Read Ngemba Matyo 24 Bible Online

Matyo 24 - Ngemba bible

Matyo 24

¹Yeso a ló a Ndáŋwi zɨ Ngwi ntiʼə ngěn ayi mbáʼ bɨyɛʼ ɨbyi yénɨ́ wəmbo a ntwiʼtə wəmbo adzaŋ za bɨ kórɨ́nɨ́ Ndáŋwi zɨ Ngwi ə.

²Lá wɛrə a chwɨ́gɨ́ a mbó bo ngə́, “Nɨ wiʼtə ndzě a tsenə ɨtsum ə, kə nde? Ma sóŋə́ awən tsɛʼ a nkənu ngə́ nkfu ghɨ yen za mbáʼ tsɛʼ táʼ ngɔʼ wɛnə wu tsɛrə, adiʼ wɛnə, a ghɨ keʼ atú zɨ mɔʼɔ bə nɔŋ, tɨkə bɨ tɔʼ ndzagɨ a ɨshe.”

³Mbáʼ Yeso a shíʼtɨ́nɨ́ ntsi atú Mbám Olif za lá, bɨyɛʼ ɨbyi tíʼ ngyen wəmbo ndzum ndzum, mbitɨ ayi ngə́, “Soŋ awɨgɨ ə, a ghɨ be mə lan lá a nyom ake, alɨgɨ a kɨ mbe ake a ndiʼə ngə́ o yiŋə, nkɨ mbe ndwitɨ mbyi le?”

⁴Yeso a chwɨ́gɨ́ awa ngə́, “Nɨ lə ɨtú ɨtsɨŋ ə, á ŋwɔn tse a keʼ awən tamtə.

⁵Mbɨ́ʼ ngə́ bə ghaʼnɨ ghɨ yen nɨ ɨkum ɨghan ɨ soŋə ngə́, ‹Ma nɨ Wa Bɨ Zɔ́ʼnɨ́ wa,› ɨ kɨ tiʼ tsagɨ ɨbɛn bə ghaʼnɨ a mɨ́tfúŋ ə.

⁶Nɨ ghɨ ndzúʼ mbɨ́ʼ mɨntso abɔʼnɨ fɨnkərɨ fɨ ntso; nɨ zɛn ngə́ njimbɨʼ mətsen tsɨ chiʼtɨ awən; mbɨ́ʼ ngə́ mətsiŋ mɨ zagɨ fuə, lá á bvurɨ tɨ diʼ ngə́ a nɨ ndwitɨ mbyi ɛ.

⁷Ɨlaʼ ghɨ tókɨ́nə́ a tsə mɔʼɔ, á nɨfɔ njíntə́ a nə mɔʼɔ, á mɨchwinɨ a tsi a nye ɨdiʼ tsɨ ghaʼnɨ, á ɨshe nɛ́mə́ nɨ ɨdiʼ nɨ ɨdiʼə.

⁸Ɨnu tsiŋ ɨtsum ghɨ bé tso mbiʼnɨ ndzaŋə a mbó mabvu wa a chiʼnə.

⁹Bɨ ghɨ tiʼ gha awən a mbó ɨbɛn ba bɨ mɨ ghɨ á nɨ ze ngɨ́ʼ, ɨ tiʼ zhwitɨ awən; ɨlaʼ ɨtsum mɨ tiʼ ban awən mbɨ́ʼ ɨkum ɨghə.

¹⁰A nyom məwa, á bə ghaʼnɨ nyɛʼ abeməntəm aza, nkɨ ntáŋ a mɨnaŋ atú ŋwɔn nɨ ŋwɔn, ɨ tiʼ kɨ ban a ŋwɔn nɨ ŋwɔn ə.

¹¹Ntóm Ŋwi ɨchwenu mɨ tiʼ fu a ɨshe, ɨ tintɨ ɨnɔ ɨbɛn ɨ tsagɨ a mɨ́tfúŋ ə.

¹²Abɨgəntəm a ghɨ dzagɨ ɨdiʼ a nye ndóm wa akɔŋnɨ a ɨbɛn bə ghaʼnɨ a mɨ bɔrɨkə.

¹³Lá ŋwɔn tsum wa a ghɨnɨ kórɨ́ ntəm ɨyi ɨ ghɛn kuʼ a ndwitə, bɨ ghɨ loŋ ayi ɛ.

