Read Ngemba Matyo 25 Bible Online

Matyo 25 - Ngemba bible

Matyo 25

¹Yeso a ná nɨgham nen ngə́ “A nkfu wa Mɔn Ŋwɔn a ghɨnɨ yen lá, Nɨfɔ nɨ fɔməbvurə ghɨ bé lá tso ɨnə. Ngo tsi nɨghúm lɔ́gɨ́ mɨnkaʼ ɨma ɨ fu ngɛn ɨ ghɛn bom a ta mɨngən ə.

²Bə bi bɨtə̧̂ dzɨ́ŋtə́, bə bi bɨtə̧̂ tsi nɨ zóŋ ə.

³Bə dzɨŋtɨnɨ ba lɔ́gɨ́ mɨnkaʼ ɨma lá nkeʼ nkyi ɨmugɨ wə daŋ tiʼtə;

⁴lá ba bɨ tsínɨ́ nɨ zóŋ lá, bɨ lɔ́gɨ́ bɨzhwɛʼ bɨ nkyi ɨmugɨ ba bɨ tsínɨ́ a nɨ́lónɨ́ ə.

⁵Mbáʼ bɨ chwúŋsɨ́nɨ́ a ta mɨngən a ngyiŋə lá, bo bɨtsum kə́ nkfugɨ ɨtú ɨtsa ntsɨ́ŋə́ ndyě ghe.

⁶Ɨtfúʼ ghɨnə ntə́nɨ́, nji zɨ tse tɔnkɨ ngə́, ‹Zɛnə, ta mɨngən wa a wɛnə ghe! Nɨ fu á bɨgɨnə ghɛn mbom ayi ɛ!›

⁷A nyom məwa, ngo tsa ɨtsum ló atɨ́ nkwɛ́ʼtɨ́ mɨnkɨ mɨ mɨnkaʼ ɨma ghe.

⁸Bə adzɨŋtɨnɨ ba tíʼ sóŋ a mbó bə zóŋ ba ngə́, ‹Nɨ lɔntɨ awɨgɨ nɨ nkyi ɨmugɨ ɨwən wu mɔʼɔ, mbɨ́ʼ ngə́ mɨnkaʼ ɨmɨgɨ tiʼnə mbyɛ́nə́ ghe.›

⁹Bə zóŋ ba chwɨ́gɨ́ ngə́, ‹Ɨ ghɨ keʼ kuʼnɨ a mbó bɨgɨnə bɨtsum ə; nɨ baŋnɨ ngɛn a mbó ɨbɛn ba bɨ fenɨ nkyi ɨmugɨ, ndzuŋ ɨwən ɨwu ə.›

¹⁰A nkfu za bo ghɛ́nɨ́ adiʼ a ndzúŋ ɨwa nkyi ɨmugɨ wa lá, ta mɨngən wa a yíŋə. Bə bi bɨtə̧̂ ba bɨ kyáŋtɨ́nɨ́ ɨnye ɨtsa bɨ ghɛ́n bo bɨ ta mɨngən wa nkón a ndá adiʼ a ndzɨ nɨzɔ́ʼ; bɨ vwuʼnɨ ntsundá ə.

¹¹Abaŋ a bənə mbe ɨwu, ngo tsə mɔʼɔ tsa kɨ ngyen, ɨ soŋ ngə́, ‹Tə̧, Tə̧, ŋaʼ ntsundá a mbó bɨgɨ ə.›

¹²Lá a chwɨ́gɨ́ ngə́, ‹Tsɛʼ a nkənu, ma soŋ a mbó bɨŋ ə, ka ma zhi aghə awɨŋ ə.› ”

¹³Yeso a tíʼ ndwɨgɨnɨ ngə́, “A nɨ nkyérə́ mbɨ́ʼ ngə́ ka nɨ zhi awɨŋ njwi məza kə a nyom wu wu ə.”

¹⁴“A nkfu məwa Nɨfɔ nɨ fɔməbvurə ghɨ be lá tso ɨnə. A bé a nkfu tse, ŋwɔn tse a tsi nɨ ngen a nɨghan ə. Wɛrə a tíʼ ntɔ́ŋ ngaŋ afaʼ ɨchi, nga ɨdzúm ɨchi ngə́ á bɨ chwa ntiʼtə.

