Read Ngemba Matyo 26 Bible Online

Matyo 26 - Ngemba bible

Matyo 26

¹Yeso a ghɨnə mɛ́tɨ́ a ndiʼ ɨnu tsiŋ ɨtsum, ɨ soŋ a mbó bɨyɛʼ ɨbyi ngə́,

²“Nɨ zhi ngə́ a ndzum njwi tsi bá, Nɨdorɨ nɨ Tsa-yɛʼnɨ mɨ tsi, á bɨ tiʼ nga a Mɔn Ŋwɔn á bɨ kwemtɨ atɨ abaŋnɨ-baŋnɨ ə.”

³Bɨntumshe bə wi abɔʼnɨ bɨkum bɨ alaʼ bómnkɨ́ a ntɔ́ʼ Kayafasɨ, wa a bénɨ́ ntumshe wu ngwi,

⁴nkəmnɨ ngɨ a mɨnaŋ adzaŋ za bo mɨ ko a Yeso ndzum ndzum ɨ zhwitə.

⁵Lá bo sóŋ ngə́, “Bɨgɨnə mɨ keʼ zagɨ ngɨ a məzen a nkfu nɨdorɨ na, muŋ ɨbɛn mɨ bvugɨ ndum ə.”

⁶A nkfu za Yeso a tsínɨ́ a Bɛtani a ndá Samɔn ŋwɔn bəkfuʼə,

⁷mangye wu tse a kɔ́ʼtɨ́ ngyen wə mbyɛn, ntiʼtɨ a zhwɛʼ[14] wa bɨnyuʼtə bə atɨŋndvuŋ tsínɨ́ wə mu, nchwirɨ bɨnyuʼtə bə atɨŋndvuŋ ba atú Yeso, mbáʼ a shíʼtɨ́nɨ́ ntsí atú atɛkɨ ndzɨə ghe.

⁸Mbáʼ bɨyɛʼ ba zɛ́nɨ́ a məzen lá, bo lwí ntɔŋ ɨ soŋ ngə́, “Ntsəŋ azúm zen lá ɨ nɨ mbɨ́ʼ ake le?

⁹Bɨ chi fiŋ bɨnyuʼtə bə atɨŋndvuŋ ben atú təkɔʼ bɨ nkáb, ɨ gha nkáb zɨ wu a mbó ɨfúm ə.”

¹⁰Yeso a zhí anu za bo kɨ́nə́ sóŋə́, ma lan, ntiʼ soŋ a mbó bo ngə́, “Nɨ ghǎ ngɨ́ʼ a mbó mangye wen ngə́ ke le? A nɨ ngótí anu zə shiʼnɨ za a ghɨnɨ a mbó me ghe.

¹¹Ɨfúm tsi bɨŋ bo nkfu tsum, lá ma ghɨ kaʼ bɨgɨnə tsi nkfu tsum ə.

¹²A chwirɨ bɨnyuʼtə ben a ɨnye me lá, nkyaŋtɨ aghan adzaŋ za bɨ mɨ twəŋə.

¹³Tsɛʼ a nkənu, ma soŋə awɨŋ ə, adiʼ atsum za bɨ soŋnɨ nkən wu shiʼnɨ wen ɨwu a mu mbyi tsum, anu za wɛrə a ghɨnɨ lá, bɨ mɨ soŋənə a zɛrə a nkwémtɨ́ ɨkum ɨyi ɛ.”

¹⁴Táʼ a tɨtərɨ bɨyɛʼ ba nɨghúm ntsɔb bá, wa bɨ kɨ́nə́ ntɔ́ŋə́ ngə́ Yudasɨ Iskario, a ghɛ́n a mbó bɨntumshe bə wi

¹⁵mbitɨ awa ngə́, “Nɨ mɨ gha ake a mbó me mbáʼ be ma gha a Yeso a mbó bən le?” Bo kwáʼtɨ́ ɨbagɨ tsə́ŋtsə́ŋ mɨghúm mi mɨntárə́ nga wəmbo ə.

¹⁶Ɨ lɔgɨnɨ a nyom məwa, Yudasɨ a kə́ ntíʼə ndǒ mɨndóm a nchyɛ́ nɨ abárɨ́ zə shiʼnɨ ɨ fen a Yeso a mbó bo ghe.