¹⁴Nkən wu Shiʼnɨ wen mbɨ́ʼ nɨfɔ nɨ fɔməbvurə, bɨ ghɨ tiʼ soŋ a wɛrə a mbó mbyi tsum, á ɨ be tso atɛmə-ndzě a mbó ɨlaʼ ɨtsum; a nyom məwa, ndwitə mɨ byi tiʼ yiŋə.”

¹⁵“Nɨ ghɨ ndzɛn ‹Azúm a Tɨbɔŋ za a Tsənkɨnə nkə́ ngyiŋə nɨ adɨrətú› za ntom Ŋwi za ɨ bénɨ́ Dania ɨ ghámnɨ́ mbɨ́ʼ a zɛrə a tɛm adiʼ zə fɛmnɨ (á ŋwɔn wa a tɔ́ŋnə́ a zhi a məziŋ ə),

¹⁶á ɨbɛn ba bɨ tsinɨ a Yudiya kɨə ngɛn nɨ ɨtú mbám ndyɛmtɨ ɨwu ə.

¹⁷Ŋwɔn wa a tsinɨ atú a ndá á keʼ bə shiʼ ngə́ zɨə ghɛn lɔgɨ azúm za a tsinɨ a ndá zɨə.

¹⁸Ŋwɔn wa a tsinɨ afɔn á keʼ bə nkwɛn ngɛn a ndɔgɨ mɨmam ɨmyi ɛ.

¹⁹A ghɨ bɨ́gɨ́ be tɨ́sə́n a nye njwi mətsa a mbó bɨmabvu bə nɨbum abɔʼnɨ bɨmabvu bə bɔrɨ ə!

²⁰Tsaʼtɨnə a Ŋwi ngə́ á nkfu za nɨ kɨənə ɨ ghɛn lyɛmtɨ keʼ tsi a nkfu ɨfɛgɨ wu tən bo mbəŋ za kə a Njwi Alaʼ Ŋwi ə.

²¹Mbɨ́ʼ ngə́ a nkfu məwa ngɨ́ʼ ghɨ gháʼ ɨ tsa mbó, ɨ tsa za bɨ bvúrɨ́nə tɨ zɛn ɨ lɔgɨnɨ a mbiʼnɨ mbyi ɨ yen gha ɨ sɨŋə ghe. Azúm zə tsɛrə tso məzen a láʼ keʼ bə nkwiʼ nchyɛ.

²²Lá Ŋwi a kwɛnə shwɛʼtɨ ndvuŋ njwi mətsa ə. Wɛrə a tú mə lá fom ghɨ muŋ bɨ ghɨ keʼ a ŋwɔn mɨsɔŋ a ntsu tse loŋə. Lá, mbɨ́ʼ atú a ɨbɛn ɨbyi ba wɛrə a tsɔʼnə, Ŋwi a mɨ shwɛʼtɨ njwi mətsa.

²³A nkfu məwa, be ŋwɔn tse a soŋ a mbó gho ngə́, ‹Ze azo, Wa Bɨ Zɔ́ʼnɨ́ wa a wɛnə!› kə ngə́, ‹A yirɨ!› nɨ keʼ mɨntəm ɨmən wə ɨnye nɨŋə.

²⁴Mbɨ́ʼ ngə́ bɨ Wa Bɨ Zɔ́ʼnɨ́ bɨ ɨchwenu abɔʼnɨ ntóm Ŋwi ɨchwenu ghɨ fú a ɨshe, ɨ ghɨnɨ ɨnu tsɨ yerɨnɨ-yerɨnɨ abɔʼnɨ ɨnu tsɨ tsanɨnɨ taŋ ɨ tintɨ ɨnɔ ɨbɛn ɨ tsagɨ a mɨ́tfúŋ, mbáʼ be a chi fu, ɨ kɨ tsagɨ ɨbɛn ba Ŋwi a tsɔʼnɨ awa ghe.

²⁵Zuʼnə! Ma kwɛnə soŋ awən bɔŋ á nkfu ɨzhi yiŋə.