¹⁵A mbó táʼ wɛrə a ghá aban a nkáb, a mbó wu mɔʼɔ nkáb nchwuʼ mɨghúm mi nɨkwa, a mbó wu mɔʼɔ nkáb nchwuʼ tsi nɨghúm ə. Wɛrə a yɛ́btɨ́ nkáb za a mbó bo ndzɔ̌ŋ ndvuŋ adaʼ wa ŋwɔn nɨbo tsum a tsínɨ́ nɨ wɛrə, ntiʼ ɨ fu ayi ɛ.

¹⁶Wa mbáʼ a kwárɨ́nɨ́ nkáb táʼ aban lá, a ghɛ́n mbyi mbiʼnɨ a mɨtan nɨ zɛrə ghe. Abi azhi a kón wə ndzum a nye nkáb táʼ aban ə.

¹⁷Ndəŋndəŋ, ŋwɔn afaʼ wa a kwárɨ́nɨ́ nkáb nchwuʼ mɨghúm mi nɨkwa, a ghɛ́n mbəgɨrɨ tsə daŋ kon wə ndzum nkáb nchwuʼ mɨghúm mi nɨkwa ghe.

¹⁸Lá ngaŋ afaʼ za ɨ kwárɨ́nɨ́ nkáb nchwuʼ nɨghúm lá, a ghɛ́n ntóŋ nɨbɨ́ a tɨshe ndwɛʼ nkáb nchwuʼ nɨghúm tsɨ tafaʼ ɨyi tsa ɨwu ə.

¹⁹Abaŋ a ghɨnə ságɨ́ tafaʼ ɨwa wa a kwɛn, ngɨ bo bo sháŋ nkáb za.

²⁰Ngaŋ afaʼ za ɨ kwárɨ́nɨ́ nkáb táʼ aban ɨ kɔ́ʼtɨ́ a ɨshe nga nkáb táʼ aban, ɨ soŋ ngə́, ‹Tə̧, o kɨ chi ngá nkáb táʼ aban a mbó me, zɛn lá mbáʼ ma bənɨ nkwiʼtɨ nkáb táʼ aban wə ndzum ə.›

²¹Tafaʼ ɨyi a sóŋ wəmbo ngə́, ‹O ghɨ ɨ shiʼnɨ a ŋwɔn afaʼ ɨghan wa a nɨ wu shiʼnɨ nkə́ faʼə nɨ táʼ ntəm a mbó me! O kɨ tiʼtɨ a mɨnya nɨ táʼ ntəm ə, ma mɨ gha a zə ghaʼtɨnɨ a mbó gho, o tiʼə ndə́ŋtə́ ghe. Kon a mu nɨdorɨ nɨ tafaʼ ɨgho ntiʼə ntuʼə bɨŋ zɨə!›

²²Wa a tsínɨ́ nɨ nkáb nchwuʼ mɨghúm mi nɨkwa lá, a kɔ́ʼtɨ́ a ɨshe, ɨ soŋ ngə́, ‹Tafaʼ, o kɨ chi nga nkáb nchwuʼ mɨghúm mi nɨkwa a mbó me, zɛn lá mbáʼ ma bənɨ nkwiʼtɨ nkáb nchwuʼ mɨghúm mi nɨkwa wə ndzum ə.›

²³Tafaʼ ɨyi a sóŋ wəmbo ngə́, ‹O ghɨ ɨ shiʼnɨ a ŋwɔn afaʼ ɨghan wa a nɨ wu shiʼnɨ nkə́ faʼə nɨ táʼ ntəm a mbó me! O kɨ tiʼtɨ a mɨnya ɨ shiʼnɨ, ma mɨ gha a zə ghaʼtɨnɨ a mbó gho, o tiʼə ndə́ŋtə́ ghe. Kon a mu nɨdorɨ nɨ tafaʼ ɨgho ntiʼə ntuʼə bɨŋ zɨə!›

²⁴Wa a tsínɨ́ nɨ nkáb nchwuʼ nɨghúm lá, a kɔ́ʼtɨ́ a ɨshe, ɨ soŋ ngə́, ‹Tafaʼ, ma zhi ngə́ o nɨ ŋwɔn atətɨ́ŋ a mbɔm ə, ɨ fuʼə adiʼ wa ka o bi agho, nkə́ sɛ́ʼə adiʼ wa ka o maʼ agho mɨntam ə.