¹⁷A benə a nye ntsambyi njwi nɨdorɨ nɨ abán tɨ mbɛgə, bɨyɛʼ bɨ Yeso yen mbitɨ ayi ngə́, “O lǒ ngə́ á bɨgɨ ghɛn nkyaŋtɨ mɨdzɨ mɨ Tsa-yɛʼnɨ a mbó gho lá ɨ ghé le?”

¹⁸A sóŋ a mbó bo ngə́, “Nɨ ghɛn a mbó ŋwɔn wu tse a mu ntáʼmbagə wu wi, ɨ soŋ wəmbo ngə́, ‹Ndiʼ aŋwaʼnɨ a soŋ ngə́, nkfu Ɨzan ɨ tiʼ abó; ma mɨ dzɨ mɨdzɨ mɨ Tsa-yɛʼnɨ a ndá gho bɨgɨ bɨ bɨyɛʼ ɨbə.› ”

¹⁹Bɨyɛʼ ɨbyi ghɨ́ tsɛʼ adzaŋ za Yeso a tɨ́gɨ́tɨ́nɨ́ awa, nkyaŋtɨ mɨdzɨ mɨ Tsa-yɛʼnɨ ma.

²⁰A ghɨnə mbé a nkwɛfɔ, Yeso a shiʼtɨ ntsi a ɨshe bo bɨ bɨyɛʼ ɨbyi ba nɨghúm ntsɔb bá a ndzɨ́ə ghe.

²¹Mbáʼ bo kɨ́nə́ ndzɨ́ə lá, Yeso a sóŋ ngə́, “Tsɛʼ a nkənu, ma soŋə awɨŋ ə, táʼ ŋwɔn nɨ bən a mɨ korɨ a mɨnaŋ atú ɨghə.”

²²Bɨyɛʼ ba lánɨ́ ntsí nɨ adzə́ŋnɨ, ntiʼ mbiʼnɨ mbitɨ zɨ ɨ mɔ́ʼɔ́ mɔ́ʼɔ́ ngə́, “Tsɛʼ a nkənu, Maʼmbyí o sóŋə́ lá ngə́ a nɨ me le?”

²³Yeso a chwɨ́gɨ́ ngə́, “Ŋwɔn wa a tsagɨnɨ abó azhi a shiʼ mbom bo azan a mu akəb, a mɨ korɨ a mɨnaŋ atú ɨghə.

²⁴Mɔn Ŋwɔn a mɨ kfo adzaŋ za Aŋwaʼnɨ a Ŋwi a soŋnɨ ngə́ a mɨ kfo, lá ngɨ́ʼ zɨ ngwi ɨ tsi atú ŋwɔn wa a korɨnɨ a mɨnaŋ atú Mɔn Ŋwɔn ə! A kwɛ́ bé bɔŋ mbáʼ be bɨ sé a ŋwɔn məwa jwiə!”

²⁵Yudasɨ, ŋwɔn wa a kórɨ́nɨ́ a mɨnaŋ atú ɨyi a kɨ́ mbítɨ́ ngə́, “Tsɛʼ a nkənu, a Ndiʼ Aŋwaʼnɨ, ka o soŋə agho lá ngə́ a nɨ me ghe?” Yeso a chwɨ́gɨ́ ngə́, “A soŋ gho ghe.”

²⁶Mbáʼ bo kɨ́nə́ ndzɨ́ə, Yeso a lɔ́gɨ́ mbɛʼ abán, ngɨ atsaʼtɨ a Ŋwi zə nga mɨya, mbatɨ a zɛrə, ntiʼ nga a mbó bɨyɛʼ ɨbyi, ɨ soŋ ngə́, “Konə, kfurɨnə; nə nɨ ɨnyam ɨnye ɨzan ɨ ziŋ ə.”

²⁷A tíʼ ndɔgɨ ndɔ́ŋ, ngɨ atsaʼtɨ a Ŋwi zə nga mɨya, nga a mbó bo, ɨ soŋ ngə́, “Nonə, bən bɨtsum ə;

²⁸nə nɨ alɛm azan a zen, mbáʼ lá fɛnwu akan a Ŋwi, alɛm azan za bɨ chwirɨnɨ a mbó bə ghaʼnɨ taŋ á bɨ lɨgɨnɨ mɨbvu ə.