²⁶Ma lan, be bɨ soŋ a mbó bən ngə́, ‹Zɛnə, a yirɨ a mu mɨkɨghonɨ ə,› nɨ keʼ awən abyɛn tsa; kə bɨ soŋ ngə́, ‹Zɛnə, a tsi a mu kwasɨ ndá zɨ ɨmu ə,› nɨ keʼ mɨntəm ɨmən ɨwu nɨŋə.

²⁷Mbɨ́ʼ ngə́, tsɛʼ tso mbáʼ azhwibtɨ a mbəŋ a zhwibtɨnə ndǒ a sáʼnyom ngěn nkuʼə a ntsonyom lá, nə nɨ adzaŋ za njwi za Mɔn Ŋwɔn a lo yen, ɨ lonɨ be.

²⁸Adiʼ atsum za akfú a ŋwɔn a nɔŋnɨ ɨwu, a nɨ adiʼ a mbomnkɨ ɨzám ə.”

²⁹“Tsɛʼ mbáʼ njwi mətsa, tsɨ ngɨ́ʼ za ɨ tsanɨ mbó mɨ byi ghangə tsɨ miə, bɨ mɨ vuʼnɨ ntsu nɨnyom, á saŋ a keʼ nkɨ mbyi ntá ɨ tánɨ́, á mɨndzɔŋ kwerɨkɨ a fɔməbvurə, á ɨdzúm ɨtsum tsa tsɨ tsinɨ nɨ adaʼ a fɔməbvurə chiʼnɨ ə.

³⁰A nyom məwa á alɨgɨ a Mɔn Ŋwɔn a tom ɨ fu a fɔməbvurə ghe. Ɨtsé tsɨ wi ɨtsum tsa tsɨ tsinɨ atuəshe, tsɨ mɨ to a kɨzɔb, adzaŋ za bo mɨ zɛn a Mɔn Ŋwɔn á ngyíŋə́ a mu mbaʼ fɔməbvurə nɨ mɨtən abɔʼnɨ nɨfáŋ nə wi ə.

³¹Ntaŋ ghɨ tɔ́ŋ nɨ nji zɨ ngwi, á wɛrə tiʼ ntsagɨ bɨtsen bɨ ndá bɨ Ŋwi ɨbyi a nye bɨbagɨ bɨ mbyi ben bi nɨkwa, á bo ghotɨ ɨbɛn ɨbyi ba wɛrə a tsɔʼnə ɨ lɔgɨnɨ a nye táʼ bagɨ atuəshe ɨ ghɛn kuʼ a nye wu mɔʼɔ ghe.”

³²“A nɨ yɛʼ anu a nye atɨ a figɨ ə. Tsɛʼ mbáʼ mbó ɨmyi ghɨ nzhwurɨ nɨ nkyi, ɨzəŋ chwuʼ ntúgə́ ɨwu, nɨ byíɛ njíɛ ngə́ nkfu ɨdiʼ tsɨ lomnɨ ɨ tiʼ abó ə.

³³Ndəŋndəŋ, be nɨ ghɨ ndzɛ́n ɨnu tsiŋ ɨtsum, muŋ nɨ mɨ zhi ngə́ wɛrə a fatɨnə, ntiʼ tsɛʼ a nkom ntsu nká ə.

³⁴Tsɛʼ a nkənu, ma sóŋə́ awɨŋ ə, nɨwə nə sɨŋə wɛnə mɨ keʼ lwitɨ tɨkə ɨnu tsiŋ ɨtsum fuə.

³⁵Fɔməbvurə abɔʼnɨ atuəshe ghɨ lwitə, lá nɨgham ɨnə láʼ keʼ chiʼnə.”

³⁶“Ka ŋwɔn tsɛrə a zhi ayi njwi zɨ wu kə a nyom wu wu ə, tsɛʼ bɨtsen bɨ ndá bɨ fɔməbvurə ka bɨ kɨ nji awa, kə́ be Mɔn ɨyi wu mbáŋnɨ́, a nɨ tsɛʼ Tarɨ zɨmboŋ wa a zhinə.

³⁷Tsɛʼ tso mbáʼ a tsínɨ́ a nye njwi Nua lá, nə nɨ adzaŋ za a lonɨ bé a nye njwi za Mɔn Ŋwɔn a lonɨ yiŋə.