²⁵Ma lan, ma kɨ chyɛ mbɔ́gə́, ntiʼ ngɛn ntoŋ nɨbɨ́ a tɨshe ndwɛʼ nkáb nchwuʼ nɨghúm ɨtso tsa ɨwu ə. Ze azo, ɨ ziŋ ə, koə.›

²⁶Lá tafaʼ ɨyi wa a chwɨ́gɨ́ wəmbo ngə́, ‹Gho ŋwɔn afaʼ abɨgəntəm, anarɨ a nə́nkɔ́ŋ! O kɨ chi nji ngə́ ma fuʼə adiʼ wa ka ma bi aghan, nkə́ sɛ́ʼə adiʼ wa ka ma maʼ aghə mɨntam le?

²⁷O kɨ zhi ma lan lá, muŋ o kɨ ghɛn ɨ nɨŋ nkáb ɨzan a mu nɨlɛnɨ nɨ nkáb, muŋ ma kwɛn lá ngɛn fɨgɨ a zɛrə abɔʼnɨ ndzum ɨzhi ɛ.

²⁸Ma lan, kwárɨ́nə nkáb nchwuʼ nɨghúm tsa wəmbo nga a mbó ŋwɔn wa a tsinɨ nɨ nkáb ɨban tsi bá lá.

²⁹Mbɨ́ʼ ngə́ a mbó ŋwɔn tsum wa a tsinɨ nɨ zɛrə, bɨ ghɨ kwiʼtɨ, á tiʼ nkɨ ntsi nɨ zɛrə a nɨghaʼ ə; lá a mbó ŋwɔn wa ka a tsi ayi nɨ zɛrə, tsɛʼ mədiʼ wa a tsinɨ nɨ wɛrə, bɨ ghɨ kwárɨ́ wəmbo ɨ lo nɨ zɛrə ghe.

³⁰Lá a mbó ŋwɔn afaʼ tɨ ɨlɨŋ wen, wáŋnə ayi a mu ndzumnɨ za ɨ tsinɨ abyɛn; adiʼ wa bɨ búgɨ́nə́ nkə́ nkfúrə́ mɨsɔŋ ɨwu ə.› ”

³¹“Nkfu za Mɔn Ŋwɔn a ghɨnɨ yen a mu nɨfáŋ ɨni, abɔʼnɨ bɨtsen bɨ ndá bɨ Ŋwi bɨtsum, wɛrə a mɨ shiʼtɨ tsi atú abərɨ a nɨfáŋ azhi ɛ.

³²Ɨbɛn bɨ ɨlaʼ ɨtsum lo bomnkɨ wə ɨshi, á wɛrə tiʼ ntyé awa ɨ fɨgɨ tso mbáʼ ntsiŋ mɨnyam a tyénɨ́ mbyindzɨ a tɨtərɨ mbyindɔ́ŋ lá.

³³Wɛrə a mɨ len ɨbɛn ba bɨ chinɨnɨ a bagɨ abó zɨ zə maʼə, lá ɨ byigɨ a bə mɔʼɔ ba a bagɨ abó zə ntə́ŋ ə.

³⁴Adiʼ məwa, Ɨfɔ a mɨ tiʼ soŋ a mbó ba a bagɨ abó zɨ zə maʼə ngə́, ‹Yenə, bən wa Ta ɨghan a fɔgɨnɨ awɨŋ ə! Nɨ yen ndzɨ nɨfɔ na bɨ kyáŋtɨ́nɨ́ a mbó bən ɨ lɔgɨnɨ mbáʼ bɨ káʼnɨ́ atuəshe ə.