²⁹Ma soŋ a mbó bən ngə́ ma láʼ kaʼ mɨluʼ məmen kwiʼ no ɨ kɔʼ kuʼ njwi za ma ghɨnɨ no a mə fi ma bɨgɨnə a mu Nɨfɔ nɨ Ta ɨghə.”

³⁰Bo tíʼ ndzúmtɨ́ azúmtɨ, ɨ fu nkɔʼ ngɛn atú ntáʼ Olif ə.

³¹Yeso a sóŋ a mbó bo ngə́, “Bən bɨtsum mɨ kɨəkɨ ɨ nyɛʼ aghan nɨ ɨtfúʼ sɨŋə, mbɨ́ʼ ngə́ aŋwaʼnɨ a Ŋwi a soŋ ngə́, ‹Ŋwi a mɨ zhwitɨ a ntsiŋ mɨnyam, á mbyindzɨ tsa tsɨ tsinɨ a mu akarɨ a mbyindzɨ tiʼ ndzagɨnə.›

³²Lá mbáʼ bɨ zhwemnɨnə aghan, ma mɨ ghɛn a mbyi bən a Galili ə.”

³³Bita a ghám, ɨ soŋ a mbó Yeso ngə́, “Be bɨtsum kwɛ nkɨəkɨ nyɛʼ agho, muŋ ma láʼ kaʼ agho nyɛʼtə!”

³⁴Yeso a sóŋ a mbó Bita ngə́, “Ma soŋ a mbó gho ngə́ bɔŋ á ankɨʼə a tɔŋ nɨ ɨtfúʼ sɨŋə, o mɨ soŋ nkfu tsi tárə́ ngə́ ka o zhi agho aghə.”

³⁵Bita a chwɨ́gɨ́ ngə́, “Ma láʼ kaʼ mə lá soŋ, mbáʼ be a kwɛ ndiʼ ngə́ á ma kfo bɔgə ghe!” Bɨyɛʼ ɨbyi ba bɨtsum zɔ́ŋ nkɨ soŋ tsɛʼ ndəŋndəŋ anu ə.

³⁶Yeso a tíʼ ngɛn bo bɨ bɨyɛʼ ɨbyi a nye adiʼ zə tse za bɨ kɨ́nə́ ntɔ́ŋə́ ngə́ Gɛtɨsemani, ɨ soŋ a mbó bo ngə́, “Tsinə ɨghan, á ma ghɛntɨ a bagɨ yirɨ ntsaʼtɨ a Ŋwi ɨwu ə.”

³⁷A lɔ́gɨ́ a Bita bo bɨ ɨbɔ bɨ Zebɛdi bə mbáŋnɨ́ ba bi bɨbá bo bo ghen. Ntəm ɨyi dɨ́rɨ́ ndon nɨ adzə́ŋnɨ,

³⁸a tiʼ soŋ a mbó bo ngə́, “Adzə́ŋnɨ za a tsinɨ a mu ntəm me a tən be tɨ́sə́n a nye ndóm wa a chinɨ zhwitɨ aghə. Nɨ ghɔŋ ɨghan ə, á bɨgɨnə tsi a nɨkyerə bɨtsum ə.”

³⁹A bɔ́nɨ́ mbə ngɛntɨ a mbyi, ɨ shiʼ ngvo nkubɨnɨ ɨshi ɨyi a tɨshe ntsaʼtɨ a Ŋwi ngə́, “Ta ɨghan, be a chi fu, kwarɨ ndɔ́ŋ ngɨ́ʼ zen a mbó me ghe. Lá, á be be adzaŋ za o lɔnə nkeʼ be be adzaŋ za a lɔnə me ghe.”

⁴⁰Wɛrə a tíʼ mbə mbə́n ngyen a mbó bɨyɛʼ ɨbyi ba ndzɛn bo nɔŋ ndyě; wɛrə a bitɨ a Bita ngə́, “Njingə nɨ lo chi keʼ tsi a nɨkyerə bɨgɨnə atú táʼ nyom le?