³⁸Tsɛʼ tso mbáʼ a tsínɨ́ a nye njwi mətsa bɔŋ á nkyi wa yen ndzɔʼsɨ ɨdiʼ lá, ɨbɛn kə́ ndzɨ́ə nkə́ nǒ, mbáŋnɨ́ bo bɨ bəngye zɔ́ʼkɨnə ɨ kɔʼ kuʼ njwi za Nua a kónɨ́ a mu abáŋ a nkyi za,

³⁹bo sé zhí anu zə tse za a kɨ́nə́ fúə ɨ kɔʼ kuʼ njwi za nkyi wa yénɨ́ ndzɔ́ʼsɨ́ ɨdiʼ nkwəŋ awa bɨtsum ngɛn nɨ bo lá, nə nɨ adzaŋ za a ghɨnɨ bé a nye nkfu za Mɔn Ŋwɔn a lonɨ yiŋə.

⁴⁰A nkfu məwa, mbáŋnɨ́ tsi bá ghɨ faʼnə a mu ɨshwom; á bɨ yen ndɔgɨ a táʼ, ɨ nyɛʼtɨ a wu mɔʼɔ ghe.

⁴¹Bəngye bi bɨbá ghɨ tsí atú ngɔʼ abán ɨ ghɔʼnə abán; á bɨ yen ndɔgɨ a táʼ, ɨ nyɛʼtɨ a wu mɔʼɔ ghe.

⁴²A nɨ lə ɨtú ɨtsən, nkyérə́, mbɨ́ʼ ngə́ ka nɨ zhi awən njwi za Maʼmbyí a ghɨnɨ yiŋə.

⁴³Lá, á nɨ zhi a ziŋ ə, mboŋnjwuʼ a bé zhí nkfu za ndzɛrə a yenə, muŋ a tsi tsɛʼ a nɨkyerə taŋ ɨ kɨ́ŋ á bɨ keʼ ndá ɨzhi bɛʼə.

⁴⁴Ndəŋndəŋ nɨ tsi nɨ ɨ kɨ kyaŋtɨ ɨnye ɨtsən; mbɨ́ʼ ngə́ Mɔn Ŋwɔn a mɨ yen a nye nyom wa ka nɨ kwɛ ntsíŋə́ awən ayi ɛ.”

⁴⁵“A tiʼ mbe ɨwa wa a nɨ ŋwɔn afaʼ wa a faʼnə nɨ táʼ ntəm nkɨ mbe wu zóŋ le? A nɨ zɨ wa tafaʼ ɨyi a lɛnɨ ngə́ a ndə́ŋtɨ́ ngaŋ afaʼ ɨchi tsə mɔʼɔ, taŋ ɨ ghanə mɨdzɨ ɨma a nye nkfu za ɨ kuʼnɨnə.

⁴⁶Ɨfɔgə tsi a mbó ŋwɔn afaʼ wa tafaʼ ɨyi a mɨ yen kwatɨ á ngɨə mə lə.

⁴⁷Tsɛʼ a nkənu, ma soŋə awɨŋ ə, a mɨ tiʼ lɛn ayi á tiʼə ndə́ŋtɨ́ ɨdzúm ɨchi ɨtsum ə.

⁴⁸Lá be ŋwɔn afaʼ wa a be wu abɨgəntəm, a wiʼtɨ a mu ntəm zɨ ngə́, ‹Tafaʼ ɨghan a mɨ tɨʼ a nkwé ghe,›

⁴⁹a biʼnɨ a shwóm ngaŋ afaʼ tsə mɔʼɔ tsa bo bo faʼnə, ɨ kə́ dzɨ́nə ɨ kə́ nónə bo bɨ ɨbarɨ mɨluʼ ə.

⁵⁰Lá tafaʼ ŋwɔn afaʼ wa mɨ tiʼ kwɛn a nye njwi za ka ŋwɔn afaʼ wa a kwɛ ntsíŋə́ ayi a wɛrə, ɨ kɨ be nyom wa ka a zhi ayi ɛ.

⁵¹Tafaʼ ɨyi a mɨ tiʼ nɨŋ ngɨ́ʼ zɨ ngwi wə ɨnye, ɨ ghɨ á anu za a zɛ́nɨ́ ngaŋ ngɨ ɨtsi á zɛn ayi ɛ. Adiʼ məwa a mɨ tiʼə búgɨnə ɨ kə́ kfúrɨnə mɨsɔŋ ɨmyi ɛ.”