Ŋwi lá.

³²Ghɛnə nɨ mbyi lá ntiʼ mɛtɨnə ɨnu tsa bɨta ɨbən bə kɔ́ʼɔ́nguʼ bíʼnɨ́nə́.

³³Bɨŋ mɨnyo abɔʼnɨ ɨbɔ bɨ mɨnyo! Nɨ kwɛ ngwiʼtɨ ngə́ nɨ ghɨ lɛʼ ɨmugɨ nɨnkoŋ a nkfu wa bɨ ghɨnɨ sáʼ awən ɨ tsagɨ ɨwu lá ɨ nə́ le?

³⁴Ma lan, ma sóŋə́ awən ngə́ ma mɨ tsagɨ ntóm Ŋwi, ngaŋ zóŋ abɔʼnɨ bɨdiʼ bɨ aŋwaʼnɨ a mbó bɨŋ ə; nɨ mɨ zhwitɨ a bə mɔʼɔ, ɨ kwemtɨ a bə mɔʼɔ atú abaŋnɨ-baŋnɨ, ɨ ləŋ a bə mɔʼɔ nɨ ngwan a mu ndáŋwi bə Yuda ɨtsən ɨ kə́ númə́ vwugɨnə a bɛrə a mu ntáʼmbagə, a ndɔgɨnə a nye wen ɨ ghɛn kuʼ a nye yirɨ ə.

³⁵Adzaŋ məwen, ɨnɨŋ ngɨ́ʼ zɨ njwitɨ ɨbɛn ba ka bɨ fə awa anu zə tsɛrə mɨ chwinɨ atú bən, ɨ lɔgɨnɨ a nye Abɛrɨ wa nɨ zhwítɨ́nɨ́ wa a sé anu zə tsɛrə fan ɨ shiʼ kuʼ a nye Zakaria mɔn Barakɨya wa nɨ zhwítɨ́nɨ́ a tɨtərɨ atú a mɨkúʼ bo Ndáŋwi zɨ Ngwi lá.

³⁶Tsɛʼ a nkənu, ma sóŋə́ awɨŋ ə, ɨnɨŋ ngɨ́ʼ ɨnu tsiŋ ɨtsum ghɨ kúbɨ́nɨ́ atú a ɨbɛn bɨ nɨwə niŋ ə!”

³⁷“Yerosalɛm, Yerosalɛm! O zhwítɨ́ ntóm Ŋwi nkə́ ntúmtɨ́ ɨbɛn ba Ŋwi a tsagɨnə a mbó gho nɨ mɨngɔʼ ə! Nkfu tsə ghaʼnɨ ma kwaʼtɨnə a ngótɨ́ ɨbɛn ɨbo bɨtsum a mu mbó me tso mbáʼ má ngúbɨ́ a ghótɨ́nɨ́ ɨbɔ ɨbyi a mu mɨbabɨnɨ ɨmyi, o ton agho ə!

³⁸Zɛn nda, bɨ mɨ nyɛʼtɨ ndá ɨzo, á ɨ tɛm zɨ ndzobɨnə.

³⁹Ɨ lɔgɨnɨ tɨtsɔŋnɨ ɨ ghěn nɨ mbyi, ma sóŋə́ agho, o láʼ koʼ aghan zɛn ɨ kɔʼ kuʼ nkfu za o ghɨnɨ sóŋ ngə́, ‹A Ŋwi a fɔgɨ a zɨ wa a yenə nɨ ɨkum Maʼmbyí ɛ.› ”