⁴¹A nkyerɨnə nkə́ ntsaʼtɨnə a Ŋwi mbɨ́ʼ nɨ vwo a mu akwaʼnɨ ə. Azhwi a lǒ ghe, lá ɨnyam ɨnye ɨ ghɔgə.”

⁴²A nye nkfu tsa tsɨ kuʼnɨ tsi bá, Yeso a nyɛ́ʼtɨ́ awa ngɛn ntsaʼtɨ a Ŋwi ngə́, “Ta ɨghan, be a be ngə́ bɨ chi keʼ kwarɨ ndɔ́ŋ ngɨ́ʼ zen a mbó me tɨgha ma no a zɛrə, á fu tsɛʼ za o lɔnə ghe.”

⁴³A bə́ tɨ kwiʼ bən ndzɛn awa bɨ lyenə ghe; bo kɨ chi keʼ ɨmɨgɨ ɨma ŋaʼ mbɨ́ʼ ngə́ mɨ lón nɨ fɨlye ə.

⁴⁴Yeso a kwíʼ nyɛʼtɨ awa, ngɛn adiʼ adaŋ ntsaʼtɨ a Ŋwi a nye nkfu tsa tsɨ kúʼnɨ́ tsi tárə́, nkə́ nkwátə́ tsɛʼ mɨgham mə mbyi ma.

⁴⁵A tíʼ bə mbə́n a mbó bɨyɛʼ ɨbyi ba mbitɨ awa ngə́, “Nɨ bvurə ndyě nkə́ njwítə́ awən le? Zɛnə! Nyom a kuʼnə, á bɨ gha a Mɔn Ŋwɔn a mbó ngaŋ ngɨ mɨbvu ə.

⁴⁶Lonə atɨ́, á bɨgɨnə ngěn ghe. Zɛnə, ŋwɔn wa a taŋnɨ a mɨnaŋ atú ɨghan a wɛnə ɨghə.”

⁴⁷Yeso a kə́ mbvúrə́ ngámə́ mbáʼ Yudasɨ, wa a bénɨ́ táʼ a tɨtərɨ bɨyɛʼ ba nɨghúm ntsɔb bá, a yénə́. Wɛrə a tsí bo bɨ nángyérə́ wu ngwi wa bɨ tíʼtɨ́nɨ́ bɨlumban abɔʼnɨ mbaŋ fɨlam, ndo a mbó bɨntumshe bə wi abɔʼnɨ bɨkum bɨ alaʼ ə.

⁴⁸Ntǎŋ mɨnaŋ wa a kwɛ́nə soŋ anu za zɨə mɨ ghɨ a mbó nángyérə́ wa ngə́, “Ŋwɔn wa ma mɨ chwɨgɨ, a nɨ ŋwɔn wa nɨ lɔnə ghe. Nɨ shiʼ mbó wə ɨnye ə!”

⁴⁹Yudasɨ a byí ntíʼ nkɔ́ʼ ngɛ́n a mbó Yeso, ɨ soŋ wəmbo ngə́, “Ndiʼ Aŋwaʼnɨ, ma tsaʼtə agho!” ntiʼ nchwɨgɨ ayi ɛ.

⁵⁰Yeso a chwɨ́gɨ́ ayi ngə́, “Ɨson ɨghan, o tsi ɨghan lá mbɨ́ʼ ake?” Bɨ tíʼ nkɔ́ʼ ngyen nko a Yeso, ntiʼtɨ ayi nɨ mbó mə tɨŋə.

⁵¹Táʼ ŋwɔn wa a tsínɨ́ bo bɨ Yeso a dvúŋ ɨŋwi ɨzhi a mbáʼ, mbɛ atoŋnɨ abuʼ a Ntumshe wu Ngwi ɨwu ə.

⁵²Yeso a sóŋ wəmbo ngə́, “Bə nɨŋ ɨŋwi ɨzo a mbáʼ wədiʼ ə. Ɨbɛn bɨtsum ba bɨ sɔŋnɨ ɨŋwi mbáʼ, bɨ mɨ kfo tsɛʼ a mbó ɨŋwi mbáʼ ə.

⁵³O wiʼtɨ ngə́ ma chi kaʼ tsagɨ nkən a mbó Ta ɨghan, á byi ntsagɨ ɨkarɨ bɨtsen bɨ ndá bɨ Ŋwi a nchwuʼ a nchwuʼ a mbó me le?