³⁵Mbɨ́ʼ ngə́ nji kə́ ndzáŋə aghan nɨ gha mɨdzɨ ɨ wən, ntɔŋ ɨghə zómnkɨ́ nɨ gha azúm ma no, ma bé ngən nɨ kwarɨ aghan ɨ shiʼnɨ nɨ njwuʼ ɨtsən,

³⁶ma tsí ntyigɨnɨ nɨ wəgɨ ɨtsɛʼ a ɨnye me, ma kə́ ngǒ nɨ ləŋtɨ aghan a nɨghɔ, ma tsí atsáŋ nɨ yen ndəŋtɨ aghə.›

³⁷Ɨbɛn bə chinɨnɨ mɨ tiʼ bitɨ a wɛrə ngə́, ‹Maʼmbyí, bɨgɨ zɛ́n agho lá ɨ ghé nji zaŋnə agho bɨgɨ dzɨgɨ agho kə ntɔŋ ɨgho zomnkɨ bɨgɨ gha azúm o no le?

³⁸Bɨgɨ zɛ́n agho lá ɨ ghé o be ngən bɨgɨ kwarɨ agho ɨ shiʼnɨ, kə ntsi ntyigɨnɨ bɨgɨ wəgɨ ɨtsɛʼ a nye gho le?

³⁹Bɨgɨ zɛ́n agho lá ɨ ghé o ghǒnə kə ntsi atsáŋ bɨgɨ ləŋtɨ agho le?›

⁴⁰Ɨfɔ a mɨ chwɨ́gɨ́ a mbó bo ngə́, ‹Tsɛʼ a nkənu, ma soŋə awɨŋ ə, adzaŋ za nɨ ghɨ́nɨ́ a mbó táʼ wɛnə wa a bénɨ́ wu nkɨʼnɨ ntsa bɨtsum a tɨtərɨ ɨbɔmbɨma ɨban lá, nɨ ghɨ́ lá a mbó me ghe.›

⁴¹Wɛrə a mɨ tiʼ bəŋ ayi a mbó ba a bagɨ abó zɨ zə ntə́ŋ, ɨ soŋ ngə́, ‹Lonə awən a mbyɛn me, bən ba Ŋwi a lɔʼnɨ awɨŋ ə! Nɨ ghɛn a mu ɨmugɨ nɨnkoŋ wa bɨ kyaŋtɨnə a mbó Dəbɨrɨ abɔʼnɨ bɨtsen bɨ ndá bɨ Ŋwi ɨbyi lá!

⁴²Mbɨ́ʼ ngə́ nji kə́ ndzáŋə aghan nɨ zum aghan nɨ mɨdzɨ, ntɔŋ ɨghə zómnkɨ́ nɨ zum aghan nɨ azúm zə nonɨ,

⁴³ma bé ngən nɨ keʼ aghan kwarɨ nɨ njwuʼ ɨtsən, ntsi ntyigɨnɨ, nɨ zum aghan nɨ ɨtsɛʼ, ngǒ nkɨ ntsi atsáŋ nɨ keʼ aghan ləŋtə.›

⁴⁴Bo mɨ tiʼ kɨ chwɨgɨ ayi ngə́, ‹Maʼmbyí, bɨgɨ zɛ́n agho lá ɨ ghé o tsi nɨ nji kə ntɔŋ ɨgho zomnkɨ kə mbe ngən kə ntsi ntyigɨnɨ kə ngǒ kə ntsi atsáŋ bɨgɨ keʼ agho ləŋtɨ le?›

⁴⁵Ɨfɔ a mɨ chwɨgɨ a mbó bo ngə́, ‹Tsɛʼ a nkənu, ma soŋə awɨŋ ə, mbáʼ nɨ sé ghɨ a mbó wa a kɨgɨnɨ ntsa bɨtsum a tɨtərɨ ben lá, nɨ sé ghɨ lá a mbó me ghe.›

⁴⁶Məbiŋ mɨ tiʼ kwarɨ ɨnɨŋ ngɨ́ʼ zɨ nɨnkoŋ, lá á bə chinɨnɨ ghɛn a mu ntsi ntən nɨnkoŋ ə.”