⁵⁴Be a be ma lan, a ghɨ tiʼ kɔʼ bomnkɨ bo bɨ ɨnu tsa bɨ ŋwaʼnɨnɨ a mu Aŋwaʼnɨ a Ŋwi ngə́ nə nɨ za a mɨ zagɨ fu lá ɨ nə́ le?”

⁵⁵A nyom məwa Yeso a bítɨ́ a mbó nángyérə́ wa ngə́, “Nɨ fu tso nɨ ghěn a nkó ndzɛrə nɨ bɨlumban abɔʼnɨ mbaŋ fɨlam a nkó me le? Nɨ njwi nɨ njwi ma kə́ shíʼtə́ nchyɛ̌ a mu Ndáŋwi zɨ Ngwi ndiʼə, nɨ keʼ aghan koə.

⁵⁶Lá, ziŋ atsum a funə tɨtsɔŋnɨ lá taŋ ɨ kɔʼ ɨ bomnkɨ bo bɨ ɨnu tsa ntóm Ŋwi kwɛ́nə ŋwaʼnɨ a mu Aŋwaʼnɨ a Ŋwi ə.” Bɨyɛʼ ɨbyi bɨtsum tíʼ nyɛʼ ayi nkɨəkɨ awa ghe.

⁵⁷Ɨbɛn ba bɨ kónɨ́ a Yeso lá bɨ tíntɨ́ ayi ngɛn nɨ zɨ a mbó Kayafasɨ, Ntumshe wu Ngwi, adiʼ wa bɨdiʼ bɨ Nyɔngɔŋ abɔʼnɨ bɨkum bɨ alaʼ bómnkɨ́nə́.

⁵⁸Bita a kə́ ndzɔŋə nəghagɨ, ndzɔŋ sóté nkɔʼ nkuʼ a ɨsaŋəbyɛn Ntumshe wu Ngwi ə. Wɛrə a tsá ntsu abuʼ nkon ngɛn a ɨsaŋəbyɛn, ɨ shiʼtɨ ntsi bo bɨ ngaŋ ntsǐŋ ɨdiʼ a ndzé atsum za a ghɨnɨ fú a nye Yeso ɨ ghɛn kuʼ a ndwitə ghe.

⁵⁹Bɨntumshe bə wi abɔʼnɨ Ngaŋ Sáʼ Abyɛn bɨtsum lɔ́btɨ́ a nchwé ɨnu atú Yeso taŋ ɨ zhwitɨ ayi ɛ.

⁶⁰Ɨbɛn bə ghaʼnɨ báʼtɨ́ nkɔ́ʼtɨ́ a ɨshe nchwe ɨnu wu atú ɨ chwɛnɨ lá, ŋwɔ nɨbo wu tse a sé tsi nɨ ngótɨ́ anu za be bɨ kaŋ ayi ɨwu ə. A ndwɨgɨnə, mbáŋnɨ́ tsi bá kɔ́ʼtɨ́ a ɨshe

⁶¹ɨ soŋ ngə́, “Mba wɛnə a sóŋ ngə́, ‹Ma chi kum Ndáŋwi zɨ Ngwi zɨ Ŋwi ɨ bə vwu atú njwi tsi tárə́ ghe.› ”

⁶²Ntumshe wu Ngwi a tɛ́m atɨ́ mbitɨ a Yeso ngə́, “O so nɨ anu zə chwɨgɨnɨ tsi le? A nɨ anu ake mbáʼ ɨbɛn biŋ sóŋnə́ mbɨ́ʼ agho le?”

⁶³Lá Yeso a zúʼ ngə́ shwi ə. Ntumshe wu Ngwi wa a kwíʼ ngam wəmbo ngə́, “Tɨtsɔŋnɨ ma lǒ ngə́ o kan nɨ ɨkum Ŋwi, zɨ wa a tsinɨ ntɨŋ ə: soŋ awɨgɨ mbáʼ be o be Wa Bɨ Zɔ́ʼnɨ́ wa, wa a nɨ Mɔn Ŋwi lá.”

⁶⁴Yeso a chwɨ́gɨ́ wəmbo ngə́, “A soŋ gho ghe. Lá ma soŋ a mbó bɨŋ ə: ɨ lɔgɨnɨ tɨtsɔŋnɨ ɨ ghěn nɨ mbyi, o ghɨ zɛ́n a Mɔn Ŋwɔn á shiʼtɨ ntsi abó maʼə zə Tamɨtən Mɨtsum, ɨ kə́ yenə a mu mbaʼ a fɔməbvurə ghe!”

⁶⁵Mbáʼ a sóŋnɨ́ a məzen lá, Ntumshe wu Ngwi a sátɨ́ ɨtsɛʼ ɨchi, ɨ soŋ ngə́, “Nə nɨ nɨgham nɨ ndzɔm Ŋwi ə! Ka bɨgɨnə kwiʼə mbɨŋə ndǒ awɨgɨnə bətɛmə-ndzě bə daŋ ə! Nɨ zuʼnə tsɛʼ tɨtsɔŋnɨ, adzaŋ za a zɔmnɨ a Ŋwi ə!

⁶⁶Nchɛrɨ ɨsáʼ ɨzən ɨ be ngə́ ke le?” Bo chwɨ́gɨ́ ngə́, “A vwo ɨsáʼ ntsi nɨ ɨ zagɨ ɨ kfoə.”

⁶⁷Bo tíʼ ntsə́rɨ́ mɨtwe wə ɨshi nkɨ shwom ayi ɛ. Ba bɨ kɨ́nɨ́ ndúbɨ́ ayi lá,

⁶⁸bɨ sóŋ ngə́, “Wa bɨ Zɔ́ʼnɨ́, fɨʼtɨ a mbó bɨgɨ ə! Agho lá a tsɔgɨ ɨwa?”

⁶⁹Bita a shíʼtɨ́ ntsí abyɛn a ɨsaŋəbyɛn Ntumshe wu Ngwi ə. Ngaŋ afaʼ zɨ mangye ɨ yén wəmbo ɨ soŋ ngə́, “O kɨ chi nkɨ ntsi bɨŋ Yeso ŋwɔn bə Galili ə.”

⁷⁰Lá wɛrə a tón ayi a ɨshi bo bɨtsum, ɨ soŋə ngə́, “Ka ma zhi aghə anu za o sóŋnə́ ghe.”

⁷¹A ghɨnə fú ngɛ́n a ntsu abuʼ ɨsaŋəbyɛn za, ngaŋ afaʼ zɨ mangye za zɨ mɔʼɔ ɨ zɛn ayi, ɨ soŋ a mbó ɨbɛn ba bɨ tɛ́mkɨ́nɨ́ a ngɔbə ngə́, “Ŋwɔn wɛnə a tsí bo Yeso ŋwɔn Nazarɛ ghe.”

⁷²Bita a bə́ nkwiʼ ntón ayi, nkantɨ ngə́, “Ka ma zhi aghə a ŋwɔn məwa.”

⁷³Abaŋ a bənə mbe ɨwu, ɨbɛn ba bɨ tɛ́mnkɨ́nɨ́ a ngɔbə, bɨ kɔʼtɨ a mbyɛn Bita ɨ soŋ ngə́, “Tsɛʼ a nkənu, o kɨ mbe táʼ ŋwɔn nɨbo, mbɨ́ʼ ngə́ mbɔm nɨgham ɨzo ɨ kyɛʼ agho ə!”

⁷⁴Bita a tíʼ soŋ ngə́, “Ma kan ngə́ ma sóŋə́ lá nkənu ə! A Ŋwi a nɨŋ ngɨ́ʼ a ɨnye me mbáʼ be ma tú soŋənə lá nkənu ə! Ka ma zhi aghə a ŋwɔn yirɨ ə!” Tsɛʼ tɨkə a fú wə ntsu, ankɨʼə a tɔ́ŋə.

⁷⁵Bita a tíʼ ngwáʼtɨ́ nɨgham nɨ Yeso na ngə́, “Mbɔŋə ankɨʼə a ntɔ́ŋə́, o mɨ soŋ nkfu tsi tárə́ ngə́ o so aghan zhyɛ.” A tíʼ fú ngɛ́n abyɛn mbugɨ nɨ mɨlɨŋnɨ ə.